كوز لينزاسىمەن ۇيىقتاۋ ءقاۋىپتى مە؟
كوز لينزاسىن تاعاتىندار ونى تاعىپ ۇيىقتاۋعا بولمايتىنى جايلى ءجيى ەستيدى. الايدا كەيدە ونى شەشپەي ۇيىقتايتىن جاعدايلار بولادى. نەمەسە دوسىڭىزدىڭ ۇيىندە تۇنەپ قالاتىن جاعداي بولدى دەلىك، وندا لينزاعا ارنالعان كونتەينەر مەن سۇيىقتىعى بولا بەرمەيدى، ال كەيدە ۇيىقتاپ كەتەمىز. ءبىر قاراعاندا ءقاۋىپ تە جوق سياقتى، الايدا قاراشا ايىندا Huffingtonpost باسىلىمى لينزامەن ۇيىقتاپ قالعان ەر ادامنىڭ سوقىر بولىپ قالعانى جايلى جاڭالىق تاراتتى.
كوزدىڭ مۇيىزگەك قابىعىنىڭ وتتەگىنى اۋادان عانا الاتىنى بەلگىلى. لينزانى تاققانىڭىزدا وتتەگى كوزىڭىزگە تۇسپەيدى ءارى وتتەگى ازايىپ كەتەدى. لوس-اندجەلەستە تۇراتىن مەديسينا عىلىمدارىنىڭ دوكتورى، حيرۋرگ-وفتالمولوگ كەرري ءاسسيلدىڭ (Assil Eye Institute ينستيتۋتىنان) ايتۋىنشا، لينزامەن ۇيىقتاعانىڭىزدا وتتەگىنىڭ جەتىسپەۋشىلىگى قاتەرلى دەڭگەيگە دەيىن جەتۋى مۇمكىن.
وتتەگىنىڭ جەتىسپەۋشىلىگى سالدارىنان كوزدىڭ مۇيىزگەك قابىعى ىسىنەدى، بۇل ءوز كەزەگىندە ەروزياعا ۇشىراتادى. ال ەروزيا، امەريكالىق وفتالمولوگيا اكادەمياسىنىڭ عالىمى، مەديسينا عىلىمدارىنىڭ دوكتورى توماس شتاينەماننىڭ (Thomas Steinemann) ايتۋىنشا، باكتەريالاردىڭ ەنىپ كەتۋ قاتەرىن جەتى ەسەگە ۇلعايتادى. كوزدىڭ وزگە اعزا مۇشەلەرىندەگىدەي يممۋنيتەتىنىڭ جوقتىعىنان ينفەكسيا وتە جىلدام تارايدى.
ونىڭ ۇستىنە ءسىزدىڭ لينزالارىڭىز، كولۋمبيا ۋنيۆەرسيتەتىنىڭ وفتالمولوگيا پروفەسسورى دجەيم وراننىڭ (James Auran) ايتۋىنشا، پەتري توستاعانىنىڭ ناق ءوزى.
ال 15 مينۋتتاي لينزامەن مىزعىپ الۋ قاتەرلى ەمەس شىعار؟
دوكتور اسسيل 15 مينۋت لينزامەن مىزعىپ الۋدىڭ ءوزىن ورىس رۋلەتكاسىنا نەمەسە مينا قويىلعان دالادا سەرۋەن قۇرۋعا تەڭەيدى. مۇيىزگەك قابىعىنىڭ ءىسىنۋى كوزىڭىز لينزامەن جابىلىپ تۇرعان ساتتەن باستالادى ەكەن. قانشالىقتى لينزامەن كوپ ۇيىقتاساڭىز، سونشالىقتى قاتەرگە باس تىگەسىز.
كوز لينزاسىمەن ۇيىقتاۋ ۇزاق ۋاقىت بويى زيانىن تيگىزەدى. ءبىز كوزدى جىلىنا شامامەن 3 000 000 رەت اشىپ-جۇمامىز، لينزامەن كوزىمىزدى ءار اشىپ-جۇمعان سايىن كوزدىڭ شىرىشتى قابىعىن قاجايمىز. شىرىشتى قابىق قاجەتتى مايلاناتىن سۇيىقتىقتىڭ ازدىعىنان كۇستەنە باستايدى. ەندى بۇعان لينزامەن ۇيىقتاۋدان الاتىن زيانىڭىزدى قوسىڭىز، وسىلايشا ماسەلەنى ۋشىقتىرا تۇسەسىز. ال ەگەر ءسىزدىڭ كوزىڭىز قۇرعاقتانۋدان اللەرگيالىق رەاكسيالارعا ۇشىرايتىن بولسا، لينزامەن ۇيىقتاۋ توزبەۋشىلىككە اكەپ سوعادى، ءسويتىپ ءسىز كوز لينزالارىن ەشقاشان تاعا الماي قالاسىز.
قورىتىندى
ۇيىقتار الدىندا لينزانى شەشۋگە 30 سەكۋندىڭىزدى قيىڭىز نەمەسە سيليكون-گيدروگەل لينزالارىن ساتىپ الىڭىز، بۇل لينزانى ساتىپ الساڭىز، وندا ونى كۇندىز-تۇنى تاعىپ جۇرە بەرۋگە بولاتىنى جازىلعانىن بايقايسىز. ال ەگەر بەلگىلى ءبىر جاعدايلارمەن لينزامەن ۇيىقتاپ قالساڭىز (ۇشاق ىشىندە، ويدا جوقتا ۇيىقتاپ كەتۋ) ۇيىقتار الدىندا كوزىڭىزگە دىمقىلداتقىش تامشىلارىن تامىزىڭىز، ال ۇيقىدان كەيىن كوپ مولشەردە تاعى دا تامىزىڭىز. تامشىنى تامىزۋدان بۇرىن لينزانى شەشىپ تاستاۋدان اۋلاق بولىڭىز، سەبەبى ونسىز دا بۇلىنگەن كوزىڭىزدىڭ قابىعىن زاقىمداۋىڭىز مۇمكىن.
You Might Also Like
-
جازدىكۇنگى شاڭ-توزاڭنان، شوپتەن، قالاداعى توزاڭنان جانە تاعى دا باسقالاردان اللەرگياڭىزدى قوزدىرىپ الامىن دەپ قورقاتىنداردىڭ قاتارىنان بولساڭىز، بۇل ماقالامىز سىزگە ارنالعان. مۇندا ءبىز اللەرگيالىق ...
