كانيكۋل اياقتالعان سوڭ وقۋشىلار ونلاين وقۋعا كوشۋى مۇمكىن
ق ر ءبىلىم جانە عىلىم ءمينيسترى اسحات ايماعامبەتوۆ Facebook پاراقشاسىندا كوروناۆيرۋسقا بايلانىستى ءبىلىم سالاسىنىڭ الدىندا تۇرعان ءبىرقاتار ماسەلەگە نازار اۋدارتتى.
«مەملەكەت باسشىسى قاسىم-جومارت توقايەۆ ۇكىمەتكە حالىقتى كوروناۆيرۋستىق ينفەكسيادان قورعاۋ شارالارىن كۇشەيتۋدى مىندەتتەگەنىن بىلەسىزدەر. ق ر پرەزيدەنتىنىڭ تاپسىرماسىن ورىنداۋ اياسىندا ءتيىستى جۇمىس اتقارىلۋدا. ءبىلىم بەرۋ ۇيىمدارىنا، مينيسترلىككە قاراستى مەكەمەلەردىڭ جۇمىسىنا، پەداگوگتەر مەن وقۋشىلاردىڭ ءوزارا ءىس-قيمىلىنا، وقۋ پروسەسىن ۇيىمداستىرۋعا قاتىستى تاپسىرمالار كورسەتىلگەن ءبىلىم جانە عىلىم مينيسترلىگىنىڭ ارنايى بۇيرىعى جىبەرىلدى»، - دەپ جازدى مينيستر.
سونىمەن قاتار مينيستر ءبىرقاتار ماسەلەگە نازار اۋدارتتى.
1. مەكتەپكە دەيىنگى ءبىلىم مەكەمەلەرى شتاتتىق رەجىمدە جۇمىس ىستەۋدە. بالاباقشاعا بالالاردى اپارۋ نەمەسە اپارماۋ ماسەلەسى اتا-انالارىنىڭ قالاۋىنا بايلانىستى. كەلمەگەنى ءۇشىن بالاباقشادان شىعارىلمايدى. ياعني، بالاڭىزدى بالاباقشاعا اپارماساڭىز، ورنى ساقتالادى. سوندىقتان، اتا-انالارعا مۇمكىندىگىنشە بۇلدىرشىندەردى ۇيدە قالدىرۋعا كەڭەس بەرىلەدى.
2. 16 ناۋرىزدان باستاپ مەملەكەتتىك قوسىمشا ءبىلىم بەرەتىن ۇيىمداردىڭ قىزمەتى توقتاتىلدى. وعان وقۋشىلار مەن جاسوسپىرىمدەر سارايى، مۋزىكا، كوركەمسۋرەت، ونەر مەكتەپتەرى جانە ت.ب. جاتادى. ق ر بعم بالالار قۇقىعىن قورعاۋ كوميتەتى قازىرگى جاعدايدى ەسكەرە وتىرىپ، اتا-انالارعا بالالارىن جەكەمەنشىك دامىتۋ ورتالىقتارىنا دا اپارماۋعا كەڭەس بەرەدى.
3. 2020 جىلعى 16 ناۋرىزدان باستاپ 5 ساۋىرگە دەيىن بالالار كوكتەمگى دەمالىستا بولادى. وسى ۋاقىت ارالىعىندا مەكتەپ مۇعالىمدەرى قاشىقتان جۇمىس ىستەيدى. ارىپتەستەرىمىز ادىستەمەلىك جانە ساباققا دايىندىق جۇمىستارىن ۇيدە وتىرىپ ورىنداي اادى. ال مەكتەپ ديرەكتورلارى پەداگوگتەردىڭ قاشىقتان جۇمىس ىستەۋى جانە كانيكۋل كەزىندە اتقارىلاتىن جۇمىس كولەمىنە ساي ايلىقتى تولىق تولەۋ تۋرالى اكتىلەردى قابىلدايدى. كانيكۋل اياقتالعان سوڭ قاجەت بولعان جاعدايدا وقۋشىلاردى قاشىقتان وقىتۋ ءۇشىن دايىندىق جۇمىسى جۇرگىزىلۋدە. بۇل تۇرعىدا ارنايى توپ اقپاراتتىق جۇيەنى كونتەنتپەن قامتاماسىز ەتۋ، پەداگوگتەردى ۇيرەتۋ، سەرۆيستەردى تەستىلەۋ جانە باسقا باعىتتار بويىنشا جۇمىس اتقارۋدا. ۇيىمداستىرۋ جۇمىستارىن 5 ساۋىرگە دەيىن اياقتاۋىمىز قاجەت. بىزدە بىرنەشە ەلەكتروندى پلاتفورما بار، قارقىندى جۇمىس ءجۇرىپ جاتىر.
4. 16 ناۋرىزدان باستاپ كوللەدجدەر مەن جوو ستۋدەنتتەرى قاشىقتان وقىتۋ تەحنولوگيالارى نەگىزىندە ءبىلىم الۋعا كوشۋدە. وقىتۋ پروسەسى بەكىتىلگەن وقۋ جۇكتەمەسىنە، جوسپارىنا، باعدارلاماسى مەن كەستەگە ساي جۇرگىزىلەدى.
5. وقۋ پروسەسىن ۇيىمداستىرۋ ءۇشىن پەداگوگتەر مەن ستۋدەنتتەرگە ەلەكتروندىق پلاتفورمالارعا كىرۋگە جاعداي جاسالادى. وقىتۋ قۇرالى رەتىندە ۆيدەو-ساباقتار، دەربەس ونلاين-جۇمىس، ونلاين-كۋرستار پايدالانىلادى. بىزدە «Bilimland»، «Google Classroom»، «MOODLE»، «Univer»، «Platonus»، «Canvas»، «Daryn.online» سىندى جاقسى جۇيەلەر بار. سونداي-اق «Coursera» ءوز كۋرستارىن تەگىن ۇسىندى جانە «ZOOM» وقىتۋ بارىسىندا سەرۆيستى تەگىن پايدالانۋعا جاعداي جاسادى.
«ايتا كەتەيىن، جوعارى وقۋ ورىندارى ءۇشىن قاشىقتان وقىتۋ جۇيەسى جاڭاشىلدىق ەمەس. ق ر بعم بۇيرىققا قول قويعان ساتتەن باستاپ، ارنايى تەحنولوگيالاردى پايدالانىپ جۇرگەن كەيبىر جوو ونلاين-فورماتتا وقىتۋدى باستاپ كەتتى. تەحنيكالىق جانە كاسىپتىك ءبىلىم بەرۋ ۇيىمدارىندا قاشىقتان وقىتۋدىڭ شامالى كۇردەلى جاقتارى بار. دەگەنمەن دە كوللەدجدەردىڭ باسىم بولىگى ءتيىستى جۇيە بويىنشا جۇمىس ىستەپ كورگەن. قالعاندارى قاتارعا قوسىلۋدا. قازىرگى ۋاقىتتا ارنايى جۇيەلەرگە كونتەنت جۇكتەۋ، واك ەنگىزۋ، سبر بويىنشا ۇلكەن جۇمىس اتقارىلۋدا»، - دەيدى مينيستر.
كوللەدجدەر مەن جوعارى وقۋ ورىندارى پەداگوگتەرىنىڭ دە قاشىقتان جۇمىس ىستەۋىنە جاعداي جاسالاۋى كەرەك. جوو مەن كوللەدج باسشىلارىنا وسىعان قاتىستى ءتيىستى تاپسىرما بەرىلگەن.
6. جاتاقحانالارعا قاتىستى ساۋالدار جەتكىلىكتى. بيلەت نەمەسە قارجى تاپشىلىعى سىندى ءارتۇرلى جاعدايلارعا بايلانىستى قالادان كەتە المايتىن ستۋدەنتتەر جاتاقحانالاردا تۇرا بەرەدى. ءبىراق ولار تەك ءوز بولمەسىندە بولۋى ءتيىس.
7. پەداگوگتەردىڭ بىلىكتىلىگىن ارتتىرۋ كۋرستارى ونلاين-فورماتتا وتكىزىلەدى. كەيبىر كۋرستاردىڭ وتكىزۋ مەرزىمى بيىلعى جىلدىڭ ەكىنشى جارتىجىلدىعىنا اۋىستىرىلدى.
8. جالپى ءبىلىم بەرەتىن پاندەر بويىنشا وقۋشىلاردىڭ رەسپۋبليكالىق وليمپياداسى مەن اۋىل مەكتەپتەرىنە ارنالعان «مىڭ بالا» ۇلتتىق زياتكەرلىك وليمپياداسىنىڭ IV كەزەڭىن جانە باسقا دا كونكۋرستاردى وتكىزۋ مەرزىمى كەيىنگە شەگەرىلدى.
9. ءبىلىم الۋشىلار مەن تاربيەلەنۋشىلەردىڭ حالىقارالىق سپورتتىق، مادەني، تۋريستىك ءىس-شارالارعا قاتىسۋىنا تىيىم سالىندى. سونداي-اق بۇقارالىق ءىس-شارالار وتكىزۋگە بولمايدى.
10. ءبىلىم ۇيىمدارىنا ءبىلىم بەرۋدىڭ بارلىق دەڭگەيلەرى بويىنشا وقۋ پروسەسىن ۇيىمداستىرۋ جونىندەگى ق ر بعم ادىستەمەلىك ۇسىنىستارى بەرىلدى. قاجەت بولعان جاعدايدا ولار جاڭارتىلىپ وتىرادى.
«پاندەميا كەزەڭىندە كەم دەگەندە 15 مەملەكەت مەكتەپتەردى ۋاقىتشا جابۋ تۋرالى شەشىم قابىلداعان. تاعى 14 ەلدىڭ بەلگىلى ءبىر وڭىرلەرىندە ورتا ءبىلىم بەرۋ ۇيىمدارىنىڭ جۇمىسى توقتاتىلدى. وسىلايشا، مەكتەپتەردى ۋاقىتشا جابۋ ماسەلەسى ازيا، ەۋروپا، تاياۋ شىعىس جانە اقش سياقتى مەملەكەتتەردى اينالىپ وتپەدى. وسىعان بايلانىستى بالالار مەن ستۋدەنتتەرگە ءبىلىم بەرۋ جانە وقۋ پروسەسىنىڭ ۇزدىكسىز جالعاسۋىن قاداعالاۋ باستى نازارعا الىنىپ وتىر. بۇل - ءبىزدىڭ ەلدەگى ءبىلىم بەرۋ جۇيەسى ءۇشىن ۇلكەن سىن ءارى ماڭىزدى مىندەت. العا قويعان تاپسىرمالاردى ءبىزدىڭ پەداگوگتەر، اتا-انالار، وقۋشىلار مەن ستۋدەنتتەرىمىزدىڭ بەلسەندى اتسالىسۋى ارقىلى بىرگە ورىندايمىز دەپ سەنەمىن»، - دەپ تۇيىندەدى ءسوزىن اسحات ايماعامبەتوۆ.
You Might Also Like
-
ءبىلىم سالاسىندا وتەتىن حالىقارالىق مادەني، سپورتتىق شارالار ەكىنشى جارتى جىلدىققا شەگەرىلدى. بۇل تۋرالى ق ر ءبىلىم جانە عىلىم ءمينيسترى اسحات ايماعامبەتوۆ ايتتى.
-
توڭكەرىستەن جارتى عاسىر بۇرىن وسى كۇنگى پاۆلودار وبلىسى بۇرىنشا كەرەكۋ ەلىندەگى قارجاس شورمان ۇلى مۇسانىڭ ەلىنىڭ ءجۇز جىلقىسىن جاۋار قاراۋىل ەتەكباي ءبيدىڭ ەلى ايداپ كەلىپ پايدالانادى. ءجۇز جىلقىسىن جا...
