ماڭگىلىك ساعىنىش
اتىراۋ وبلىسى يساتاي اۋدانى يساتاي سەلوسى
يساتاي ورتا مەكتەبى قايىرلى دانا 10-سىنىپ وقۋشىسى
قىمباتتى مەنىڭ اناشىم! قايدا بارسام دا، قانداي كوڭىل كۇيدە بولسام دا سەن مەنىڭ جانىمداسىڭ. سەنىمەن سىرلاسۋ، سەنىمەن اقىلداسىپ ءجۇرۋ مەنىڭ داعدىما اينالعالى قاشان؟! جاڭا ءبىر كيىم كيىپ ايناعا قاراعان ساتتەرىمدە نەمەسە اس ۋيدە جاڭا ءبىر ءتاتتى تاعامدى ازىرلەگەن كەزدە ءسىز مەنىڭ سىرتىمنان باقىلاپ، سۇيسىنە قاراپ تۇرعانداي سەزىنەمىن. كەيدە ىشتەي سويلەسىپ تۇرعانىمدا ءوز قۋانىشىمدى جاسىرا الماي باس يزەپ، قالاي كۇلىمسىرەپ تۇرعانىمدى ءوزىىم دە بايقاماي قالامىن.
قىمباتتى مەنىڭ اناشىم! مەن سىزدەن قول ءۇزىپ قالعانىمدا وڭ-سولىن تانىماعان ءسابي ەدىم. ءبىراق ءسىزدىڭ جارقىن بەينەڭىز بەن اسەم ءۇنىڭىز مەنىڭ جۇرەگىمدە كەشەگىدەي ساقتاۋلى.
ءالى ەسىمدە، كورشى ءۇيدىڭ اۋلاسىنان ادەمى گۇلدى جۇلىپ الىپ سىزگە الىپ كەلگەنىم. سوندا ءسىز جاي عانا ۇنمەن:
‒ كۇنىم مەنىڭ، بۇل ادەمى گۇل عوي. ونى جۇلۋعا بولمايدى. گۇل ءوسىپ تۇرعاندا عانا قۇلپىرادى، جان-جاعىنا قۋانىش سىيلايدى. ەسىڭدە بولسىن، بارلىق دۇنيەدەگى تىرشىلىك اتاۋلىنى جۇلۋعا، قورلاۋعا بولمايدى. مەن سەنىڭ ولاردى ايالاپ، قورعاعانىڭدى قالايمىن، -دەگەنىڭ.
سودان بەرى قانشاما جاز، قانشا كۇز، كوكتەم ءوتتى. ءسىز تۇتىنعان زاتتار مەن ءوز ءۇيىمنىڭ ءاربىر بۇرىشىنان ءسىزدى ىزدەگەن كەزدەرىم ارتتا قالىپ، ەرجەتىپ، ەسەيدىم. ءسىز سىيلاعان ءومىرىمدى ءماندى دە ءساندى ەتۋ ءوز قولىمدا ەكەنىن ۇعىنۋ ماعان وڭاي سوقپادى.
ءومىردىڭ تەك قۋانىش پەن ساعىنىشتان تۇرمايتىنىن ۇعىندىم. بالا كۇننەن بىرگە ويناپ، بىرگە جۇرگەن دوستارىمنىڭ تەرىس اينالعان تۇستارىن كورۋ مەن ءۇشىن ءومىردىڭ ۇلكەن سىناعى بولعانى انىق. ءتىپتى كۇيرەكتىككە سالىنىپ، بۇل دۇنيەدە جالعىز قالعانداي كەزدەرىم دە بولدى. سول ساتتەرىمدەگى السىزدىگىمدى كەشىرىپ، مەنىڭ ىشكى مۇڭ-شەرىمدى تىڭداعانىڭ ءۇشىن، مىڭ العىس ايتامىن، اناشىم!
ءومىر دەگەن تۇرمايدى قاپ-قارادان
ءومىر دەگەن تۇرادى اق-قارادان
اق-قارا ەكى اراسىن اشىپ ءوتىپ،
ارىمەن ءوز باقىتىن تاپقان ادام،-دەگەن ءسوزدىڭ ءمانىن ەندى ءتۇسىنىپ كەلەمىن.
ءقازىر وزىمە جاڭا دوستار تاپتىم، ەسكى دوسىممەن دە تابىستىم. كوڭىلىمدى قىلاۋ شالسا كىتاپ وقۋدى، عالامتور ارقىلى ءوز ويىمدى وزگەلەرمەن ءبولىسۋدى ۇيرەندىم. ومىردە جاقسى ادامدار كوپ ەكەنىن ءتۇسىندىم...( پوەزياعا ءجيى قول سوزامىن. ىشىنەن ءوزىمدى، سەنى ىزدەيمىن. بىردە كۇلەمىن، بىردە جىلايمىن...)
بىردە ماعان ۇستازىمنىڭ بىلاي دەگەنى ەسىمدە: “ءسىزدىڭ ءۇيدىڭ تەرەزەسى ماماڭ باردا ەرەكشە جارقىراپ تۇراتىن، ءۇيدىڭ قاسىنان وتكەندە ەرەكشە كوزگە ۇرىپ، مولدىرەپ تۇرۋشى ەدى. سەن ەندى ۇلكەن قىز بولدىڭ، سەن دە جارقىراتىپ ءسۇرتىپ قوي، ول تەرەزەدە سەنىڭ ماماڭنىڭ قولىنىڭ تابى بار” دەگەنى. سودان بەرى ءسىزدى ەسكە العاندا بىردەن تەرەزەگە قارايمىن. قارايمىن دا قولىما سۇلگىنى الامىن...
كەيىن ەسەيە كەلە بۇل ءسوزدىڭ استارىندا ۇلكەن سىر جاتقانىن، تاعلىم مەن تاربيە بارىن ءتۇسىندىم. كوڭىلىم قۇلازىپ، رۋحىم جۇدەپ جۇرگەن كەزدەرىمدى ايتپاي تانىپ، ەڭسە كوتەرۋىمە كۇش بەرگەن قايىرىمدى جاندارعا شەكسىز ريزامىن، اناشىم.
اناشىم، مەن ءسىزدىڭ جالعىز تال گۇلىڭ بولعاندىقتان با مەنى ەركەلەتىپ ءوسىردىڭىز. مەنىڭ اقىلدى دا سۇلۋ بولىپ ەر جەتكەنىمدى قالاعانىڭدى بىلەمىن.
بىردە مەنىڭ قولىما ءسىزدىڭ كۇندەلىگىڭىز ءتۇستى. (جالپى انام تۋرالى ماعان كوپ ادام ايتا بەرمەيتىن) ءسىزدىڭ قاسيەتتى مەكەن قىزىلوردادا تۋىلىپ، ارمان قۋىپ الماتىعا بارىپ، جەنپي بىتىرگەنىڭىز، دوس قىزدارىڭىزبەن بولاشاقتى ارمانداپ جوسپار قۇرعانىڭىزدى وقىعاندا، مەن ءسىزدى جاڭا قىرىڭىزدان تانىدىم. ءسىز وتكەرگەن ستۋدەنتتىك ءومىردىڭ قىزىعى مەن شىجىعى، ءسىز جوسپارلاعان بولاشاق ارماندار مەن مۇراتتار مەنىڭ ومىرىمە جاڭا سىلكىنىس اكەلدى. سان ساققا جۇگىرگەن بالالىق قيالىم مەن جاستىق كوڭىلىم جاڭا ارناعا بۇرىلدى. مەن الدىما ماقسات قويدىم. انام جوسپارلاعان بيىككە شىعىپ، انام قول سوزعان ارماندى جۇزەگە اسىرسام دەگەن تالاپ پايدا بولدى.
اناشىم، مەن ءسىزدى ءومىر بويى ءسۇيىپ وتەمىن!
ماعان ەڭ مەيىرىمدى دە قومقور اكە سىيلاعانىڭ ءۇشىن، مەنى ەشقاشان جالعىز قالدىرماعانىڭ ءۇشىن، مەنى ومىرگە اكەلگەنىڭ ءۇشىن ريزامىن!
ءومىر دەگەن تۇرادى تاڭ مەن كەشتەن
عۇمىرلى ەكى ارانى جانمەن كەشكەن.
قۇپيا، سىرلى جۇمباق دۇنيەگە
ادامدار ارمەن كەلىپ، ارمەن كەتكەن
بۇل‒مەنىڭ ەندىگى ومىردەگى كرەدوم بولماق!
...اناشىم، مەن سىزگە تاعى دا ءتىل قاتامىن.
‒ ءسىز مەنى وسى جولدا قورعاپ، قولدايسىز با؟
‒ ارينە، جارىعىم! سەن قانداي ماماندىقتى تاڭداساڭ دا سەنىڭ ادام بولعانىڭدى، بىلىكتى مامان بولعانىڭدى كورگىم كەلەدى. ەشقاشان ۇمىتپا، مەن سەنىمەن بىرگەمىن!
‒ اناشىم، ءسىز ماعان ءومىر سىيلادىڭىز، مەيىرىم مەن ماحاببات، ءۇمىت پەن ارمان سىيلادىڭىز. مەن ول سەزىمدەردى ءومىر بويى ايالاپ وتەمىن! اناشىم...
You Might Also Like
-
نەمىس كارل بەنس الەمدەگى ءبىرىنشى ءاۆتوموبيلدى شىعاردى دەپ رەسمي تۇردە تانىلدى. ول 1884 جىلى دۇنيەگە كەلگەن، ءدال وسى جىلى فيۋرت پەن نيۋرنبەرگ تەمىر جول جەلىسىنىڭ قوسىلعان جىلى بولدى. ال 15 جىلدان...
