شەگىرتكە مەن ۇلۋ
باياعى زاماندا ءبىر ماقتانشاق شەگىرتكە بولىپتى. ول كىشكەنە كەزىنەن الىسقا سەكىرگەندى جاقسى كورەدى ەكەن.
ءمۇعالىمى وعان: «سەن الىسقا قالاي جاقسى سەكىرسەڭ، جاقىنعا دا ءدال سولاي سەكىرە ءبىلۋىڭ كەرەك»، — دەپ قانشا ەسكەرتسە دە، ول تىڭداماپتى. «مەن وتە ماڭىزدى شەگىرتكەمىن، مەنىڭ الىسسا سەكىرۋىم كەرەك»، — دەپ ماقتانىپتى.
كۇندەردىڭ ءبىر كۇنىندە ول ۇيىنە شاي ىشۋگە بارماق بولىپ سەكىرگەنى سول ەكەن، ۇيىنەن وتە الىس جەرگە بارىپ تۇسەدى.
سول جەردەن ۇيىنە بارماق بولىپ قايتا سەكىرگەندە، تاعى دا الىستاپ كەتەدى. ءسويتىپ قايتا-قايتا سەكىرىپ، قانشاما ارەكەت جاساعانمەن، ۇيىنە جەتە الماي الەك بولادى. بىردە ءۇيىنىڭ سول جاعىنا، بىردە وڭ جاعىنا، نە ارتىنا، نە الدىنا بارىپ ءتۇسىپ، جەتە المايدى. ابدەن شارشاعان شەگىرتكە ءبىر كەزدە دەمالۋعا وتىرا كەتەدى. سول ءسات ول قاسىندا ءوزىنىڭ دوسى ۇلۋدىڭ تۇرعانىن كورەدى. شەگىرتكەنىڭ جاعدايىن بايقاعان ۇلۋ وعان:
— ءبىزدىڭ دە جەتىستىكتەرىمىزدىڭ بار ەكەنىن بايقاپ تۇرعان بولارسىڭ. ءبىز ۇيىمىزگە ءارقاشاندا كەشىكپەي جانە اسىقپاي جەتە الامىز. ويتكەنى ءۇيىمىز قاشاندا وزىمىزبەن بىرگە، — دەيدى شەگىرتكە دوسىنا قاراپ. — ەگەر سەن مەنىڭ ارقاما وتىرساڭ، ۇيىڭە جەتكىزىپ سالامىن.
شەگىرتكە ۇلۋدىڭ ارقاسىنا وتىرىپ، ۇيىنە جەتىپ الادى. دوسىنا ريزا بولىپ، راقمەتىن ايتىپ جاتىپ:
— ءيا، دوستىم، الىسقا سەكىرۋمەن بارلىق نارسە شەشىلمەيدى ەكەن، — دەيدى كۇرسىنىپ.
— راس، دوسىم، بۇل — شىندىق. جاقىنعا سەكىرۋدىڭ دە الىسقا سەكىرۋ سياقتى جاقسى جاقتارى كوپ، — دەيدى ۇلۋ.
اعىلشىن تىلىنەن اۋدارعان ءماريام نازاربايەۆا
You Might Also Like
-
بىردە تىكەن توندى كىرپى تىمىسكىلەنىپ دالادا كەلە جاتسا، الدىنان ءىن قازىپ جاتقان كورتىشقان كەزىگىپتى.
-
ءاپالى-سىڭلىلى ميلا مەن ماشا دەگەن قىزداردىڭ بولمەسىنە سلاۆيك اتتى ورمەكشى قونىس تەپتى. ول تەرەزە پەردەسىنىڭ ارت جاعىنان وزىنە ىڭعايلى ورىن تاڭداپ الدى. بۇل جەر جارىق، جايلى ءارى ەشكىمنىڭ كوزىنە تۇسە...
