كوپشىلىك الدىندا پىكىر ايتۋدى جوبالاۋ، جوسپارلاۋ، اۋديتوريا نازارىن اۋدارۋ تەحنولوگياسى
ءبىر كۇنى جيىننىڭ ورتاسىندا وتىرعان دوسبول شەشەننەن بىرەۋ:
قول باستاۋ قيىن با؟
جول باستاۋ قيىن با؟
ءسوز باستاۋ قيىن با؟ - دەپ سۇرايدى.
سوندا دوسبول:
- قول باستاۋ قيىن ەمەس،
كوك نايزالى ەرىڭ بولسا.
جول باستاۋ قيىن ەمەس،
سوڭىنا ەرگەن ەلىڭ بولسا.
بارىنەن ءسوز باستاۋ قيىن،
تاۋىپ ايتساڭ مەرەكە قىلادى،
تاپپاي ايتساڭ كەلەكە قىلادى! - دەپتى.
ءسوز ايتۋ، اسىرەسە، پۋبليكا الدىندا، كوپشىلىك كوزىنشە پىكىر ءبىلدىرۋ وڭاي دۇنيە ەمەس. ويدى جەتكىزۋ، ءسوزدى ورىندى قولدانۋ، اۋديتوريانىڭ نازارىن وزىڭە اۋدارىپ، تىڭداۋشىنى سەندىرە ءبىلۋ - ۇلكەن ەڭبەكتى، مەتوديكانى تالاپ ەتەدى.
ەڭ الدىمەن سويلەۋشى وزىنە سەنىمدى بولۋ كەرەك. سەبەبى اۋديتوريا سەنىمسىزدىكتى، قوبالجۋدى، نەگاتيۆتى بىردەن سەزەدى. ءبىرىنشى سوزدەن-اق سەنىمدىلىكتىڭ لەبىن سەزدىرۋ - سپيكەرگە ەففەكتيۆتىلىك بەرەرى داۋسىز.
ال سەنىمدىلىك بولۋ ءۇشىن دايىندىق كەرەك. ناقتىراق ايتساق، ايتار ويدى، يدەيانى، فاكتتەردى جوبالاپ، ورىن رەتتىلىگىن جوسپارلاۋ قاجەت. تاقىرىپتى تالداپ، ورتاعا سالىنعالى وتىرعان يدەيا توڭىرەگىندە ىزدەنىپ، تەرەڭ تۇردە تانىپ الىڭىز. ءوزىڭىزدىڭ پوزيسياڭىزدى ايقىنداپ، ويلارىڭىزدى نەگىزدەڭىز. ودان سوڭ ناقتى جوسپار قاجەت. جوسپارسىز سويلەۋ ويدىڭ جۇيەسىز، تۇسىنىكسىز، ءساتسىز شىعۋىنا اكەپ سوقتىرادى. كومپوزيسيالىق قۇرىلىمىن رەتتەپ، كىرىسپە ويدى، نەگىزگى وي مەن قورىتىندىنى ناقتىلاپ العان ءجون.
ويدى، ءسوزدى جوسپارلاپ العان سوڭ ونى شەبەر ورىنداپ شىعۋ دا وڭاي شارۋا ەمەس. الدىمەن داۋىسقا ءمان بەرۋ كەرەك. انىق سويلەۋ كەرەك ەكەنىن بىلەمىز، ارينە. ودان سوڭ ويعا ەموسيا قوسىپ، ءسوزدىڭ مانىنە قاراي توندى وزگەرتىپ، قۇبىلتا ءبىلۋ اۋديتورياعا جاعىمدى بولارىن ءاردايىم ەسكەرگەن ابزال. ودان سوڭ ءۇزىلىس جانە ونىڭ كۇشىن دۇرىس قولدانا الۋ قابىلەتى دە سوزگە قانىقتىلىق بەرەدى. ۇزىلىستەردى قولدانۋ ءسىزدىڭ شەشەندىك شەبەرلىگىڭىزگە ايتارلىقتاي كومەكتەسەدى. بۇل ءادىس ءسىزدىڭ اۋديتورياڭىزدى كەلەسى جاڭا ويعا دايىنداۋعا نەمەسە ينتريگا قۇرۋعا، حاباردى اۋديتورياعا سىڭىرۋگە مۇمكىندىك بەرەدى. ءسوز جوسپارلى تۇردە، لايىقتى ينتونناسيامەن، ەموسيامەن، تونمەن، ورىندى ۇزىلىستەرمەن بەرىلىپ جاتىر. ءبىراق، ەسكەرەتىن تاعى ءبىر جاي بار. ول - قيمىل-قوزعالىس جانە ميميكا. قاستىڭ، كوزدىڭ قوزعالىسى، باستىڭ بۇرىلۋى مەن قولدىڭ قوزعالىستا بولۋى، العا نەمەسە ارتقا قادامداردىڭ دۇرىس قولدانىلۋى اۋديتوريانىڭ نازارىن اۋدارۋعا جانە تىڭداۋشىنى جالىقتىرىپ الماۋعا كومەكتەسەدى.
مەيربەك بايان مۇراتبەك قىزى
ءال-فارابي اتىنداعى قازاق ۇلتتىق ۋنيۆەرسيتەتى
جۋرناليستيكا فاكۋلتەتىنىڭ 2 كۋرس ستۋدەنتى
You Might Also Like
-
2021 جىلدىڭ 17 قىركۇيەيەگىندە كورسەتىلىمگە شىققان وڭتۇستىك كورەيالىق «كالمار ويىنى»(يگرا ۆ كالمارا، Squid game) از عانا ۋاقىت ىشىندە 110 ميلليوننان استام قارالىم جيناعان. Netflixء-تىڭ ق...
-
يتاليا مەن قازاقستان اراسىنداعى ديپلوماتيالىق قارىم-قاتىناستار 1992 جىلى 12 ماۋسىمدا ورناتىلدى. يتاليا رەسپۋبليكاسىنىڭ ەلشىلىگى 1992 جىلى قازان ايىندا الماتى قالاسىندا اشىلدى. قازاقستان رەسپۋبليكاس...
