InfoHub Logo

سەمەي وبلىسى، جارما اۋدانى، سىبان دەگەن ەلدە ناۋرىزباي دەگەن كىسىنىڭ اقبىلەك دەگەن سۇلۋ قىزى ەلقوندىدا جاڭاباي دەيتىن بايدىڭ كەلىنى ەكەن.

جازدىڭ كۇنى كەلىندى اكەلۋگە ون شاقتى كىسى بارادى. قۇدالاردىڭ ىشىندە باسشى اعامەل اقساقال نەشە كۇن ويىنىن، تويىن ىستەپ، ەندى اتتاناردا اۋىلدان ەكى جۇزدەي ادام شىعارىپ ءبىر جەرگە توقتاتىپ، قىز-قوتاندار كورىسىپ، قوشتاسىپ قايتتى. ەكىنشى جەرگە تاعى توقتاتىپ، ءبىر توپ ادام كورىسىپ، قوشتاسىپ قايتىستى. ءۇشىنشى جەرگە توقتاعاندا، ماتاي قۇدالاردىڭ باستىعى اعامەل اقساقال:

— ەي، حالايىق، جول الىس، كەشىگەمىز. قالاتىندارىڭىز وسى ارادا قالىڭىزدار. ەرىپ باراتىندارىڭ بولسا، بىرگە جۇرىڭدەر. ەندى ەش جەرگە توقتامايمىز، — دەپ، كەلىنشەكتىڭ اتىن جەتەكتەپ جونەلە بەرگەندە، تورى جورعا مىنگەن، ادەمى كيىنگەن، كۇمىس تۇرمان تاعىنعان ءبىر مىرزا قۇدالاردىڭ الدىن كەس-كەستەپ بوگەپ:

— توقتاڭدار، قارىنداسقا قوشتاسىپ ايتار ءسوزىمىز بار، — دەپ تۇرىپ الدى.

— ال، ايتا عوي، — دەگەن اعامەل مىرزاعا:

— تەنتەك ماتاي الىپ كەتتى-اۋ جارىمىزدى،
جاس تۇرعاي قايتارماۋشى ەد كارىمىزدى.
بارعان جەردە بايبىشە بولعىرىم-اي،
ءبىر-بىر الدىڭ قوينىڭا ءبارىمىزدى، — دەگەن ەكەن.

سوندا اعامەل اقساقال ءتۇسىنىپ:

— وي، مىنا مىرزانىڭ ءبىزدىڭ كەلىندە وكپەسى بار ەكەن عوي. ەكەۋىن دە اتتان تۇسىرىڭدەر. تاتۋلاستىرىپ اتتاندىرايىق، — دەپ قىزدىڭ قولىنداعى التىن ساقيناسىن ەسكەرتكىش ءۇشىن جىگىتكە بەرىپ، جىگىتتىڭ تورعىن ورامالىن قىزعا بەرىپ، بىر-بىرىنەن كەشىرىم سۇراتىپ، تاتۋلاستىرىپ، كورىستىرىپ، قوشتاستىرىپ اتتاندىرىپتى.

اڭگىمە بىلاي بولعان ەكەن: مىرزا اقبىلەككە ءسوز ايتىپتى. اقبىلەك قابىلداماعان. مىرزا: «قاپ، سەن قىزدى حالىق الدىندا، قايىن جۇرتىڭنىڭ الدىندا ءبىر ماسقارا قىلارمىن» دەپ، دايىندالىپ كەلىپ سوقتىققان ەكەن. ونى اعامەل اقساقال ءتۇسىنىپ، ەكەۋىن تاتۋلاستىرىپ، كەلىننىڭ دە ابىرويىن ساقتاپ قالعان.

بۇل — سيرەك كەزدەسەتىن اقىلدىلىق.

---