جۇرە، سەكىرە جانە كەدەرگىلەردەن قارعىپ وتە الاتىن تۇنعىش روبوت
اقش سولتۇستىك-شىعىس ۋنيۆەرسيتەتىنىڭ ينجەنەرلەرى جەردە ءوزىن ەركىن سەزىنىپ، قاجەت بولسا اۋەگە دە كوتەرىلە الاتىن روبوتتى جاساپ شىعاردى. ول كەدەرگىلەردەن وتە الادى جانە ءسۇرىنىپ كەتسە دە، تەپە تەڭدىكتى ساقتاي الادى.
جاسالىپ شىققان قۇرىلعىعا LEONARDO دەگەن اتاۋ بەرىلدى. روبوت LEg ON Aerial Robotic Drone، ياعني «اياعى بار جانە ۇشا الاتىن روبوت-درون» اببريەۆياتۋراسىنىڭ ارقاسىندا ۇلى فلورەنسيالىقتىڭ اتتاسى بولىپ شىقتى.
قازىرگى زاماندا جەردە جۇرەتىن روبوتتارمەن دە، ۇشقىشسىز كوپتەرلەرمەن دە، ەشكىمدى تاڭ قالدىرا المايسىڭ، الايدا، ادەتتە ينجەنەرلەر «جورعالاۋ ءۇشىن دۇنيەگە كەلگەن سامعاپ ۇشا الماق ەمەس» قاعيداتى بويىنشا قارەكەت قىلادى. دەيتۇرعانمەن، ەكى اياقتى روبوتتارعا جولىندا تۇرعان كەدەرگى پروبلەماعا اينالۋى مۇمكىن. ونىڭ ۇستىنە ولار ءسۇرىنىپ جىعىلۋى نەمەسە ولاردى جەل قۇلاتىپ كەتۋى مۇمكىن.
«لەوناردو» قۇلاۋدى ۇشۋعا ۇلاستىرىپ، بۇل پروبلەمانى ادەمى جايعاي الادى. بۇلاي ىستەۋگە ونىڭ دەنەسىنىڭ ەكى بۇيىرىندە ورناتىلعان كەز كەلگەن باعىتتا جۇرگىزە الاتىن كىشىگىرىم ەكى ۆينت كومەككە كەلەدى. روبوت ەكى اياعىمەن قوزعالادى جانە ونىڭ بويىنىڭ ۇزىندىعى 0،8 مەتر. وسىنداي كوپكورىم گاباريتتەرى بولعانىنا قاراماي، ونىڭ سالماعى بارى-جوعى 2،7 كيلوگرامم عانا. بۇنداي جەڭىل سالماققا LEONARDO نەگىزىنەن كومىرتەكتى تالشىقتاردان جاسالعاندىقتان قول جەتىپ وتىر.
ءوزىنىڭ قوزعالتقىشتارىنىڭ ارقاسىندا «لەوناردو» اۋەگە كوتەرىلىپ، جولىنداعى كەدەرگىنىڭ ۇستىنەن ۇشىپ ءوتىپ، كەدەرگىنىڭ ارعى جاعىنا قونا الادى. سەكىرۋ سەكىلدى الدەبىر نارسەنى ىستەيدى. بۇنىڭ ۇستىنە ول اياق استىنان قۇلاي باستاسا، تەپە تەڭدىكتى ۇستاپ قالۋعا دا قاۋقارلى.
You Might Also Like
