جەڭىمپاز ءجاميلا (ەرتەگى-قويىلىم)
1-اۆتور:
— الماتى دەگەن شاھاردا، ءجاميلا دەگەن قىز ءومىر ءسۇرىپتى. بىردە ءجاميلا كوشەدە كەلە جاتىپ، جولدان 10 000 تەڭگە تاۋىپ الادى. وسى كەزدە ونىڭ ميىندا، ەكى ءتۇرلى ويدىڭ تارتىسى باستالادى.
(ساحناعا اق كيىم كيگەن ەكى قىز جانە قارا ءتۇستى كيىم كيگەن ەكى قىز شىعادى.)
1ء-شى اق وي:
— ءجاميلا، ەشقايدا كەتپەي، وسىندا توسا تۇر. اقشاسىن جوعالتقان ادام ءقازىر كەلەدى.
1ء-شى قارا وي:
— ءجاميلا، اينالاڭا قاراشى؟ ەشكىم جوق! ال دا كەتە بەر! كىم سەنى كىنالايدى؟ ەشكىم! تەز، كەتىپ قال. جىلدام!
2ء-شى اق وي:
— ءجاميلا، توبەڭنەن جاراتقان يەڭ قاراپ تۇر. ەكى يىعىڭداعى پەرىشتەلەر جازىپ جاتىر. انا دۇنيەدە جاۋاپ بەرەسىڭ! كەتپە! تۇر وسىندا!
ءجاميلا:
— جاقسى، كۇتەمىن. يەسىنە قايتارىپ بەرەمىن.
2ء-شى قارا وي:
— قاپ، مىنا قىزدىڭ قىرسىعىن-اي! ءقازىر.. (جۇگىرىپ كەتىپ قالادى دا، بالمۇزداق ساتۋشىنى الىپ شىعادى.)
بالمۇزداق ساتۋشى:
— بالمۇزداق ساتام، بالمۇزداق! ءدامى ءتىل ۇيىرەدى. جاڭعاق قوسىلعانى، قۇلپىناي، تاڭقۋراي قوسىلعانى، شوكولادتى، شوكولادسىزى بار.
(ءجاميلا اقشاعا ءبىر، بالمۇزداق ساتۋشىعا ءبىر قاراپ الىپ، بىرنەشە مارتە وقتالىپ، ءبىراق الماي قايتىپ كەتەدى.)
ساتۋشى:
— ءاي، قىز! الاسىڭ با؟ الساڭ جىلدام الىپ ال، سوسىن قايتا كەلمەيمىن.
ءجاميلا (تامسانىپ):
— ممم، قاپ، نە عوي. جارايدى، ەشنارسە ەمەس! (ءوز-وزىن زورعا ۇستاپ، تۇرىپ قالادى. ساتۋشى كەتىپ قالادى. ىزا بولعان 2ء-شى قارا وي، كيىم ساتاتىن ساۋداگەردى ەرتىپ كەلەدى.)
ساۋداگەر:
— كويلەك ساتام كويلەك! ون مىڭعا ەكى كويلەك بەرەمىن. قىزىلى بار، جاسىلى بار. جىلتىرى بار، اسىلى بار. الام دەسەڭ الىپ قال! مۇندا قايتا كەلمەيمىن! ەندى ارزانعا بەرمەيمىن!
(ءجاميلا كويلەكتەرگە قىزىعىپ قاراپ قالادى.)
ساۋداگەر:
— ءاي، قىز! الاسىڭ با؟ ەگەر الماساڭ قايتتىم؟!
ءجاميلا:
— جوق، راقمەت! المايمىن!
(ساۋداگەر كەتىپ قالادى. 1ء-شى قارا وي اسپازدى ەرتىپ شىعادى.)
اسپاز:
— ءدامدى ءبالىش بار. ءتاتتى كۇلشە بار. اناڭا اپارىپ بەر دە، العىسىن ال!
(ءجاميلا جۇگىرىپ بارىپ، تۇرىپ-تۇرىپ قايتىپ كەتەدى.)
اسپاز:
— ادەمى قىز! اناڭا ءتاتتى ءبالىش المادىڭ با؟ نەگە اينىپ قالدىڭ؟
ءجاميلا:
— راقمەت اپاي! كەلەسى جولى الارمىن. (تۇرا بەرەدى. وسى كەزدە ساحناعا ءبىر قىز شىعىپ، جەردەن الدەنە ىزدەگەندەي بولادى. ءجاميلا قاسىنا جەتىپ بارادى.)
ءجاميلا:
— ءسىڭلىم، نە ىزدەدىڭ؟
قىز:
— ون مىڭ تەڭگەمدى ءتۇسىرىپ الدىم. انام ۇرساتىن بولدى.(جىلامسىرايدى.)
ءجاميلا:
— جىلاما، اقشاڭدى مەن تاۋىپ الدىم. كەلگەنىڭ قانداي جاقسى بولدى! (قۋانىپ، قىزعا اقشاسىن قايتارىپ بەرەدى. وسى كەزدە فان-فارا ويناپ، ساحناعا بلوگەرلەر شىعادى.)
1ء-شى بلوگەر:
— قارىنداسىم، جارايسىڭ! ەسىمىڭ كىم؟
ءجاميلا:
—ءجاميلا!
2ء-شى بلوگەر:
— ءجاميلا، بۇل «پرانك» بولاتىن. ياعني «ويىن». سەنى تەكسەرگىمىز كەلدى. مىنا 10 000 تەڭگە سەنىكى! وعان قوسا مىنا 20 000 دا!
3ء-شى بلوگەر:
— ساعان وسىنداي دۇرىس تاربيە بەرگەن اناڭا مىڭ العىس!
4ء-شى بلوگەر:
— ساعان ءتاتتى ءبالىش! وزىڭە ادەمى كويلەك. ۇلكەن بالمۇزداق سىيعا بەرەمىز! ءجۇر، ۇيىڭە جەتكىزىپ قويايىق؟!
(ءجاميلا قۋانعاننان ءبىر جىلاپ، ءبىر كۇلەدى. بارلىعى ونى قۇتتىقتاپ، ۋلاپ-شۋلاپ شىعىپ كەتەدى. ساحناعا اق وي مەن قارا وي قايتا شىعادى.)
1ء-شى اق وي:
— قارا وي، جەڭىلدىڭ بە؟! ۇنەمى سەنىڭ جولىڭ بولا بەرمەيدى. ءقازىر ادال، جاقسى جاستار كوپ! شۇكىر!
1ء-شى قارا وي:
— يا، ءبىر جولعا سەنەن جەڭىلە تۇرايىن. كەلەسى جولى مىندەتتى تۇردە جەڭەمىن! (كەتەدى)
اۆتور:
— قۇرمەتتى وقۋشىلار! ەگەر سەندەر دە اقشا تاۋىپ الساڭدار، قاي ويدىڭ ءتىلىن الار ەدىڭدەر؟ كىم ءناپسىنىڭ ءتىلىن الادى، ول شىعىنعا ۇشىرايدى. كىم اقىلعا باعىنادى، مول سىيعا كەنەلەدى! ويلانىڭدار!
(كەتەدى.)
گ. قاسەنباي
You Might Also Like
-
يساتاي تايمان ۇلى ءحىح عاسىردىڭ وتىزىنشى جىلدارى ەدىل مەن جايىق وزەندەرى اراسىن مەكەندەگەن قازاق شارۋالارىنىڭ حانعا قارسى كۇرەسىن باستاعان باتىرى بولعان. ول كەزدەگى قازاقتاردىڭ حانى جاڭگىر (جيھانگەر)...
-
اۆتور: — باياعىدا ءبىر حان بولىپتى. حاننىڭ ءۇش قىزى بار ەكەن. بىردە حان قىزدارىنىڭ ءبىلىمىن تەكسەرۋ ءۇشىن، الدىنا شاقىرادى. (ساحنادا حان، ۋازىرلەرى، حانىمى، ءمۇعالىم جانە ءۇش حانشايىم وتىرادى.)...
