InfoHub Logo

ماقسات. قىران قۇس ۇشار شىڭىنىڭ ەڭ بيىگىنە جەتكەندە قاناتىن ايقارا جايادى. قاسقىر وتارعا شاپقاندا، بۇكىل قويدىڭ ءبىرازىن باۋىزداپ، اينالانى قىزىل قان قىلىپ، قىرىپ سالىپ، ىشىنەن بىرەۋىن تاڭداپ جەيدى. ال، ادام شە؟ ادام ماقساتقا جەتكەندە قالاي راقاتتانادى؟ ماقساتقا جەتكەندەگى جەڭىس ءدامى قانشالىقتى ءتاتتى؟ نەلىكتەن قينالىپ قول جەتكىزگەن تابىس جانىڭا جاقىنىراق، باسقا جەتىستىكتەردەن ماڭىزدىراق بولادى؟ مىسالى، مەن بيىل توعىزىنشى وقۋ جىلىن باستادىم. بيىلعى وقۋ جىلىن بايقاۋمەن باستاۋ مەنىڭ قىسقا مەرزىمدى ماقساتىم نەمەسە قىسقا ديستانسياداعى مارافونىم. ءومىر ادامدى جارىستا عانا وسىرە مە؟ الدە تابىسقا جەتۋ دەگەن - كۇشتىلىگىڭدى، ەپتىلىگىڭدى، قابىلەت - دارىنىڭدى، ءتىپتى مۇمكىندىگىڭدى كورسەتەتىن مەجە مە؟ ءدال سولاي سياقتى كورەمىن. ەندەشە، ءار ماقساتتىڭ ءوز شىڭى، وعان جەتۋدىڭ ءوز جولى بولاتىنى انىق. ەڭبەكپەن جەتكەن جەڭىس – حان ءتاڭىرى دە، كومەكپەن، دەمەۋمەن، يتەرمەلەۋمەن قولعا جۇسىرگەن تابىس – جاي عانا قوڭىر توبە. مەنىڭ وسى جىلداردا تىندىرعان ىستەرىم – ءوزىم ءۇشىن، ەڭبەك ەتىپ جۇرگەن ورتام ءۇشىن قانداي دا ءبىر تابىسقا قول جەتكىزگەندىگىمنىڭ ناتيجەسى. مەن بۇدان قانداي ءلاززات الدىم؟ ءوستىم، بۇل – انىق. ءبىراق ادام قالپىمدى قانشالىقتى ساقتاي الامىن؟ ەندى «ءبارىن ءبىلدىم، ۇيرەندىم، تولدىم»،- دەمەيمىن بە؟ جەڭىستىڭ ءتاتتى دامىنە ماسايراپ كەتكەن ادامدار جايىندا ەستىپ، كينودان كورىپ، عالامتوردان تانىپ ءجۇرمىن. بۇل بايقاۋ مۇعالىمگە نە ءۇشىن كەرەك دەرسىز؟ ءوزىم ءۇشىن! نە ىستەپ جۇرگەنىمدى ءوزىم بىلمەيتىن، قۇر ستاتيستيكا قۇربانى بولىپ جۇرگەن ۋاقىتتاردا بولدى. ۋاقىتتان دا ۇيالۋ قاجەت. مەنىڭ قازىرگى ماقساتىم – ءوزىمدى-وزىم جەتىلدىرىپ، الدىمدا وتىرعان قازاقستاننىڭ بولاشاق جاستارىن ادامي قاسيەتتەرگە يە ازامات(شا) قىلىپ تاربيەلەپ شىعارۋ. ءار جيىرما ءتورت ساعاتىنىڭ ون ساعاتى ۇيقىعا كەتسە، سەگىز ساعاتى، ياعني ۋاقىتىنىڭ كوپ بولىگى مەنىڭ جانىمدا جۇرەتىن جاندار ءۇشىن جاۋاپكەرشىلىكتەن نەگە قاشامىن؟ وزگەنى تاربيەلەپ، وقىتۋ ءۇشىن مەن ءوزىمدى تانىپ، ءوز ماقساتىم ايقىن بولۋى قاجەت. سوندا عانا ناقتى جەتىستىككە جەتەمىن. ماقساتى ايقىن شاكىرت تاربيەلەي الامىن. ءوزىم جاڭاشىل بولسام عانا جاڭارتىلعان ءبىلىم بەرە الامىن. كەشەگى ءان كەشىندە ۇلىقپان جولداسوۆتىڭ «ءسۇيۋدى بىلمەيتىن ادامدار وسىن-اۋ ومىردە نەسى بار» دەگەن ءان جولدارىنا ەلەڭ ەتە قالدىم. ءيا، مەن ءومىردى سۇيەمىن، ءوزىمدى دە، وزگەنى دە سۇيەمىن، جۇمىستى دا سۇيەمىن جانە سودان راقات تابامىن. وتىرىك ەمەس. مەن وسىدان 5-6 جىل بۇرىن ءومىردى مەن جۇمىستى ءسۇيۋ تۋرالى مۇلدە باسقاشا ويلايتىنمىن، ءوزىم دە باسقا ەدىم. ءقازىر ماقساتىما جەتىپ، شابىتتانىپ، ودان ءارى راقاتتانامىن.

---