InfoHub Logo

ءبىر جىلدارى جيرەنشەنىڭ ايەلى ولەدى. «ەل قۇلاعى ەلۋ» دەگەن ەمەس پە. پالەنشەنىڭ اۋلىندا ءبىر شالدىڭ قىزى بار، ءوزى سۇلۋ، ءوزى اقىلدى، شەشەن، تاپقىر دەگەنگە ىزدەپ شىعىپ، شالدىڭ اۋلىنا جاقىنداي بەرگەندە تابىتقا سالىپ اپا- را جاتقان ادامدى كورەدى. جيرەنشە دە سولاردىڭ سوڭىنان ەرە بەرەدى. ءبىر اقساقالدى شالدىڭ قاسىنا كەپ: «اكە، مىناۋ ولگەن ادام با، جوق ءتىرى ادام با؟» — دەپ سۇرايدى. شال
جيرەنشەگە جەكىپ «ءتىرى ادامدى تابىتقا سالا ما ەكەن؟» دەپ ۇرسىپ تاستايدى. جيرەنشە ونىمەن قويماي ءپىسىپ تۇرعان بيدايدىڭ جانىنان وتە بەرگەندە «اكە، مىنانى ادام جەي مە، جوق پا؟» دەپ شالدان تاعى سۇرايدى. شال «جەيتىن نانىڭدى بىلمەيتىن قانداي سورلىسىڭ» دەپ بۇرىنعىدان دا گورى باتىلىراق سويلەدى. باعاناعى تابىتقا سالعان ادامدى كومىپ، جۇرت ۇيدى-ۇيىنە تارقاي باستايدى. جيرەنشە ماناعى شالعا:
«ءسىزدىڭ ۇيدەن سۋسىنداۋعا بولا ما؟» دەيدى. «نەگە بولماسىن، شىراعىم» دەپ شال جيرەنشەنى ۇيىنە كىرگىزىپ، توسەك سالىپ وتىرعىزادى دا، دالادا جۇرگەن قىزىنا: «مىنا ءبىر اقىلىنان اداسقان جازعان ەكەن، سۋسىنداتىپ جىبەر. ماعان ولگەن ادامدى «ءالى ءتىرى مە» دەدى. ءپىسىپ تۇرعان بيدايدى «ادام جەي مە، جەمەي مە» دەپ سۇرايدى. قانداي جازعان ەكەنىن قايدام» دەيدى. سوندا قىز تۇرىپ: «وي، اكە-اي! بەكەر ايتاسىز، ولگەن
ادامدى «ءتىرى مە، ءولى مە» دەگەن ءسوزى — ەگەر سول ولگەن ادامنىڭ ارتىندا بالاسى جوق بولسا، وندا ونىڭ ولگەنى. ال، بالاسى بار بولسا، وندا ونىڭ ولمەگەنى. ءپىسىپ تۇرعان بيدايدى «ادام جەي مە، جوق، جەمەي مە» دەگەن ءسوزى — سول بيدايدى ەككەن ادامعا بۇيىرسا جەي مە، جوق بۇيىرماسا دا جەي مە دەگەن ءسوزى ەدىڭ دەپتى. اكەسى: «شىراعىم، بۇ شىركىننىڭ جۇمباقتاپ سويلەگەنىن مەن قايدان بىلەيىن» دەپ توقتالادى.

قىز تۇرىپ: «ءسوزىنىڭ توركىنى جامان ەكەن، جيرەنشە قۋ بولماسا جارار ەدى» دەپتى. جيرەنشە قۇدا ءتۇسىپ، سول قىزدى الادى. قىزدىڭ اتى قاراشاش سۇلۋ ەدى، باياعى ءوزىنىڭ ىزدەپ شىققان قىزى دا سول ەكەن.

 

---