كەربەز قىز (ءىىى نۇسقا)
ءبىر بايدىڭ ءۇش ۇلىنىڭ ورتاسىندا بۇلعاقتاپ وسكەن جالعىز قىزى بولىپتى. قىزدىڭ ءبىر اياعىنىڭ تۋا بىتكەن سىلتىماسى بولسا كەرەك. ءبىراق اكە داۋلەتىنە شالقىپ، ءۇش اعاسىنا ارقا سۇيەپ وسكەن قىز كوكىرەگىن كوتەرىڭكى ۇستايدى ەكەن دەيدى. تىپتەن، اياعىنىڭ سىلتىماسىن بىلدىرتكىسى كەلمەي، كەربەزسىنگەن قىلىعىنا قاراپ، توڭىرەگى «كەربەز قىز» دەپ اتاپ كەتكەن ەكەن.
كەربەز قىزدىڭ باسى جاس، بويى جەڭىل كەزىندە قىز «تەڭىم ەمەس» دەپ تالاي جىگىتتىڭ مەسەلىن قايتارادى. وسىمەنەن جۇرگەندە قىز ءبىراز ۋاقىتتىڭ وتكەنىن بايقاماي دا قالادى. قىز عۇمىرى قىزعالداقتاي كەلتە عوي، قاتارىنىڭ كوبى باس قۇراپ، شاڭىراق قۇرىپ كەتكەندە، بايدىڭ قىزى ەندى وڭ جاقتا وتىرىپ قالعان كارى قىز اتانا باستايدى.
ارادا تاعى دا ءبىراز جىل وتەدى. كۇندەردىڭ ءبىر كۇنىندە بۇل اۋىلعا ءبىر جىگىت كەلەدى. اۋىل-ايماقتى ءسوز ەتىپ وتىرىپ، بايدىڭ كەربەز قىزىنىڭ ءالى ۇزاتىلماعانىن ەستيدى. سويتسە، بۇل جىگىتتىڭ دە ءبىر كەزدەرى كەربەز قىزعا كوڭىلى كەتىپ، ءسوز ايتقان ەكەن عوي. ول كەزدە كوكىرەگىن كوتەرىپ جۇرەتىن بايدىڭ قىزى بۇ جىگىتتى «تەڭىم ەمەس» دەپ، ماڭىنا جولاتپاي جىبەرىپتى.
سول كەزدە قىزدىڭ ءالى وڭ جاقتا وتىرعانىن ەستىگەن جىگىت ويعا قالادى: «اپىر-اي، ءبىر كەزدەرى جاستىق سەزىمىمدى وزىنە اۋدارىپ، ءتۇن ۇيقىمدى قاشىرعان عاشىعىم ەدى. ءبىراق مەنىڭ داۋلەتىمدى قوراشسىنىپ، مەسەلىمدى قايتارىپ ەدى. شىن باقىتتىڭ كىلتى بايلىقتا ەمەس ەكەنىن ەندى ءبىلدى مە ەكەن؟» — دەپ تولعانادى. تولعانىس ۇستىندە وتىرىپ، سول سەزىمىن كۇيگە تۇسىرەدى. كۇيدىڭ باس-اياعىن تياناقتاپ قولىن جاتتىقتىرعان سوڭ، اۋىلدىڭ ءبىر ونەرپاز جىگىتىنە قولقا سالادى: «وسى كۇيىمدى كەربەز قىزعا اينىتپاي جەتكىزگەيسىڭ. كۇيدى ءتۇسىنىپ، ءمان-جايىڭدى سۇراي جاتسا، جاسىرماي ايتارسىڭ»، — دەيدى.
ۋادەگە بەرىك ونەرپاز جىگىت كەشىكپەي-اق كەربەز قىزدىڭ الدىنا بارىپ، سالەم كۇيدى تارتادى. كۇي قۇلىنشاقتاي قۇلدىراڭداپ مۇڭسىز-قامسىز اۋەنمەن باستالادى دا، كەلەسى ءبىر ورامىندا قوس ىشەكتىڭ ءاستى-ۇستى قاتار ءۇن قاتىپ، قايناعان ءومىردىڭ ءبىر قۋانىش، ءبىر قايعى سارىنىنا ويىسقانداي بولادى. مۇنان ءارى كۇيشىنىڭ قولى ساعاقتان قايتىپ، بەل بۋىنعا جەتكەندە الدە ءبىر وكىنىشتى وكسىك القىمنان الىپ، سىعىمداپ تۇرىپ العانداي اسەر بەرەدى...
وسى كەزدە كەربەز قىز «بولدى، توقتات» دەگەندەي بەلگى بەرىپ، كۇيدى ءۇزىپ تاستايدى. سالەم كۇيدى كىمنىڭ جولداعانىن سۇراپ بىلەدى. سونان سوڭ، ءوڭى بۇزىلىپ، قامىعا جۇدەپ كوز جاسىن مولدىرەتىپ سىعىپ-سىعىپ الادى. الدەن ۋاقىتتا بويىن جيناپ، ەڭسەسىن تۇزەپ: «قايتەيىن، تاعدىردىڭ جازۋى سول دا، مەن كەربەزسىپ ءجۇرىپ، ءقادىرىمدى بىلەتىن ناعىز ازاماتتى بايقاماي قالىپپىن، باعالاي الماپپىن»، — دەپ وكىنىشىن بىلدىرگەن ەكەن.
كەيىن وسى كۇي ەل ىشىنە «كەربەز قىز» دەگەن اتپەن تاراپ كەتسە كەرەك.
You Might Also Like
-
ەرتەرەكتە ءبىر ونەرپاز جىگىت بولسا كەرەك. ول كەزدە جىگىتتىڭ جاقسىسى جىلقى باعىپ، جۇيرىك مىنەدى. كۇندەردىڭ ءبىر كۇنىندە، سول ونەرپاز جىگىت ساياق شىققان جىلقىلارىن ىزدەپ ءجۇرىپ، ءبىر اۋىلعا كەز بولادى. سو...
-
ەرتەرەكتە جۇيرىك اتتى جازباي تانيتىن سىنشى، اتبەگى بولىپتى. ونىڭ وزىمەن بىرگە قارتايعان كارىبوز دەگەن جۇيرىگى بولسا كەرەك. كارىبوزدىڭ داڭقى قۇنان كۇنىنەن شىعىپ، قاشان ارسا-ارسا بولىپ قارتايعانعا دە...
