InfoHub Logo

بىردە تىكەن توندى كىرپى تىمىسكىلەنىپ دالادا كەلە جاتسا، الدىنان ءىن قازىپ جاتقان كورتىشقان كەزىگىپتى.

— ءاي، كورتىشقان، بەرمەن كەلشى! اڭگىمەلەسەيىك! — دەيدى كىرپى.

— ول نە اڭگىمە؟ — دەيدى كورتىشقان تاڭعالىپ.

— جاي اڭگىمە ەمەس. ساعان ءبىر ءىس تاپسىرايىن دەپ ەدىم. كەلىسىمىڭدى بەرەسىڭ بە؟ — دەيدى كىرپى وعان.

— ول ءىستىڭ پايداسى بولسا، نەگە بەرمەسكە؟! ارينە، بەرەمىن، — دەيدى كورتىشقان.

— وتە پايدالى ءىس! ەكەۋمىز بىرلەسىپ مىنا ەن دالاعا ەگىن سالايىق. سەن جەر قاز، مەن ءدان ەگەيىن. كۇزدە شىققان ەگىندى تەڭدەي ەتىپ ءبولىپ الامىز، — دەيدى كىرپى.

— كەلىستىك وندا. بۇل ۇسىنىس ماعان ۇناپ تۇر، — دەيدى كورتىشقان.

ءسويتىپ ەكەۋى ىسكە كىرىسەدى. كورتىشقان جەر قازادى. كىرپى ارى-بەرى اۋناپ ءجۇرىپ، جەردى تەگىستەيدى دە، وعان بيداي ءدانىن سەبەدى. كۇن-تۇن دەمەي، ەڭبەك ەتەدى. ارادا ايلار وتەدى. سارى كۇز دە كەلەدى. كىرپى مەن كورتىشقان ەككەن ەگىن بىتىك شىعىپ، ءدان تولى ماساقتار ءيىلىپ، جايقالىپ تۇرادى.

ەكى دوس ەگىندى جيناپ الىپ، بولىسكە سالماق بولادى. ءبىراق كىرپى ۋادەسىن ورىندامايدى. وزىنە ءبىر قاپ بيداي الادى دا، كورتىشقانعا جارتى قاپ بيداي بەرەدى.

— ءاي، كىرپى، مۇنىڭ قالاي؟! «كۇزدە ءونىمدى تەڭدەي بولەمىز دەپ ەدىڭ عوي! سوزىڭدە نەگە تۇرمايسىڭ؟! — دەيدى كورتىشقان اشۋلانىپ.

— ويتكەنى، مەن كوپ جۇمىس ىستەدىم. كورمەيسىڭ بە، جەرگە ءدان ەگەم دەپ ءجۇرىپ، ينەلەرىمدى سىندىرىپ الدىم، — دەيدى كىرپى.

— ال مەن شە؟ جەر قازىپ ءجۇرىپ، تىرناقتارىمدى سىندىردىم، مىنە، كور سەڭبەسەڭ!  — دەيدى كورتىشقان.

ەكەۋى ارى داۋلاسادى، بەرى داۋلاسادى. اقىرى ءبىر-بىرىن جاعادان الىپ، ارپالىسا كەتەدى. وسى كەزدە ولاردى ءبىر تۇلكى كورىپ قالادى. ول كەلە سالىپ، الىسىپ جاتقان كىرپى مەن كورتىشقاندى اجىراتىپ جىبەرەدى.

— سەندەرگە نە بولعان؟ نەگە تالاسىپ جاتىرسىڭدار؟ — دەيدى ولارعا تۇلكى.

كىرپى مەن كورتىشقان بولعان ءىستى تۇلكىگە تۇگەلدەي بايانداپ بەرەدى.

— ءاي، سەندەر دە بولمايتىن ىسكە تالاسادى ەكەنسىڭدەر! — دەپ تۇلكى ميىعىنان كۇلەدى. سويتەدى دە، كىرپى مەن كورتىشقانعا مىناداي اقىل ايتادى:

— قاراپ تۇرسام، كىرپى كوبىرەك جۇمىس ىستەپتى. ابدەن شارشاعان ەكەن. وعان ەندى جاقسىلاپ دەمالۋ كەرەك. سوندىقتان كىرپىگە بيدايدىڭ سابانىن بەرەيىك. ۇستىنە جاتىپ، ۇيقىسىن قاندىرسىن. ال بيدايدى ون بولىككە بولەمىز. ونىڭ ءبىر بولىگىن كورتىشقان الادى. قالعان توعىز بولىگىن وسى داۋدى ءادىل شەشكەنىم ءۇشىن مەن الامىن.

كىرپى مەن كورتىشقان تۇلكىنىڭ ايتقانىنا كونەدى. ءسويتىپ قۋ تۇلكى بيداي تولى قاپتى ارقالاپ، جونىنە كەتەدى. كوپ ۇزاماي كىرپى مەن كورتىشقان الدانىپ قالعاندارىن تۇسىنەدى.

— دوسىم-اي، ەكەۋمىز بەكەر داۋلاستىق. كورمەيسىڭ بە، داۋلاسامىز دەپ قۋ تۇلكىگە الداندىق. بۇكىل ەڭبەگىمىز زايا كەتتى، — دەيدى كورتىشقان.

— ونىڭ راس. تۇلكى ءبىزدى الداپ سوقتى. اتتەڭ، بارىنە مەن كىنالىمىن. بيدايدى ەكەۋمىزگە تەڭدەي ەتىپ بولسەم، مۇنداي بولماس ەدى، — دەيدى كىرپى.

كىرپى قاتەلىگىن ءتۇسىنىپ، وكىنىشتەن وزەگى ورتەنىپ، ورمانعا كەتىپتى. سودان بەرى كىرپى مەن كورتىشقان بىرلەسىپ ەگىن ەكپەيتىن بولىپتى.

ورىس تىلىنەن اۋدارعان باعدات ءماجيتوۆ

---