InfoHub Logo

بايدىڭ جىلقىسىن باعىپ، شارۋاسىن كۇيتتەگەن جالشى جىگىت بايدىڭ جالعىز قىزىنا عاشىق بولىپتى. قىز كوڭىلى جىگىتتە بولعانىمەن، جالشىعا تيۋىنە قىزدىڭ اعايىن-تۋىستارى ىرزاشىلىق بەرمەيدى.

كۇندەردىڭ كۇنىندە قىزدان جىگىتكە حابار كەلەدى. «اكەم مەنى سۇيمەگەن ادامىما اتاستىرىپ، جاقىندا تويىمدى جاساپ ۇزاتقالى جاتىر. ەگەر ۋادەڭنەن تايماعان بولساڭ، ەبىن تاۋىپ، مەنى الىپ قاش»، — دەپتى. نە قىلارىن بىلمەي، اقىلى الپىس بولىنگەن جىگىت اۋىلدىڭ بەدەلدى اقساقالىمەن اقىلداسىپ، ءجون-جوبا سۇراپتى. جىگىتتىڭ ءسوزىن تۇگەل تىڭداپ بولىپ، اقساقال جاۋاپ قاتادى:

— شىراعىم، تالابىڭ وڭعارىلسىن! ءبىراق ءبىز ول بايدىڭ قىزىن بايلىقپەن الا المايمىز — داۋلەتىمىز جەتپەيدى. باتىرلىقپەن دە الا المايمىز — كۇشىمىز جەتپەيدى. تەك، اسقان اقىل-ايلا جۇمساپ قانا الا الامىز دەپتى. سوندا جىگىت:

— اقساقال، ول قانداي ايلا؟ — دەسەدى.

— بايدىڭ قاراجورعا دەگەن اتاقتى جورعاسى بار. ەگەر سول جورعانى قاپىسىن تاۋىپ قولعا تۇسىرە الساق، جورعانىڭ ءوزى دە كەلەدى، وزىنە قوسا قىزدى دا اكەلەدى. قىز ءوز ەركىمەن كەلگەن بولادى. ءبىز سوندا عانا بار جالاسىنان اۋلاق بولامىز، — دەيدى.

— ماقۇل، اقساقال. ايتقانىڭىزعا كوندىم. ءبىراق سول قاراجورعانى قولعا ءتۇسىرۋدىڭ جولىن ايتىڭىز. «ەر سەرىگى — تاۋەكەل»، كورەيىن بەلدى بايلاپ، — دەيدى جىگىت.

— ولاي بولسا، قالىڭدىعىڭا حابار ايت. ۇزاماي باراتىندىعىڭ جونىنەن ءبىر اۋىز يشارات ءبىلدىر. ءبىراق ول سەن بارعان كۇننەن باستاپ توسەك تارتىپ جاتىپ قالسىن. ناۋقاس ادامنىڭ كەيپىندە بولسىن. جاعدايىن سۇراعان جەڭگەسىنە جاۋاپ بەرمەي، تەك شەشەسىنە تىلدەسىپ، ءبىر اۋىز تىلەك ايتسىن: «مەن جات جۇرتقا كەتەرىمدى ءبىلىپ، قۇسا بولىپ جاتىرمىن. اكەمە ايت، كەتەرىمنەن بۇرىن تۋعان-تۋىس ارالاپ، قاتار-قۇربىممەن كوڭىل كوتەرىپ قالعىم كەلەدى. ماعان، مىنۋگە قاراجورعاسىن بەرسىن»، — دەسىن. جانە بۇل اڭگىمەنى شەشەسى اۋىلدىڭ ءقادىرلى دەگەن ادامىنا ايتقىزسىن. ايتپەسە، باي كونبەس. قاراجورعا ايەل تۇگىلى، ەر ادامنىڭ دا تاقىمىنا بەرىلمەيتىن قاسيەتتى جانۋار ەدى، — دەپ ءقاۋىپ ايتادى. — ال قاراجورعا تاقىمعا تيگەسىن قىز اتتىڭ باسىن بىردەن اۋىلعا بۇرماسىن. اۋەلى اتتىڭ تابانىن قىزدىرىپ، ابدەن بۋساندىرسىن. ءوزىڭ ىلگەرى جۇرە بەر دە، اقىرىن كۇت. قالعانى تاعدىر-تالايىڭنان بەلگىلى بولار، — دەگەن ەكەن.

جىگىت اقساقالدىڭ ايتقان اقىل-كەڭەستەرىن تۇگەل ورىندايدى. قىزدىڭ شەشەسى دە اكەسىن كوندىرىپ، اقىرى قاراجورعا قىز تاقىمىنا تيەدى. ارى-بەرىدەن سوڭ تابانى قىزىپ، باۋىرىن جازعان قاراجورعا ماڭدايىن تاسقۇدىققا بەرىپ، باعىت الىپ جونەپ وتىرادى.

جولشىباي جىگىت قالىڭدىعىن توسىپ الىپ، ەلگە سۇيىنشىگە شابارمان جىبەرەدى. جىگىتتىڭ تىلەۋىن تىلەپ، جولىن توسىپ تۇرعان ەل-جۇرت الىستان الا شاڭنىڭ ىشىنەن قاراۋىتىپ ەرەكشە كوزگە تۇسكەن قاراجورعا اقىرى باي قىزىنىڭ ەنشىسى، دۇنيەسىنىڭ باسى بولىپ، كەلگەن جەرىنە سىڭىسكەن ەكەن دەسەدى.

---