InfoHub Logo

ءبىر بايدىڭ ماپەلەپ وسىرگەن ەگىز ۇلى بولادى. اتا-انانىڭ تىلەگىنە ساي ەگىز ۇلدىڭ ەكەۋى دە جۇرت اۋزىنا ىلىككەندەي ازامات بولىپ وسسە كەرەك. قاي ىستە دە ەكەۋىنىڭ جۇبى جازىلماي، بىرىنە-بىرى سۇيەۋ بولىپ، ءبىرىن-بىرى تولىقتىرىپ، كورەر كوزدى قۋانتىپ جۇرەدى ەكەن.

ءبىر كۇنى باي وتىرىپ: «بۇل ەكەۋىنىڭ كىندىگىن قۇداي ءبىر ەتىپ جاراتقاندا، مەنىڭ ايىرعانىم بولماس، ەكەۋىنە ەگىز قىزى بار ۇيگە قۇدا تۇسەيىن»، — دەيدى. سول ويمەن بويجەتكەن ەگىز قىزى بار ءۇي ىزدەپ قۇلاعدار بولىپ جۇرەدى.

ەل ءىشى بولعان سوڭ ءارتۇرلى گاپ كەزدەسە بەرمەي مە، ءبىر ۇيدەن ەگىز ۇل تۋعاندا كەلەسى ۇيدەن ەگىز قىز نەگە تۋماسىن؟ كەشىكپەي- اق، بويجەتكەن ەگىز قىزى بار ءۇي بەلگىلى بولادى دا، باي قۇلشىنا قيمىلداپ قۇدا تۇسەدى. ەكى جاقتىڭ دا ىقىلاس-نيەتتەرى جاراسىپ، قۇيرىق-باۋىر جەسىسىپ، ءتوس قاعىستىرعان قۇدا بولىسادى.

سودان ۋادەلى مەرزىم جەتىپ، قوس كەلىنشەك اق تىلەۋمەن بوساعا اتتايدى، كەلىن بولىپ تۇسەدى. ءبىر باسى ەكەۋ بولىپ، ەكى باسى تورتەۋ بولىپ، تىلەگى ورىندالعان باي نەدەن ايانسىن، اياق جەتەر جەرگە جار سالىپ، ۇلان-اسىر توي جاسايدى.

ءبىراق، ءبارى دە جازۋدان عوي، توي قىزىپ، ەل مارە-سارە بولىپ جاتقاندا «اتتانداي» شاۋىپ جاۋشى كەلەدى. ەل شەتىنە قاراقۇرىم قاسكوي جاۋدىڭ كيلىگە كىرگەنىن حابارلايدى.

سوندا وتاۋ ۇيدە ماز-مەيرام بولىپ وتىرعان ەگىز جىگىت جۇبىن جازباستان اتقا قونادى. ءتاس-تۇيىن بولىپ بەكىنىپ، قاتىگەز جاۋدىڭ الدىن الۋ ءۇشىن اعايىنعا ۇران سالىپ، قول باستاپ شىعادى.

ال قوس كەلىنشەك بولسا الگىندە عانا شىرقاپ وتىرعان شاتتىق ءانىن مۇڭدى زارعا ۇلاستىرىپ، تاڭىرگە جالبارىنادى. اق تىلەۋمەن قوسىلعان اسىل ازاماتتارىنىڭ امان-ەسەن ورالۋىن، جاۋدىڭ بەتى قايتىپ، ەل ىشىنە قايتادان تىنىشتىق ورناۋىن تىلەك ەتەدى.

ەستىگەن جاننىڭ جۇرەگىن ەلجىرەتكەن قوس كەلىنشەكتىڭ وسىناۋ زارلى تىلەگىن كەيىن ءبىر ونەرپاز دومبىرا تىلىنە تۇسىرگەن ەكەن. سول كۇيى «قوس كەلىنشەك» دەگەن اتپەن جۇرتقا جايىلعان.

«قوس كەلىنشەك» كۇيى — تەل بۇراۋمەن تارتىلاتىن ساناۋلى عانا كۇيلەردىڭ ءبىرى. دومبىرانىڭ استىڭعى جانە ۇستىڭگى ىشەكتەرى ءبىر دىبىسقا كەلتىرىلىپ تارتىلعاندا، شىنىندا دا ۇمىت-تىلەگى ءبىر ەگىز كەلىنشەكتىڭ قاتار شىققان مۇڭ-سىرىنداي اسەر بەرەدى.

---