ماگيستراتۋرا ەمتيحانىنا شپارگالكا اپارعان 100-گە جۋىق تالاپكەر وقۋعا ءتۇسۋ مۇمكىندىگىنەن ايىرىلدى
تەستىلەۋ باستالعالى 23 مىڭعا جۋىق ادام ماگيستراتۋراعا ءتۇسۋ ءۇشىن ەمتيحان تاپسىردى. ولاردىڭ 43%-ى شەكتى بالل جينادى. ورتاشا كورسەتكىش – 73 بالل. ەڭ جوعارى بالل – 130.
تەستىلەۋ باستالعالى 149 قاتىسۋشىنىڭ ناتيجەسى جويىلدى.
ونىڭ ىشىندە 92 وقۋعا ءتۇسۋشى سمارتفون، شپارگالكا جانە باسقا دا تىيىم سالىنعان زاتتاردى الىپ وتۋگە تىرىسقانى ءۇشىن تەست تاپسىرۋ مۇمكىندىگىنەن ايىرىلدى.
كەشەندى تەستىلەۋ كەزىندە ەرەجە بۇزعانى ءۇشىن اۋديتوريادان 57 ادام شىعارىلىپ، ولاردىڭ ناتيجەسى جويىلدى.
«ۇلتتىق ءبىرىڭعاي تەستىلەۋدەگى سەكىلدى كەشەندى تەستىلەۋگە كىرگىزۋ ءۇش دەڭگەيلى جۇيە بويىنشا جۇزەگە اسىرىلادى: Face ID جەكە باسىن سايكەستەندىرۋ ارقىلى، جەكە كۋالىك بويىنشا، سونداي-اق وتىرعىزۋ ورنىندا جەكە باسىن سايكەستەندىرۋ جۇرگىزىلەدى. قابىلدانعان شارالار ارقاسىندا تەستىلەۋدە بوگدە تۇلعالار انىقتالعان جوق»، - دەدى ۇلتتىق تەستىلەۋ ورتالىعىنىڭ ديرەكتورى رۋسلان ەمەلبايەۆ.
ەستەرىڭىزگە سالا كەتسەك، ماگيستراتۋراعا تۇسۋگە ارنالعان كەشەندى تەستىلەۋگە 43 مىڭعا جۋىق ءوتىنىش كەلىپ ءتۇستى.
ماگيستراتۋرادا وقۋعا 13 مىڭنان استام گرانت ءبولىندى. بيىل ماگيستراتۋراعا تۇسۋگە ارنالعان كەشەندى تەستىلەۋ 22 شىلدەدە باستالدى جانە 10 تامىزعا دەيىن جالعاسادى.
بيىل ماگيستراتۋراعا ءتۇسۋ ەرەجەسى وزگەرگەن جوق. كەشەندى تەستىلەۋ ءۇش بلوكتان تۇرادى: شەت ءتىلى بويىنشا تەست، وقۋعا دايىندىعىن انىقتاۋعا ارنالعان تەست جانە ءبىلىم بەرۋ باعدارلامالارى توبىنىڭ بەيىنى بويىنشا تەست.
شەت ءتىلىن مەڭگەرگەنىن راستايتىن حالىقارالىق سەرتيفيكاتتاردىڭ ءبىرى بار وقۋعا تۇسۋشىلەر شەت ءتىلى بويىنشا تەستتەن بوساتىلادى.
تەستىلەۋ ناتيجەسىمەن كەلىسپەگەن جاعدايدا ونلاين اپەللياسياعا بەرۋ مۇمكىندىگى قامتاماسىز ەتىلگەن.
تەستىلەۋ اياقتالعاننان كەيىن 30 مينۋت ىشىندە وقۋعا ءتۇسۋشى بىردەن اپەللياسياعا ءوتىنىش بەرە الادى. اپەللياسيا بەس كۇن ىشىندە قارالادى.
تەستىلەۋ سەرتيفيكاتى وقۋعا ءتۇسۋشىنىڭ جەكە كابينەتىندە قولجەتىمدى بولادى.
شەكتى بالل دا وزگەرىسسىز قالدى: عىلىمي-پەداگوگيكالىق باعىت بويىنشا ماگيستراتۋراعا ءتۇسۋ ءۇشىن 75 بالل، بەيىندىك باعىت بويىنشا 50 بالل جيناۋ قاجەت.
You Might Also Like
-
مەكتەپ كىتاپحاناشىلارىن «پەداگوگ» لاۋازىمىنا تەڭەستىرۋ ماسەلەسى پىسىقتالادى. بۇل تۋرالى ءماجىلىس دەپۋتاتتارىنىڭ ساۋالىنا پرەمەر-مينيستردىڭ ورىنباسارى – ەڭبەك جانە حالىقتى الەۋمەتت...
-
«ون سان ورتا جۇزگە ۇران بولعان ولجاباي» دەسەدى. بۇل سوزگە دالەل بولارلىق اڭگىمە ايتادى.
