InfoHub Logo

جۇكتىلىكتىڭ العاشقى 12 اپتاسىنا دەيىن بولاشاق بالانىڭ مۇشەلەر جۇيەسى قالىپتاسا باستايدى. 6 اپتالىق ۇرىقتىڭ دەنە ۇزىندىعى 4-6 مم-گە جەتىپ، بالانىڭ ميى، ومىرتقاسى، ورتالىق جۇيكە جۇيەسى، كوزى، قۇلاعى، سوعا باستاعان جۇرەگى ورنالاسقان كەۋدە قۋىسى، قول-اياعى، قان اينالىم جۇيەسى قالىپتاسىپ، دامي باستايدى. بۇل ۋاقىتتا بولاشاق انا دارى-دارمەك ىشپەۋى قاجەت. ەگەر ونى قابىلداۋعا مۇقتاجدىق تۋا قالسا، ەمدەۋشى دارىگەر مولشەرىن انىقتاپ بەرۋى شارت.

جالپى جۇكتىلىكتىڭ بۇل مەرزىمىندە ۇرىقتىڭ جۇيكە تۇتىگىندە كەمىستىك بولماۋ ءۇشىن تاۋلىگىنە 4 مگ فوليي قىشقىلىن قولدانعان ورىندى.

1 سم-لىك، ىشكى مۇشەلەرى قالىپتاسىپ بىتكەن ۇرىق 8 اپتالىق مەرزىمدە عانا بولادى. ال ءسىزدىڭ اعزاڭىزعا ءتان تاماقتان سوڭ قۇسۋ، كەز كەلگەن نارسەدەن جيىركەنۋ سياقتى قۇبىلىستار وسى شاقتا بوي كورسەتەدى. لوقسۋىڭىز از مولشەردە ىستىق ەمەس، ءيىسسىز اسپەن تاماقتانعانىڭىزعا قاراماستان تيىلماسا، دارىگەرگە قارالىڭىز.

12 اپتالىق ۇرىقتىڭ ىشكى مۇشەلەرى تولىق قالىپتاسىپ، ءوز قىزمەتتەرىن اتقارا باستايدى. بۇل كەزدە ءسابيدىڭ جىنىسىن انىقتاۋ مۇمكىندىگى دە تۋادى. نەگىزىنەن 46حح - قىز، 46حۋ - ۇل دەپ ءسابيدىڭ جىنىسىن انىقتاۋ كۇردەلى پروسەسس. بۇل ماسەلە كاسىبي بىلىكتىلىگى جوعارى مامان مەن ارناۋلى اپپاراتۋرالاردى قاجەت ەتەدى. 16 اپتالىق ۇرىقتىڭ بالا جولداسى وسى كەزدە ءوز دامۋىن ءتامامدايدى جانە سابيگە قاجەتتى زاتتاردى تاسىمالدايدى.

جۇكتىلىكتىڭ 18-20 اپتاسىندا ءسىزدىڭ ءسابيىڭىزدىڭ بويى 25 سم، ال سالماعى 200 گ جەتەدى دە، جاتىرىڭىز كىندىك تۇسىمەن دەڭگەيلەس بولادى. ناتيجەسىندە ءسىز ءسابيىڭىزدىڭ قيمىلداعانىن ايقىن سەزىنەسىز. وسى ساتتەن باستاپ ءسىز ونى- مەن سويلەسۋدى، بىرلەسە سىرلى سازداردى تىڭداۋدى داعدىعا اينالدىرىڭىز. ءسابي مۇندايدى ەرەكشە سەزىمتالدىقپەن قابىلدايدى. ال ءسىز وسى كەزدە ونىڭ جۇرەگىنىڭ سوعىسىن ارنايى تۇتىك (ستەتوسكوپ) ارقىلى ەستي الاسىز.

27-28 اپتا جۇكتىلىكتىڭ ءۇشىنشى تريمەسترى بولىپ ەسەپتەلەدى. بۇل كەزدە ءسىزدىڭ سالماعىڭىز ارتىپ، گەموگلوبينىڭىز كەمي تۇسەدى، جاتىرىڭىزدىڭ كولەمى ۇلعايىپ، سۇيىقتىعى مەن قانى مولايادى. ال ءسابيىڭىزدىڭ بويى 34 سم، سالماعى 900 گ ءقۇراماق. بۇل مەرزىمدە تۋىلاتىن سابيلەردىڭ ءومىر ءسۇرۋى مۇمكىن، ءبىراق وكپە-باۋىرى تولىق جەتىلمەيدى جانە ىندەتكە قارسى يممۋندىق جۇيەسى ءالسىز بولادى.

وسى ۋاقىتتان باستاپ، ءسىز جانە ءسىزدىڭ جاقىندارىڭىز بالانىڭ دۇنيەگە كەلۋىنە ارنايى وتكىزىلەتىن ساباقتارعا قاتىسىپ، دايىندالا بەرۋلەرىڭىز كەرەك. ءبۇل ساباكتاردا تۋعانعا دەيىنگى تاماقتانۋ، بەلسەندى ىس-ارەكەت، ەمشەكپەن ەمىزۋ، بوسانعاننان كەيىنگى كۇتىنۋ، شاقالاققا قاراۋ سياقتى ماسەلەلەردەن حاباردار بولا الاسىز.

قازىرگى كەزدە جۇكتى ايەلدەرگە 30 اپتادان باستاپ 126 كۇنگە بالا باعۋ دەمالىسى بەلگىلەنەدى. جۇكتىلىك كەزەڭىندە سىزگە بوسانۋ ۇيىنە كىممەن، قالاي باراتىنىڭىزدى، قاي جەردەن بوساناتىنىڭىزدى شەشىپ قويعانىڭىز دۇرىس. 32-33ء-شى اپتادا بالانىڭ ءقۇرساق ىشىندەگى جاتىسى باستىڭ تومەن قاراي ورنالاسۋىمەن سيپاتتالادى. بۇل كەزدە ءسابي ءسىزدى بىردە باۋىرىڭىزدان، ەندى بىردە بۇيىرىڭىزدەن تەۋىپ، ءالسىن-السىن مازالايدى. بالا بويى 40 سم، ال سالماعى 1700 گ بولىپ، ءسىزدى تەز شارشاتپاق. سوندىقتان الدىن-الا بوسانىپ قالعىڭىز كەلمەسە، كوبىرەك دەمالىڭىز، از مولشەردە ءجيى-جيى تاماقتانىپ تۇرىڭىز.

جۇكتىلىكتىڭ بۇل مەرزىمىندە ءسىز، اسىرەسە تۇنگى ۋاقىتتاردا اجەتحاناعا ءجيى شىعاتىن بولاسىز. جۇكتىلىكتىڭ 37ء-شى اپتاسىندا بوسانۋدىڭ جارشىسى،ياعني ايتولعاق بەلگىلەرى پايدا بولادى. بۇل بەلگىلەر: جاتىر ءتۇبى دەڭگەيىنىڭ تومەن ءتۇسۋى، ءسۇيىقتىقتىڭ جيىرەك ءبولىنۋى، كەڭ تىنىستانۋ، جاتىردىڭ تەمەنگى بولىگىنە ءسابيدىڭ تىرەلۋى، جاتىردىڭ قوزۋى، جۇكتى ايەلدىڭ ءالسىن-السىن ءىشىنىڭ تومەنگى بولىگىندە اۋىرسىنۋدى سەزىنۋى بايقالادى. بالاڭىزدىڭ سالماعى 3 كگ-عا جۋىق، بويى 48 سم-دەن اسادى.

ال 38-40 اپتا ارالىعىندا ءسىز «نەگە بوسانباي جاتىرمىن؟» دەگەن كۇدىكتى وي شىرماۋىنا قالۋىڭىز مۇمكىن. قاتتى كوبالجىماڭىز، ويتكەنى بوسانۋ ۋاقىتى ءار ايەل ءۇشىن ءار ءتۇرلى بولماق. ءسىزدىڭ اعزاڭىزدىڭ ەرەكشەلىگىنە ساي تولىق دامىپ جەتىلگەن ءسابي 37-40 اپتا ارالىعىندا جارىق دۇنيە ەسىگىن اشۋى ءتيىس. «تۋىلاتىن ءسابي ايتەۋىر تۋىلادى» دەپ تە سالقىندىلىق تانىتپاڭىز، تۋۋ مەرزىمى جاقىنداعاندا ءوزىڭنىڭ قارالاتىن دارىگەرىڭە بارىپ نەمەسە حابارلاسىپ، قوسىمشا ماعلۇماتتار الىڭىز. ءوز كوڭىل-كۇيىڭىزدى، بالاڭىزدىڭ قيمىلداۋىن، قىنابىڭىزدان  كەلەتىن سۇيىقتىقتى باقىلاڭىز.

         ن. ق. سەيىتمامبەتوۆا
 قىزىلوردا مەديسينا كوللەدجىنىڭ جوعارى ساناتتى وقىتۋشىسى، اكۋشەر-گينەكولوگ

---