جەڭىس كۇنىنە ارنالعان ولەڭدەر
راشيد جانعوزينگە
قوس قولى بىردەي جارالى
دارمەنى قايسى ءراشيدتىڭ؟
اشىلىپ جاۋدىڭ ارانى،
كەيىبىنە كىردى اش ءيتتىڭ.
وق بولىپ جاندى وعات وت،
شىعاتىن ودان جول قايدا؟!
پارتبيلەتىن قولىنا اپ،
قاتتى قالدى سول بويدا.
اشا الماي قويدى نەمىستەر
باتىردىڭ قولىن قان قىلىپ.
وسىنداي عاجاپ ەر ىستەر
جاساي بەرەر ماڭگىلىك.
«الا المايسىڭ، - دەدى باتىر،
دۇشپانىنا، - ەركىمدى.
كەڭ جەرىمدى تۋعان ءورت سالىپ،
بۇزا المايسىڭ كوركىمدى!»
جولىن بوگەپ دۇشپاننىڭ
قۇربانى بولدى قايران ەر،
ەر بوپ تۋعان ادال بالاسىڭ،
قوينىنا الدى تۋعان جەر.
* * * * *
مايداننان حات
اسان ءجۇسىپوۆ
جاپاندا جۇرگەن ساندۋعاش،
بايشەشەكتەي ءبىزدىڭ جاس.
اتا-انا ەسكە تۇسكەندە،
شاراپ ىشپەي بولدىم ماس.
ويلانباي ءجۇرۋ جاراماس،
سەكىلدەنىپ اۋىر تاس.
قانداي كۇيدە ءجۇر ەكەن،
اتا-انا مەن قارىنداس.
بەتىمەن كەۋىل جايىلماس،
اعايلارمەن حابارلاس.
بايجۇمان، ەسحان، وسپانعا،
حات سالماي تۇرۋ جاراماس.
قىسقا ءسوز بولار تاتىمدى،
بىلەسىڭ مەنىڭ اتىمدى.
كوزىمدەي كورىپ وقىڭدار،
وسىناۋ جازعان حاتىمدى.
ساعىندىم ءسىزدى اناسى،
مەن كوزىڭنىڭ قاراسى.
انانى قالاي ۇمىتار،
سانالى ادام بالاسى.
جازسام ويىم تاۋسىلماس،
ءار نارسەگە بولدىم ماس.
كۇلامزا ەسكە تۇسكەندە،
تىيىلماي كەتەر كوزدەن جاس.
ساعىندىڭ با باۋىرىم،
مايدانداعى اعاڭدى.
كەلەسى جىلى بارارمىن،
كەلتىرسە اللا شامامدى.
* * * * *
مايدانگەرلەر
ماحمۇتباي امىرە ۇلى
قىزىلوردا
قان مايداننىڭ جۇرەكتە جاراسى بار،
قايعىسى مەن ءزىلى بار، نالاسى بار.
ارامىزدا جۇرەتىن الشاڭ باسىپ،
ارداگەرلەر ازايىپ باراسىڭدار.
قاستەرلەيدى حالقىمىز قاھارمانىن،
ءجۇر ەسىندە سان جارىق، ساپارلارىڭ.
قايران ەرلەر، قاھارمان ارداگەرلەر،
قالدى-اۋ سيرەپ بۇل كۇندە قاتارلارىڭ.
ەرلىك سۇيگەن ەلىڭە سالتىڭ ۇنار،
جۇزدەرىڭدە جانعان وت جارقىلى بار.
«سوعىس» دەگەن سالماعىن جالعىز ءسوزدىڭ،
بۇگىنگى ۇرپاق وزدەرىڭ ارقىلى ۇعار.
جاسقانباعان جاۋىنان جاراقتى ەر،
ەرلىگىڭدى اڭىز عىپ تاراتتى ەل.
قاھارماندىق دەگەندى كەيىنگى ۇرپاق،
جۇزدەرىڭە سەندەردىڭ قاراپ بىلەر.
دارقان مىنەز، داريا وي، دارا شىڭدار،
جارقىن ءجۇزدى، جۇرەگى اق، جانى اسىلدار.
ارامىزدا جۇرەتىن الشاڭ باسىپ،
مايدانگەرلەر ازايىپ باراسىڭدار.
* * * * *
جامبىلدىڭ باتاسى
ءجۇز جاساعان جۇرەكتەن
ۋا، قاراعىم بالالار!
ەر بول دەمەي، نە دەيىن.
ەرەۋىلدى مايداندا
ۇستەم بولسىن مەرەيىڭ.
جاۋدى قىرىپ، ايداۋعا،
تالماي كومەك بەرەيىن.
ءدۇبىر قوسىپ ايعايعا،
قىزىل ءتىلدى جەبەيىن.
سەندەرگە ولەڭ ايتقانعا،
ەش شارشادىم دەمەيىن.
قان مايدان بوپ جاتقاندا،
قارلىعار ما كومەيىم!
ءجۇز جاساعان جۇرەكتەن
جىرلارىمدى توگەيىن.
كوكتەمەنىڭ كۇنىندەي
جاۋدى جەڭىپ، كۇلىمدەپ.
كۇلگەنىڭدى كورەيىن.
«قاھارمانىم! كۇنىم!» دەپ
بەتتەرىڭنەن وبەيىن.
* * * * *
جان اكە، اسىل اكە، ارداقتى اكە،
ءتىرى بولساڭ جۇرەر ەدىڭ 85-تە.
قان مايداندا، قان كەشىپ كۇتكەن كۇننىڭ
كەلە جاتىر 65 جىلدىق مەرەكەڭ دە.
سۇم سوعىستان امان كەپ، مارقۇم اكە،
اجال سەنى اكەتتى-اۋ جايلى ومىردە.
بۇل قىزىقتى كورەتىن ەلمەن بىرگە
تاعدىر شىركىن وزىڭە كوپسىندى مە.
ز0-جىل ءوتتى، مىنە، سودان بەرى
ەسكە الامىز ءوزىڭدى جەڭىس كۇنى.
سول جەڭىستىڭ كورسەتكەن بۇل جەمىسى
ۇرپاعىڭنىڭ ەسىندە قالار ماڭگى.
You Might Also Like
-
2025 جىلعا دەيىن ستۋدەنتتەردىڭ شاكىرتاقىسى 2 ەسە ۇلعايادى. بۇل تۋرالى ق ر عىلىم جانە جوعارى ءبىلىم ءمينيسترى ساياسات نۇربەك ايتتى.
-
تۋعان ەلدىڭ تاۋەلسىزدىگى مەن بوستاندىعى ءۇشىن جانىن قيعان بوزداقتارىمىزدى ماڭگى ەستە ساقتايمىز! وتان ءۇشىن وتقا ءتۇسىپ، قان مايداننان امان ورالعان قانداستارىمىزدىڭ الدىندا باس يەمىز! قۇرمەتتى ۇلى وتان...
