InfoHub Logo

...ءبىر باي بولىپتى. ول كەدەيلەنەدى. كۇندەردىڭ كۇنىندە ولەدى. ارتىندا ازىن-اۋلاق مۇلكى، ءبىر ۇلى جانە ءبىر تۇيەسى قالىپتى. سول تۇيە بوتالايدى. الگى ۇل بوتانى ساتامىن دەپ جەتەلەپ جۇرەدى. ءسويتىپ جۇرگەندە ءبىر بايدىڭ قىزى ەسىگىنىڭ الدىنا شىعىپ:

— ءاي، جىگىتىم، انداعى بوتاڭدى ساتاسىڭ با؟ — دەيدى.

— ساتام، — دەيدى جىگىت.

ءسويتىپ، قىز بوتانى ساتىپ الىپ، جەتى جاسقا كەلگەنشە اسىراپ باعادى. ءتىل ۇيرەتەدى، ادامنىڭ ءتىلىن بىلدىرەدى. قىز بىلگىش ەكەن. تۇيەنىڭ وسە كەلە قاسيەتتى بولاتىنىن الدىن الا بايقايدى. تۇيە وتە زور، الىپ اتان بولعان ەكەن. ونى ەل «تۇيەنىڭ ءپىلى»، ال قىز «ەركە اتان» دەپ كەتەدى.

ەندى قىزعا بىرەۋ داريانىڭ ار جاعىنان كەلىپ قۇدا تۇسەدى. قىزدى ۇزاتار كۇن كەلەدى. وتىز كۇي ويىن، قىرىق كۇن تويىن جاسايتىن بولادى. باي قىزعا قالاۋ سالادى:

— قىزىم، نارعا نە ارتتىرايىن؟ — دەيدى.

قىز ايتادى:

— نە ارتتىرۋشى ەدىڭىز، ءوزىڭىز ءبىلىڭىز، بايسىز عوي. ارتقى ەلىڭىز كۇيىنگەندەي، الدىڭعى ەلىڭىز سۇيىنگەندەي ارتتىرىڭىز،— دەيدى. سوندا باي جەتى اتانعا جۇك ارتتىرادى. قىز ءوزى اسىراعان الگى ەركە اتانعا كەلىپ:

— سەن «قالىپ بارامىن» دەمە. مەن داريانىڭ ار جاعىنا ءوتتى-اۋ دەگەندە ماعان قاراي قاش. قاش تا قۋىپ جەت. مەن ءوتىپ بولعانشا سەن دە جەتەسىڭ. سەنىڭ سوڭىڭنان قۋادى. قۋعاندا دا قارا جورعامەن قۋادى. ول جەتكەنشە سەن سۋدان ءوت، — دەيدى. سونىمەن قىزدى ۇزاتادى. جەتى اتانعا «الدىڭعى ەلىم ءسۇيىنسىن، ارتقى ەلىم كۇيىنسىن» دەپ جاساۋ-جابدىق ارتادى.

ولار ۇزاپ كەتكەندە، الگى ەركە اتان قاشادى. سوڭىنان قارا جورعامەن قۋادى.

ەركە اتان سۋدان ءوتىپ كەتەدى. قارا جورعا بارىپ سۋعا تىرەلەدى دە قالادى.

ەركە اتان امان-ەسەن سۋدىڭ ارعى بەتىنە وتكەن سوڭ، قىز جۇكتىڭ ءبارىن ءبىر ەركە اتانعا ارتتىرىپ، جەتى اتاندى قايىرا سۋدان وتكىزىپ، سوڭىنداعى ەلىنە ايداتىپ جىبەرەدى. سونداعى جەتى اتاننىڭ جۇگىن جالعىز ءوزى كوتەرىپ، ەركە اتاننىڭ جولدىڭ جيەگىندەگى جانتاقتى شالىپ جەپ، جەلىپ بارا جاتقانى دەيدى.

---