InfoHub Logo

قۇلاققا ۇرعان تاناداي تىنىشتىقتا كۇن جاڭا عانا شىعىپ، سارى التىن سارعالداق گۇلدەرىنىڭ حوش يىسىنە لىقىلداعان كوگىلدىر تۇمان ارال تاستارىنان كوككە كوتەرىلىپ تۇرعان كەز.

اسپاننىڭ اقشىل كۇمبەزىنىڭ اياسىندا، ماناۋراعان قاپ-قارا سۋ جايقىنىنىڭ قاق ورتاسىندا جاتقان ارال كۇن ءتاڭىرىنىڭ الدىنا شالعان قۇرماندىققا مەزگەيدى.

جۇلدىزدار جاڭا عانا سونگەنمەن، ءبىراق ۇلبىرەگەن ۇلپا بۇلت ۇستىندە، كۇڭگىرت اسپاننىڭ مۇزداي شىرقاۋىنا بولەنگەن اپپاق شولپان ءالى دە جالت-جۇلت ەتەدى؛ ءسال قىزعىلت شاپاققا بويالىپ، كۇننىڭ العاشقى شۇعىلاسىمەن ەپتەپ قانا عايىپ بوپ بارا جاتقان بۇلتتىڭ مۇلگىگەن تەڭىز ايدىنىنا تۇسكەن ساۋلەسى كوكپەڭ-كوك سۋ تۇڭعيىعىنان ءجۇزىپ شىعا كەلگەن مەرۋەرتتەن اۋماي قالعان.

كۇمىستەي شىققا شىلانىپ، اۋىر تارتقان ءشوپ پەن گۇل شەشەكتەرى كۇنگە قاراي بوي تۇزەگەندە، ءشوپ باسىندا مولتىلدەگەن ءموپ-مولدىر شىق مونشاقتارى پىسىناعان ۇيقىدان تەرلەپ-تەپشىگەن جەر بەتىنە ساپىرىلا ساۋىلداپ جاتىر. سول مونشاقتاردىڭ جەرگە تۇسكەندەگى سىلدىرىن ەستىگىڭ كەلگەنمەن، ءبىراق ونى قۇلاعىڭ شالا الماي قاپا دا بولاسىڭ.

ءدۇر سىلكىنگەن قۇستار ءزايتۇن جاپىراعى اراسىندا ۇشىپ-قونىپ، كۇيگە سايراعاندا، كۇن نۇرىمەن ۇيقىدان ويانعان تەڭىزدىڭ كۇركىرەي كۇرسىنگەن لەبى ىلديدان تاۋعا قاراي ورمەلەپ جاتقان ەدى.

سوندا دا بولسا — جىم-جىرت، جۇرت ءالى دە ۇيقىدا. جاساڭعىراعان تاڭەلەڭدە گۇل مەن ءشوپتىڭ جۇپار ءيىسى دىبىستان دا بەتەر سايراي ەسىپ تۇرعان بولاتىن.

كوكپەڭ-كوك تەڭىز تولقىنى شىمقاعان قايىق سىقىلدى، ءجۇزىم وسىمدىگىنە شىرمالعان اپپاق كاۋكەنشىكتىڭ ەسىگىنەن قولى مايمىلدىڭ قولىنشا سورايىپ، ءوزى دانىشپانشا تاقىر باستى كەلگەندە، ۋاقىتتىڭ ۋماجداۋىنان بەت-الپەتىنىڭ بولبىراعان اجىمدەرىنەن كوزدەرى ءتىپتى كورىنبەي دە قالعان، جۇرتتان ساياق، سالت تۇراتىن، قاۋساعان قارت ەتتورە چەككو كۇننىڭ قارسى الدىنان شىققان ەدى.

تۇكتى، قوشقىل قولىن ماڭدايىنا باياۋ عانا اپارعان ءوزى الاۋراي باستاعان اسپانعا ۇزاق قاراپ الىپ، سودان سوڭ اينالاسىنا ءبىر كوز جىبەرىپ قويدى؛ ونىڭ كوز الدىنداعى ارالدىڭ كوكشىل-سۇرعىلت تاستارىنىڭ ءۇستى جايىپ تاستاعان يزۋمرۋد پەن التىنشا قۇلپىرا قۇبىلىپ، قىزعىلت، سارى، قىرمىزى گۇلدەر جايناپ تۇرعان ەدى؛ قارا-قوشقىل بەت-الپەتى جايدارى جىمىڭمەن ءدىر ەتە تۇسكەن قارت جۇپ-جۇمىر، اۋىر باسىن ماقۇلداي ءبىر يزەپ قويدى.

سالماعىن سۇيەمەلدەگەندەي، بەلىن ءسال بۇگىپ، اياعىن الشيتا باسقان ونىڭ توڭىرەگىندە اتىپ كەلە جاتقان تاڭ بارعان سايىن دۋىلداپ، ءجۇزىم جاپىراقتارى جارقىراي جالتىلداپ، ۆيۋركا مەن شىمشىقتار شىرىلداي شىقىلىق اتىپ جۇرگەن بولاتىن؛ قارا بۇلدىرگەن مەن لومونوس قوپاسىندا، سۇتتىگەن بۇتالارىندا بودەنەلەر بىتپىلداقتاپ، الدەقايدا، اۋماعان نەاپوليتان جىگىتى سىقىلدى، كەربەز ءارى قامسىز كەلگەن قارا شىمشىقتار ىسقىرىپ قويادى.

قارت چەككو ۇيىعان ۇزىن قولدارىن باسىنان اسىرا كوتەرىپ، توستاعانعا قۇيىلعان شاراپشا، تۇنىپ جاتقان تەڭىزگە تومەن قاراي قارعىپ كەتكىسى كەلگەندەي، ءبىر كەرىلىپ الدى.

ءسويتىپ، ساۋدىراعان سۇيەكتەرىن جازىپ بولعان سوڭ ەسىك الدىنداعى تاسقا كەپ جايعاسىپ، كۇرتەسىنىڭ قالتاسىنان ءبىر اشىق حاتتى الدى دا، حات ۇستاعان قولىن كوزىنەن الىستاتا ءتۇسىپ، ەرىندەرىن ءۇنسىز عانا جىبىرلاتىپ، سىعىرايا قارادى. سول جەردە ونىڭ قۇددى كۇمىس جالاتقانداي، كوپتەن بەرى قىرىلماعان كەپ كەسەك بەت-الپەتىنەن ماحاببات پەن قايعى جانە ماقتانىش سەزىمى وعاش ارالاسقان ءبىر جاڭا جىمىڭ ەلپ ەتە دە قالدى.

ونىڭ الدىنداعى ءبىر جاپىراق قاتتى قاعازعا جايدارى عانا جىميىسىپ، ءيىن تىرەسە وتىرعان، بۇيرا شاشتى، كەڭ يىقتى ءارى چەككونىڭ ءوزى سىقىلدى ءداۋ باس كەلگەن ەكى جىگىتتىڭ كوك بوياۋمەن سالىنعان سۋرەتتەرىنىڭ ءۇستىن الا:

چەككو ارتۋرو مەن ەنريكو

ءوز تابىنىڭ مۇددەسىن كوزدەگەن ەكى يگى كۇرەسكەر.

بۇل ەكەۋى اپتاسىنا 6 دوللار تابىس تاپقان 25000

توقىما جۇمىسشىسىن ۇيىمداستىرعان، وسىنىسى ءۇشىن

ەكەۋى دە اباقتىعا جابىلعان.

الەۋمەتتىك ادىلەتتىك ءۇشىن كۇرەسكەرلەر جاساسىن — دەپ، ءىرى ارىپپەن انىقتاپ تاسقا باسىلعان جازۋ بار ەدى.

قارت چەككو حات تانىمايتىن ادام ەدى، ءارى جاڭاعى سوزدەر دە جات تىلدە جازىلعانمەن، ءبىراق ول حاتتىڭ ءاربىر ءسوزى كوكەيىنە قونا جەز كەرنەيشە سىلدىرلاي سايراپ، تاپ وسىلايشا جازىلعانىنا قانىق تا بولاتىن.

كوگىلدىر تارتقان وسى ءبىر اشىق حات قارتتى كوپ اۋرەگە ساپ، ابىگەر ەتكەن ەدى؛ بۇل حاتتى ول وسىدان ەكى اي شاماسى بۇرىن العان بولاتىن، ءسويتىپ الا سالىسىمەن ءىستىڭ شاتاق ەكەنىن اكەلىك تۇيسىگى سول جەردە-اق سەزە دە قويعان ەدى؛ ويتكەنى، پاقىر ادامداردىڭ سۋرەتتەرى ولاردىڭ تەك زاڭدى بۇزعان كەزدەرىندە عانا باسىلادى عوي.

وسى ءبىر جاپىراق قاعازدى قالتاسىنا سالىپ العانمەن، ءبىراق چەككونىڭ كوڭىلىنە ءوزى تۇيتكىل بولىپ، كۇن سايىن جانىن جۇدەتە بەردى. حاتتى پوپقا كورسەتكىسى كەپ تالاي رەت وقتالسا دا، ءومىردىڭ ۇزاق تاجىريبەسى جۇرتتىڭ: «ادام تۋرالى قۇدايعا پوپ شىندىقتى ايتۋىن-ايتسا دا، ءبىراق ادامعا شىندىقتى ءومىرى ايتپايدى» دەگەن سوزدەرىنىڭ ءادىل ەكەندىگىنە ءوزى تۇيسىنگەن دە بولاتىن.

اشىق حاتتىڭ قۇپيا سىرىن ونىڭ ەڭ العاش سۇراعان ادامى، چەككونىڭ ۇيىنە كۇن قۇرعاتپاي كەلىپ، ىڭعايلاپ قويعان مولبەرتىنىڭ قاسىندا، سالا باستاعان سۋرەتىنىڭ ءتورت بۇرىشتى كولەڭكەسىنە باسىن كومىپ، جاتىپ كەتىپ جۇرەتىن ءبىر سۇڭعاق بويلى، سىيدا، شيكىل-سارى شەتەلدىك سۋرەتشى ەدى.

— مىرزا، — دەپ سۇرادى ودان سۋرەتشى. — بۇل جىگىتتەر نە ىستەگەن ەدى؟

قارتتىڭ ەكى بالاسىنىڭ جايراڭداعان جۇزىنە قاراپ العاننان كەيىن:

— ءسىرا، كۇلكىلى بىردەمە بولۋ كەرەك... — دەدى سۋرەتشى.

— ءجا ەندى، بۇلار جونىندە نە باسىلعان ەكەن؟

— بۇنىڭ ءوزى اعىلشىنشا جازىلىپتى. ولاردىڭ ءتىلىن اعىلشىنداردان باسقا تەك ءبىر قۇدايدىڭ ءوزى مەن، بۇل جونىندە ەگەر راس ايتسا، مەنىڭ ايەلىم عانا بىلەدى. ال باسقا جاعدايلاردىڭ ءبارىن دە ونىڭ ءوزى ىلعي وتىرىك ايتادى...

سۋرەتشىنىڭ ءوزى ءبىر شىمشىقتان اۋماعان مىلجىڭ ەدى، ءسىرا ءوزى ەشنارسە جايىندا جارتىمدى جاۋاپقا دا جوق ادام بولۋ كەرەك. قارت ونىڭ قاسىنان تۇنەرە باسىپ اۋلاق جونەلىپ، كەلەسى كۇنى ايەلىنە كەلىپ ەدى، قولقىلداعان كەڭ ءارى جارقىراعان اپپاق كويلەك كيگەن كۇبىدەي حانىم اسپالى تور ۇستىندە كوكشىل كوزىن تەڭبىل اسپانعا تۇلدانا تىگىپ، ىستىقتان سىلەسى قۇرىپ جاتىر ەكەن.

— بۇل ادامدار اباقتىعا جابىلىپتى، — دەدى ايەل بۇرمالانعان تىلمەن.

كۇرس ەتكەن سوققىدان كۇللى ارال سولق ەتە تۇسكەندەي، اياقتارى دىرىلدەپ كەتكەنمەن، ءبىراق سويتسە دە:

— بىردەمە ۇرلاپ پا ەكەن الدە بىرەۋدى ولتىرگەن بە وزدەرى؟ — دەدى قارت قايراتتانىپ.

— ۋا، جوق! بۇل ەكەۋى سوسياليست انشەيىن.

— سوسياليست دەگەن نەمەنە؟

— بۇل — ساياسات،— دەدى حانىم ولۋسىرەگەن ۇنمەن، كوزىن جۇمىپ.

شەتەلدىكتەردىڭ ناعىز ميعۇلا كەلەتىندىگىنە چەككو قانىق ەدى، ولاردىڭ وزدەرى كالابريسالاردان دا زەردەسىز بولعانمەن، بالالارى جايىندا شىندىقتى بىلۋگە ىنتىققان قارت ماناۋراعان باداناداي كوزدەرىن قاشان اشار ەكەن دەپ، حانىمنىڭ قاسىندا تەلمىرىپ تۇرىپ قالدى. اقىر اياعىندا ايەل كوزىن اشقان سوڭ، ساۋساعىمەن حاتتى ءبىر ءتۇرتىپ قويىپ:

— مۇنىڭ ءوزى — ادال ما؟ — دەپ ەدى ول.

— بىلمەيمىن،— دەدى ايەل شىتىنىپ.— ايتتىم عوي مۇنى ساياسات دەپ، ۇعىپ تۇرمىسىڭ؟

جوق، ول ۇعىنعان جوق بولاتىن: ويتكەنى، جارلى ادامداردان الاتىن سالىقتى ءوسىرۋ ءۇشىن ريمدە ساياساتتى مينيسترلەر مەن باي ادامدار جاسايتىن. ال ەندى، ونىڭ بالالارى — امەريكادا تۇراتىن، جۇمىسشى، اياۋلى جىگىتتەر بولاتىن — ولارعا ساياسات جاساپ نە كەرەك؟

اي ساۋلەسىمەن قاراۋىتىپ، كوڭىلىنە بۇرىنعىدان دا بەتەر سۇمدىق ويلار سالعان بالالارىنىڭ سۋرەتىن قولىنا الىپ ۇزاقتى ءتۇن ۇيقى كورمەي وتىرعان ول تاڭەرتەڭ پوپتان سۇراۋعا بەل بايلاپ ەدى، — جەلەڭ جامىلعان قارا كىسى:

— سوسياليست دەگەنىمىز قۇدايدىڭ قۇدىرەتىن مويىندامايتىن ادامدار بولادى بىلگىڭ كەلسە، وسىنىڭ ءوزى دە جەتىپ جاتىر — دەدى قاتال ءارى قىسقا عانا قايىرىپ.

ءسويتىپ، كەتىپ بارا جاتقان قارتتىڭ سىرتىنان:

— سەنىڭ جاسىڭداعى ادامعا مۇنداي نارسەلەرمەن اۋەستەنۋ ۇيات! ... — دەپ، بۇرىنعىدان دا زەكىڭكىرەپ قوسىپ قويدى.

— سۋرەتتى كورسەتپەگەنىم جاقسى-اق بولعان ەكەن، — دەپ ويلادى چەككو ىشىنەن.

ارادا تاعى دا ءۇش كۇن وتكەن سوڭ ول كەربەز ءارى جەلوكپە ءبىر شاشتارازعا كەلگەن ەدى. جاس ەسەكتەي مىعىم جارالعان بۇل جىگىتتى جۇرت اقشاعا بولا، تەڭىز كوركىنەن ءلاززات الۋدى سىلتاۋراتىپ، شىندىعىندا جارلى جىگىتتەرمەن وقيعا ىزدەي كەلەدى-مىس دەگەن امەريكان كەمپىرلەرىن جاقسى كورەدى ەكەن دەپ وسەك ەتەتىن.

— جاساعان-اي!— دەپ باج ەتە ءتۇستى بۇل سۇم، جازۋدى وقىپ، ءسويتىپ ءوزىنىڭ ەكى بەتى قۋانعاننان دۋىلداي جونەلدى. — مىناۋ مەنىڭ ارتۋرو مەن ەنريكو جولداستارىم عوي، ءباتىر-اۋ! و، ەتتورە اكەي، ءسىزدى جانە ءوزىمدى شىن كوڭىلىممەن قۇتتىقتايمىن! مەنىڭ، مىنەكي، تاعى دا ەكى داڭقتى جەرلەسىم بولدى — شىنىمەن-اق، بۇعان دارديماۋعا بولا ما ەندى؟

— كوپ سويلەپ كوكىمە، — دەپ قارت ەسكەرتىپ قويىپ ەدى.

ءبىراق اناۋ قولىن سەرمەپ:

— بۇل تاماشا نارسە! — دەدى اڭگىرلەپ.

— بۇل ەكەۋى جايىندا نە دەپ جازىلعان ەكەن؟

— ونىسىن وقي الماي تۇرمىن، ءبىراق شىندىقتىڭ جازىلعانىنا كامىل سەنەمىن. تۇپتەپ كەلگەندە وزدەرى تۋرالى جۇرت شىندىقتى ايتۋ ءۇشىن جارلىلار ۇلى باتىر بولۋعا ءتيىس!

— ءوشىر ءۇنىڭدى، وتىنەمىن، — دەدى دە، اعاش شاركەيىن تاسقا تارسىلداتا باسىپ چەككو جايىنا جونەلدى.

ول، جۇرت ءوزىن مەيىرىمدى ءارى ادال ادام دەيتىن ءبىر ورىس مىرزاسىنا تارتقان ەدى. كەلگەن سوڭ، الگى ادام ءحال ۇستىندە جاتقان توسەكتىڭ جانىنا كەپ جايعاستى دا، سۇراي قويدى ودان:

— مىنا ادامدار تۋرالى نە ايتىلعان ەكەن؟

اۋرۋدان نۇرى تايىپ ءارى مۇڭ باسقان كوزدەرىن سىعىرايتا قاراعان ورىس اشىق حاتتىڭ بەتىندەگى جازۋدى ولۋسىرەگەن ۇنمەن وقىپ شىعىپ، قارتقا ەلجىرەي ءبىر ەزۋ تارتىپ قويعان ەدى، اناۋ وعان:

— مىرزا، كوزىڭىز كورىپ وتىر — ءوزىم ابدەن قارتايىپ، تاڭىرىمە ەندى تاياۋدا اتتانعالى وتىرعان اداممىن. بالالارىڭدى ءقايتتىڭ دەپ مادوننا وزىمنەن سۇراعان كۇندە وعان شىندىقتى شىرعاسىن شىعارماي ايتىپ بەرۋگە ءتيىسپىن. مىنا حاتتىڭ بەتىندە تۇرعان مەنىڭ بالالارىم ەدى، ءبىراق بۇلاردىڭ نەدەن جازىپ، اباقتىدا نەلىكتەن وتىرعانىنا ءوزىم ءتىپتى تۇسىنە الماي وتىرمىن.— دەدى.

سولاي بولعان سوڭ ورىس وعان:

— مادونناعا: بالالارىم ءسىزدىڭ ۇلىڭىزدىڭ ەڭ نەگىزگى وسيەتىن كوكەيلەرىنە مۇلتىكسىز قۇيىپ، ادام بالاسىن جانى ەلجىرەي جاقسى كورىپ ءجۇر دەڭىز ... — دەپ اسا بايىپتى ءارى وپ-وڭاي عانا ءبىر اقىل ايتتى.

كوپىرمە ءسوز بەن كوركەمدەۋدى كوپ تىلەيتىن وتىرىكتى ايتۋ وڭاي بولماعان سوڭ، قارت ورىسقا يلاندى دا، ونىڭ ەڭبەك ىستەپ كورمەگەن، كىپ-كىشكەنتاي قولىن قاتتى-قاتتى قىستى.

— سونىمەن بۇل اباقتىنىڭ ءوزى ولارعا ماسقارا نارسە ەمەس پە؟

— جوق، — دەدى ورىس.— ويتكەنى، داۋلەتتى ادامداردىڭ اباقتىعا جاۋىزدىقتى باسىنان اسىرا ىستەپ، ونىسىن جاسىرا الماعان كەزدە جابىلاتىنىن، ال ەندى جارلىلاردىڭ اباقتىعا تەك تيتتەي جاقسىلىقتى ويىنا العان كۇندە عانا تۇسەتىنىن ءوزىڭىز دە بىلەسىز. ءسىز باقىتتى اكەسىز، مەنىڭ سىزگە ايتارىم وسى!

ءسويتىپ ول ولۋسىرەي سويلەي وتىرىپ چەككوعا ومىردەگى جوقشىلىقتى، ناداندىقتى جانە سول ناداندىق پەن جوقشىلىقتان تۋاتىن كۇللى سۇمدىق پەن سۇرقيالىقتى جەڭبەك بولعان ادال ادامداردىڭ يگى نيەتتەرى جايىندا ۇزاق-سونار اڭگىمە شەرتىپ كەتتى...

كۇن ءوزىنىڭ التىن ساۋلەسىنىڭ توزاڭىن سۇرعىلت جاقپار تاستىڭ كوكىرەگىنە سەبەلەپ، جالىننان جارالعان گۇلشە، اسپاندا جايناعاندا، قۇلپىرعان ءشوپ پەن اسپاننان اۋماعان كوكپەڭ-كوك گۇلدەر ءاربىر تاس اجىمىنەن سول كۇنگە قاراي قۇلشىنا بوي تۇزەي بەزەنىپ تۇرعان ەدى. مولتىلدەگەن ءموپ-مولدىر شىق مونشاعىنا شاعىلعان كۇن ساۋلەسىنىڭ التىن ۇشقىنى جىلت ەتىپ، ءسونىپ قالىپ جاتقان بولاتىن.

قارتتىڭ ەكى كوزى كۇن ساۋلەسىنىڭ ءنارلى قۋاتىن بويىنا سىمىرە دەم العان توڭىرەگىندەگى دۇنيە مەن سايراي ءجۇرىپ ۇيا سالىپ، ابىگەرلەنگەن قۇستاردا ەدى؛ ونىڭ ەسىل-دەرتى بالالارى بولاتىن؛ جىگىتتەر مۇحيتتىڭ ار جاعىنداعى ءبىر ۇلكەن قالادا اباقتىدا وتىر — بۇل ولاردىڭ دەنساۋلىعىنا جامان، يا، جامان-اق …

ءبىراق ولار اباقتىدا، ابىرويىنا ءومىرى كىرشىك جۋىماعان اكەسى سىقىلدى، ادال جىگىت بوپ ەرجەتكەندىكتەرى ءۇشىن وتىرعان ەدى،— بۇلارى وزدەرىنە، ءارى اكە كوڭىلىنە دە جۇبانىش بولاتىن.

ءسويتىپ، قارتتىڭ جىلتىر قارا بەت-الپەتىنەن ءبىر ماقتانىشتى جىمىڭ ەلپ ەتە قالدى.

— جەر دەگەنىڭ باي، جۇرت — جارلى، كۇن — مەيىرىمدى، ادام — زۇلىم. ءومىر بويى ويلاعان وسى نارسەلەرىم اۋزىمنان شىقپاسا دا، ءبىراق وزدەرى اكەنىڭ ويىن تۇسىنگەن. اپتاسىنا التى دوللار دەگەنىڭ قىرىق لير بولادى ەكەن، ەھە! ايتسە دە مۇنى وزدەرى ازىرقانعان، ءسويتىپ وزدەرى سىقىلدى جيىرما بەس مىڭ ادام دا ولارمەن ءباتۋالاسقان — جاقسى تۇرمىس قۇرام دەگەن ادامعا بۇل، ارينە، از عوي.

ءوز جۇرەگىندە جاسىرىن جاتقان ويلاردىڭ بالالارىنىڭ بويىندا دا ءوربىپ، وركەندەگەنىنە دەن قويعان ول مۇنى قاتتى ماقتانىش تۇتقانمەن، ءبىراق جۇرتتىڭ كۇن سايىن وزدەرى جاساپ جۇرگەن ەرتەگىلەرىنە وزدەرى ونشا سەنە قويمايتىندىعىن بىلگەندىكتەن، جۇمعان اۋزىن اشپاي ءجۇردى.

تەك كەي-كەيدە عانا كەڭپەيىل قارتايعان جۇرەكتى بالالارىنىڭ كەلەشەگى جايىنداعى ويلار كەرنەپ كەتەتىن، سول كەزدەرى قارت چەككو قالجىراعان بەلىن تۇزەپ، كوكىرەگىن بۇگىپ، بويىنداعى اقتىق قايراتىن جينايتىن دا، تەڭىزگە، بالالارى جۇرگەن قيىر-قيانعا قاراي:

— ۆالو-و!.. — دەپ بارقىراپ ايقاي سالاتىن.

ءسويتىپ، تەڭىزدىڭ قويمالجىڭ ءارى سۋدىراعان سۋى ۇستىنەن بارعان سايىن شارىقتاي بەرگەن كۇن دە كۇلىپ جىبەرەتىن دە، ءجۇزىم ەگىسىنىڭ اراسىندا جۇرگەن جۇرت قارتقا:

— وي-ي!. .— دەپ جاۋاپ قاتىپ قوياتىن.

---