ۇستاز - قوعامنىڭ تىرەگى
ءمۇعالىم دەگەن ات — قاسيەتتى ات. ءمۇعالىم دەگەن اتتان تازا ەڭبەكتى سۇيەتىن ماماندىق يەسى دەگەن ءسوزدى ۇعىنادى. ەلدىڭ ناداندىعىمەن الىساتىن ادام - ءمۇعالىم.
س. مۇقانوۆ
ۇستازدىق ەتۋ – ەڭ ۇلى ءىس. ال ۇستازدار – شىن باقىتتىلار. ۇستاز الدىنان وتپەگەن جان كەمدە-كەم. مەيلى اكىم بول، مەيلى عالىم بول، ۇستازىڭنىڭ الدىندا ماڭگىلىك قارىزدارسىڭ! ويتكەنى ونىڭ تالىم-تاربيەسىن، ۇيرەتكەن ءوقۋ-بىلىمىن جىلدار بويى ءسىڭىرىپ، دۇنيەنىڭ ءبىر كىرپىشى بوپ قالاندىڭ.
ۇستاز دەگەن كىم؟ ول – مەكتەپتىڭ جۇرەگى. احمەت بايتۇرسىنوۆتىڭ سوزىمەن جەتكىزسەك، ۇستاز - ءبىلىمدى، پەداگوگيكا، مەتوديكادان حاباردار، جاقسى وقىتا بىلەتىن ءمۇعالىم. مەن «ۇستاز» ۇعىمىن ءوز ءىسىنىڭ ۇستاسى، شەبەرى دەپ تۇسىنەمىن.
ءار مۇسىلمانعا ءىلىم ۇيرەنۋدى پارىز ەتكەن اسىل دىنىمىزدە دە ۇستازعا دەگەن قۇرمەت ءسوز بولادى. سۇيىكتى پايعامبارىمىز مۇحاممەد (س.ع.س.) حاديستەرىندە: «ءىلىم ۇيرەنىڭىزدەر، ىلىمگە قاجەتتى بايىپتىلىق پەن بايسالدىلىقتى دا قوسا ۇيرەنىڭىزدەر. سىزدەرگە ءىلىم ۇيرەتكەن كىسىنى قۇرمەتتەڭىزدەر، سىيلاڭىزدار»،- دەلىنگەن. حالقىمىزدىڭ: «ءبىر ءارىپ ۇيرەتكەنگە قىرىق جىل سالەم بەر» دەگەن دانالىعىنان ۇستازدار قاۋىمىنىڭ جوعارى باعاسىن كورەمىن.
اقىن تولەگەن ايبەرگەنوۆ:
اق وركەش الاتاۋداي اسقار ۇستاز،
ماحاببات سىرداريا ساعان دەگەن
- دەپ تەبىرەنسە، عافۋ قايىربەكوۆ:
سول كۇيى، ۇستاز كۇيى ۇلگى بولىپ،
ماڭگىلىك كوز الدىمدا قالدى مەنىڭ!
-دەپ، ۇستازىن ساعىنىشپەن ەسكە الادى. ۇلاعاتتى ۇستازدارىنا جىر ارناعان اقىندار تىزبەگى بۇنىمەن بىتپەك ەمەس. قالاي دەسەك تە، ءومىر ساپارىندا جىبەرگەن قاتەلىكتەرىمىزدى ۇستاز سەكىلدى ەشكىم كەشىرگەن ەمەس. ۇستاز ەسىمى سونىسىمەن دە ىستىق...
قوعامنىڭ تىرەگى – ۇستاز. قوعام تۇلعانى جەتىلدىرەدى، ال تۇلعا قوعامدى گۇلدەندىرەدى. سوندىقتان قوعامنىڭ دامۋى ءۇشىن ءبىلىم بەرۋ ماسەلەسى ماڭىزدى. مۇنداي جاۋاپتى مىندەت - اتى التىن ارىپپەن قالاتىن اياۋلى ۇستازدىڭ ەنشىسىندە. ەلباسى ن.ءا.نازاربايەۆ: «بۇگىنگىدەي جاھاندانۋ جاعدايىندا مەملەكەت پەن ادام وزىق، باسەكەگە ساي بولۋى ءۇشىن، ەڭ ءبىرىنشى ءبىلىم مەن عىلىم وركەندەۋى قاجەت» - دەگەن ەدى. ءبىلىم وركەندەۋى ءۇشىن پەداگوگ – يننوۆاتور مامانعا، وقۋشى – ساپالى ءبىلىم مەن سانالى تاربيەنى بىردەي سىڭىرگەن وزاتقا اينالۋى ءتيىس دەپ ويلايمىن.
ءمۇعالىمنىڭ قوعامداعى ءرولى – شاكىرتىنە ءبىلىم بەرىپ قانا قويماي، العان بىلىمدەرىن ومىردە ءتيىمدى قولدانىپ، جاراتا الۋىنا جاعداي جاساۋ. سونداي-اق، ولاردى باسەكەگە قابىلەتتى تۇلعا ەتىپ تاربيەلەۋ. جاس ۇرپاقتىڭ اتا سالتىن ارداقتار، ۇلتتىق قۇندىلىقتى ۇلىقتار وزىق ويلى بولىپ قالىپتاسۋىنا ىقپال ەتۋ.
پەداگوگ ءوز شەبەرلىگىن ۇدايى شىڭداي وتىرىپ، قوعامعا بەلسەندى قىزمەت ەتۋى قاجەت. ۇنەمى تەربەلىس، ىزدەنىستە جۇرەتىن يننوۆاتور پەداگوگ - ساباق بارىسىندا جاڭا ادىس-تاسىلدەردى قولدانىپ، جاڭاشىلدىققا بەت السا، وقۋشىلاردىڭ دا پانگە ىنتاسى، بەلسەندىلىگى ارتىپ، ىزدەنىمپازدىق، دەربەس ويلاۋ قابىلەتى داميدى.
ق ر ءبىلىم بەرۋ ءىسىنىڭ ۇزدىگى، ۇستاز اياگۇل ميرازوۆا ءبىر سۇحباتىندا : «كەز كەلگەن ءمۇعالىم ءار ساباققا دايىندىقپەن بارۋ كەرەك. ول 44 جىل بەرىپ جۇرگەن ساباعى بولسا دا، ۇتىر-نۇكتەسىنە دەيىن ءمان بەرىپ، قالاي ايتامىن، قالاي تۇسىندىرەمىن، قالاي سۇرايمىن، قالاي بىلگىزەمىن، قالاي قورىتىندىلايمىن دەپ بارۋى كەرەك. ال ساباقتان قايتىپ بارا جاتقاندا ەسەپ بەرىپ، كەيدە كوڭىل كۇيىڭ شالقىپ بارا جاتاسىڭ. ساباقتىڭ ءبارى جاقسى وتسە، تۇسىنسە، ءبىر جىلى ءسوز ەستىسەڭ، سوعان شالقيسىڭ. ال بىردەمە دۇرىستاۋ بولماي جاتسا، ءىسىڭنىڭ ناتيجەسىن كورمەسەڭ شارشايسىڭ. كورسەڭ – شارشاعانىڭدى ۇمىتاسىڭ»،- دەگەن بولاتىن. اكادەميكتىڭ بۇل ءسوزى مەنىڭ دە ىشكى ويلارىممەن ەگىز ىسپەتتى...
سان جاستىڭ قامىن شەرتەسىڭ،
تاعدىرىن ويلاپ تولعانىپ.
ءار ءۇيدىڭ ءبىر-بىر ەركەسىن
ۇيرەتتىڭ ءوزىڭ قولعا الىپ.
ۇستازسىز جاندا سونبەك كۇن،
شاكىرتسىز ءومىر – سۋسىز جەر.
كورىنبەس عاجاپ ەڭبەكتىڭ
بەينەتىن كەشىپ جۇرسىزدەر.
جۇرەكتە تۇرار جالقى ءۇنىڭ،
جانىمنان جالىن جىگەر كۇت.
ۇستازىم، سەنىڭ ءار كۇنىڭ،
ءار ءساتىڭ تۇرعان ءبىر ەرلىك!
- دەگەن سوزدەردى پوەزيا پاديشاسى ف.وڭعارسىنوۆا پاش ەتتى. كەشەگى الاش ارىستارىنىڭ جالعاسى رەتىندە وسىنداي كيەلى ماماندىقتىڭ تۇتقاسىنان ۇستاعانىم ءۇشىن كەۋدەمدى قۋانىش كەرنەيدى. اۋەلى اللاعا ارقا سۇيەپ، سونان سوڭ اباي اتامىز ايتپاقشى، وزىمە سەنىپ باستاعان ءمۇعالىم اتتى مارتەبەلى ماماندىقتا جۇرگەنىمە بيىل بەسىنشى جىل. مەن ءوزىمدى بولاشاقتا يننوۆاتور پەداگوگ، مايتالمان مامان، ۇلاعاتتى ۇستاز رەتىندە كورگىم كەلەدى. بۇلاق كورسە كوزىن اشاتىن، تەر توگىپ ەڭبەك ەتەتىن ۇستاز بولۋدى جازسىن اللام!
ورازبەك قىزى گۇلجانات
ماڭعىستاۋ وبلىسى، ماڭعىستاۋ اۋدانى، شەتپە سەلوسى.
You Might Also Like
-
جوشى حاننىڭ ماڭدايىنا بىتكەن جالعىز ۇلى قۇلان اۋلاۋعا قۇمار ەكەن دەيدى. «قۇلان اۋلاۋ قويان اۋلاۋ ەمەس، قاۋىپ-قاتەرى كوپ» دەپ حان ونى اڭعا جالعىز جىبەرمەيدى ەكەن. كۇندەردىڭ كۇنىندە حانزاد...
-
...ءبىر باي بولىپتى. ول كەدەيلەنەدى. كۇندەردىڭ كۇنىندە ولەدى. ارتىندا ازىن-اۋلاق مۇلكى، ءبىر ۇلى جانە ءبىر تۇيەسى قالىپتى. سول تۇيە بوتالايدى. الگى ۇل بوتانى ساتامىن دەپ جەتەلەپ جۇرەدى. ءسويتىپ جۇرگەند...
