InfoHub Logo

مىڭ توعىز ءجۇز ونىنشى جىلدارى گۋبەرناتور سەمەي حالقىنا مىناداي جارلىق حابارلاعان:

— سەمەيدىڭ بايلارى، ساۋداگەرلەرى، مىرزالار جانە قىمىز، پيۆو ساتۋشى ايەلدەر، ءارتۇرلى اسپاپتا وينايتىن مۋزىكانتتار! الداعى دەمالىستا ارالعا شىعىڭدار، وتە قىزىقتى جاڭالىق، تاماشا بولادى. تاماشادان قالماڭدار، كەدەيلەر بارماسا دا بولادى، — دەپتى.

حالىق دەمالىس بولعانشا شىداي الماي اسىعىپ، نە بولار ەكەن دەپ لوبلىپ، جاياۋ ساۋداگەرلەر قالتاسىنا بەس-ون سومنان سالىپ، دايىندالا باستايدى. قايىقپەن وتەتىن ارالعا كوپىر سالىنىپتى. ەلدىڭ كۇتكەن دەمالىس كۇندەرى دە جەتتى. ەل اعىلىپ ارالعا قاراي كەتە باستادى. ەلمەن ىلەسىپ، مەن دە ارالعا باردىم. حالىق جينالىپتى. سىرا ساتۋشى ءبىر جەرگە، قىمىزشى ءبىر جەرگە، مۋزىكانتتار ءبىر جەرگە ءبىر توپ بولىپ ولار تۇر. بيىك ءتورت ستولدى ءبىر جەرگە قويىپ، ۇستىنە كىلەم جايىپ، ونىڭ ۇستىنە ءشايى كورپەلەر توسەپ قويعان.

ەر-ايەلدەر قۇرمەتتەپ قازاقتىڭ كەلىنشەگىن اكەلدى. ستول قاسىنا كەلىپ تۇرىپ، حالىقپەن سالەمدەستى، سۇڭعاق بويلى، ءمۇسىندى، اققۇبا، قىزىل شىرايلى، كەلبەتتى، ۇلبىرەگەن جاس كەلىنشەك. ۇستىندە تورعىن كويلەك، شەتىنە وقا، قۇندىز ۇستالعان قارا كەمزال، باسىندا اق جىبەك ءشالىسى بار. اياعىندا كوكساۋىرلاپ كۇمىستەلگەن كەبىس-ماسى، كەبىسىن شەشىپ، ستول ۇستىنە شىعىپ، كورپەنىڭ ۇستىنە وتىرعىزدى. جانىندا ەكى ىشەكتى ءبىر دومبىراسى بار جانە جەتى ىشەكتى ءبىر دومبىراسى بار. ءشالىسىن باسىنا توگىلتە بۇركەنىپ كەلىنشەك وتىر. گۋبەرناتور كەلدى. قاسىندا ءتورت پاليسەيى بار. حالىق دۇرلىگە كوتەرىلىپ، تاعزىم قىلدى.

ساعات وننىڭ شاماسى. گۋبەرناتور ورنىنان تۇرىپ، حالىققا كەلىنشەكتى تانىستىردى.

— بۇل كىسى بىزگە كەلگەن قوناق. جەتىسۋدان كەلگەن قازاقتىڭ دارىندى مۋزىكانتى. ءبىزدىڭ سەمەي مۋزىكانتتارىمەن سىنعا تۇسۋگە ادەيى كەلىپتى. سىزدەر ءقازىر وسى جارىستى كورەسىزدەر، — دەدى دە كەلىنشەكتەن سۇرادى، — بۇل كۇي تارتىسۋدىڭ ءتارتىبى قالاي وتپەك؟ — دەدى.

كەلىنشەك:

— بىلاي بولادى: اۋەلى ءسىزدىڭ ءبىر مۋزىكانتىڭىز ەكى-ۇش كۇي ويناسىن، ودان كەيىن ونىڭ كۇيىن مەن ورىندايمىن. سودان كەيىن مەن ءۇش كۇي وينايمىن، ونى ءسىزدىڭ مۋزىكانتىڭىز ورىنداۋ كەرەك. ەگەر ءبىر-بىرىمىزدىڭ تارتقان كۇيىمىزدى ءبىرىمىز ورىنداي الماساق، ول جەڭىلگەنىمىز.

گۋبەرناتور مۋزىكانتتارىنا ۇعىندىردى. سودان جارىسقا كىرىستى. ءبىرىنشى بولىپ ءبىر ورىس مۋزىكانتى بايان وينادى. كەرەمەت وينادى. ءۇش كۇي تارتتى. ودان كەيىن كەلىنشەك ەكى ىشەكتى، جەتى ىشەكتى دومبىرامەن الگى مۋزىكانتتىڭ كۇيىن بۇلجىتپاي تارتىپ بەردى. ءوزى ءۇش كۇي تارتتى، ونى بايانيست ءبىرىن دە تارتا المادى. ونى جەڭىلدىڭ دەپ بىلاي شىعارىپ قويدى. قازاق جىگىتتەرى قانى قىزىپ، ىشتەرىنەن ءارۋاققا سيىنىپ تۇر «و، قۇدايلاپ». گيتار ويناۋشى، ماندالشى، بالالايكا، پيانينا ويناۋشىلار ءبارى جەڭىلىپ شىقتى. سودان كەيىن سكريپكاشىمەن جارىستى. سكريپكاعا ءتورت كۇي وينادى. ونى دا كەلىنشەك تارتىپ بەردى. سودان كەلىنشەك ءتورت كۇي ويناپ ەدى، سكريپكاشى ونىڭ ەكەۋىن وينادى، ەكەۋىن ويناي المادى.

سونىمەن سەمەي مۋزىكانتتارى جەڭىلدى. «بايگە جەتىسۋلىق مۋزىكانتتىكى» دەپ الدىنا داستارقان جايدىرىپ، گۋبەرناتور ءجۇز سوم سالدى.

— ال، مىرزالار، بايگە سىي قوناقتىكى بولدى. بەس سومنان كەم تاستاماڭدار، — دەدى، — مىرزالار مۇمكىن ارتىق تاستار، ول ءوزد ەرىنىڭ مىرزالىعىنا بايلانىستى، — دەدى. قازاقتار رازى بولعاندىقتان، قالتالارىنداعى بارىن تاستاعاندار بولدى. كەلىنشەكتىڭ الدىندا اقشا توبە بولىپ ءۇيىلىپ قالدى.

وسىنىڭ ىشىندە بولعان ورتا جاستاعى ماقانجان ايتتى:

— بۇل اتى، داڭقى شىقپاعان قانداي كۇيشى! كەلىنشەكتىڭ ەكى قولىندا پەرچاتكا، ساۋساعىنىڭ ۇشى جەزدەن، — دەدى.

---