InfoHub Logo

ەشنارسە قۋانتپايتىن، ەشنارسە قىزىق ەمەس بولاتىن كەزدەر بولادى. ءدال سول كەزدە ومىرىڭە وزگەرىس ەنگەنىن قالايسىڭ. ەرەكشە بىرنارسە بولسا ەكەن دەيسىڭ. سول نارسە انىق جەتىسپەي تۇرعان كەزدەر بولادى. ول نە نارسە ەكەنىن دە بىلمەيسىڭ. ءبىراق، ول سەنىڭ الەمىڭدى سەلت ەتكىزەر دۇنيە بولۋى كەرەك. ارينە، مۇمكىن ەمەس نارسەگە كىم قولىن سوزسىن. ادامعا كۇلكى سىيلاۋ ءۇشىن قاراپايىم نارسەلەردىڭ ءوزى جەتكىلىكتى.ادامداردىڭ ءبارى قاراپايىم تەك ونى وزدەرى كۇردەلەندىرىپ الادى. ومىردە ءبىر عانا قاعيدا. بار ما بار، جوق پا جوق! بولدى. باسقاسى سەنە المايمىن، كونە المايمىن، قابىلداي المايمىن، ولاي بولۋى مۇمكىن ەمەس، ءتىپتى دە ولاي ەمەس دەگەن ءوزىمشىل ويدان شىعاتىن الدامشى دۇنيەلەر. ادام ءوزى ۇناتقان ادامعا نەمەسە زاتقا قول جەتكىزگىسى كەلسە ءبارىن ىستەپ باعادى. ءبارىن! ونىڭ ىشىندە ساناعا سىيمايتىن اقىماقتىقتار دا بولارى انىق. ءدال وسى جاعدايدى ەكىنشى قىرىنان ويلاپ كورگەن دە دۇرىس شىعار. بالكىم، ول ادام نەمەسە الگى زات ءاۋ باستان مۇلدەم وزگە بىرەۋ ءۇشىن جاراتىلعان بولار. بۇل شىندىقتى قابىلداۋ قالاۋىنا جەتە الماعان ادام ءۇشىن قيىنعا سوعادى. ول باستاپقى ويىنان باس تارتپايدى. ءبىراق، ۋاقىت جاردەمشى ءبارىن ءوز ورنىنا ءوزى - اق قويىپ بەرەدى. ءبارىن ءتۇسىنۋ ءۇشىن مۇمكىن ءبىر جىل، مۇمكىن ون جىل، مۇمكىن ءومىرىنىڭ سوڭىنا دەيىن ۋاقىتى كەتەر. سوڭعىسى بولسا وكىنىشتى. قولىمىز جەتپەگەن دۇنيەلەر ءۇشىن ەش مۇڭايۋدىڭ قاجەتى جوق. جانە ولارعا كەتىرگەن ۋاقىتتار ءۇشىن دە. ومىرىمىزدە ورىن العان ءاربىر وقيعا، سول كەزدەگى سەزىنگەن سەزىمىمىز، تۇيگەن ويىمىز، ودان العان ساباعىمىز ءبارى دە ۇلكەن ومىرگە، بۇگىنگىدەن دە جاقسى ومىرگە باستار تاجىريبە بولماق. سول ءۇشىن دە ايتارىم، وتكەنگە وكىنبەڭىزدەر، قازىرگىنىڭ ءقادىرىن بىلىڭىزدەر، بولاشاققا ۇلكەن ماقساتتار قويىڭىزدار! سوندا ءبارى دە جاقسى بولادى.

مۇقانعالي اقەركە

---