جەتىگەن
ەرتە زاماندا ءبىر كوپتى كورگەن كونە كوز قارتتىڭ جەتى ۇلى بولىپتى. جەتەۋى دە ەلگە قورعان، جۇرتقا پانا بولعانداي اتپال ازاماتتار ەدى دەيدى. ول ءبىر، جاۋگەرشىلىگى كوپ، تىنىشسىز زامان بولسا كەرەك. كۇندەردىڭ ءبىر كۇنىندە الاوكپە بولىپ جاۋشى جەتىپ، ەل شەتىنە دۇشپان اسكەرىنىڭ تۇياق ىلىكتىرگەنىن حابارلايدى. سودان، كونە كوز قارتتىڭ جەتى ۇلى مۇزداي ساۋىت قۇرسانىپ، جاۋدىڭ الدىن الۋعا اتتانادى.
سايلانىپ كەلگەن جاۋدىڭ جاساعى مىقتى، جاراعى بەرىك بولاتىن ادەتى. دۇشپان جاساعىمەن ارادا قاندى شايقاس باستالادى. ەل ىشىنەن قول جيناپ، جاۋعا قارسى شىققان جەتى جىگىت يىقتاسا ءجۇرىپ ۇرىس سالىپ، جويقىن ەرلىكتەر كورسەتەدى. جاۋدىڭ بەتىن قايتارادى. ءبىراق، شىعىنسىز سوعىس بولعان با، وسى شايقاستا اعايىندى جەتى جىگىت تە ەرلىكپەن قازا تابادى.
قارالى حابار قارت اكەگە جەتەدى. جەتى بوزداعىنان بىردەي ايىرىلعان قارتتىڭ قايعىسىندا شەك بولمايدى. ەش جۇبانىش تاپپاي، جانى مۇجىلە بەرەدى. ارادا كۇندەر، ايلار وتسە دە، جەتى ۇلىنىڭ قىلىق-قاسيەتى ساناسىندا جاڭعىرىپ، جانىن جەگىدەي جەۋمەن بولادى. ابدەن شاراسى تاۋسىلىپ، شىدامى ۇزىلگەن قارت كۇندەردىڭ كۇنىندە ءبىر اسپاپ جاسايدى دا، جەتى ۇلىنىڭ رۋحىنا ارناپ جەتى ىشەك تاعادى. سونسوڭ، ءار بالاسىنىڭ قىلىق قاسيەتىن ەلەستەتىپ وتىرىپ جەتى كۇي شىعارادى. سول جەتى كۇيدى پەرزەنتىندەي تەربەپ، قالعان ومىرىنە جۇبانىش ەتىپ وتەدى.
جەتىگەن اسپابى وسىلايشا دۇنيەگە كەلسە كەرەك. ال، قارتتىڭ جەتى ۇلىنا ارناپ شىعارعان جەتى كۇيى ەل ىشىنە «قاراعىم»، «قانات سىنار»، «وت سونەر»، «باقىت كوشتى»، «كۇن تۇتىلدى»، «قۇسا»، «شامىرقان» دەگەن اتپەن تاراپ ەدى دەيدى.
You Might Also Like
-
ءبىلىم بەرۋ جۇيەسىندە كوپتەگەن وزگەرىستەر بولۋدا، ءبىراق جالعىز وزگەرمەس دۇنيە، ۇستاز – وقۋشىلار الدىندا ءبىلىم بەرۋدىڭ ناعىز شەبەرى. ناعىز شەبەر ءوزىنىڭ كۇشتى جاقتارىنا سەنەدى، ءبىلىم بەرۋ جۇيەسى...
-
بۇلانجىگىت باسىندا كۇيشى ەمەس ەكەن. ول تالاپتى، باتىر بولامىن، ەلدى جاۋدان قورعايمىن دەگەن ويى بار جىگەرلى جاس جىگىت ەكەن.
