Disney كومپانياسىنىڭ ادامدى شابىتتاندىرار 3 ساباعى
اۋەستىك، يننوۆاسيا جانە سيقىر تۋرالى...
1. «نەگە؟» دەگەن سۇراقتى جيىرەك قويىپ تۇرىڭىز
بالالارىڭىز بار بولسا نەمەسە ولارمەن كوپ سويلەسەتىن بولساڭىز (نەمەسە ءوزىڭىزدىڭ كىشكەنتاي كەزىڭىز ەسىڭىزدە بولسا)، بالالاردىڭ ەڭ سۇيىكتى سۇراعى — «نەگە؟» ەكەنىن البەتتە بىلەرسىز. ەرەسەكتەر ول سۇراقتى الدەقايدا سيرەك قويادى. ءبىز ايعاقتار مەن بايىپتى دەرەكتەرگە جۇگىنۋگە ۇيرەنىپ العانبىز، بۇل جاقسى. ءبىراق ءبىزدىڭ باسەكەلەستەرىمىز دە ءدال سول اقپاراتتى بىلەدى. بۇنداي جاعدايدا كوبىرەك نارسەگە قول جەتكىزۋ ءۇشىن بيزنەس-ستراتەگيانى قالاي قۇرعان ءجون؟ «نەگە؟» دەگەن سۇراقتى جيىرەك قويا بەرىڭىز.
مىسال رەتىندە ادامنىڭ ءبىر مەيرامحاناعا نە ءۇشىن ءجيى بارا بەرەتىنىن تالداپ كورەيىك:
► ءسىز نەگە سۇيىكتى مەيرامحاناڭىزعا بارا بەرەسىز؟ — ول ىڭعايلى جەردە ورنالاسقان، وعان قوسا تاماقتارى ساپالى.
► بۇل تاعام سىزگە نەگە ۇنايدى؟ — ول ءدامدى، قىمبات ەمەس.
► سوندا دا، ماڭايدا ۇقساس ورىندار كوپ بولسا دا، ءسىز نەگە ءدال وسى مەيرامحاناعا بارىپ ءجۇرسىز؟ — بۇل جەردىڭ قىزمەتى جاقسى.
► سىزگە بۇل جەردىڭ قىزمەتى نەگە ۇنايدى؟ — جاقسى سىيلايتىندارى سونداي، كوڭىلىم جايلانىپ شىعا كەلەدى.
► بۇلاي سىيلاعاننان نەگە كوڭىلىڭىز جايلانادى؟ — مەيرامحانا مەنەدجەرى ادامنىڭ اتىن ەسىندە ساقتاپ، كۇلىپ قارسى الادى. داياشىلار ەشقاشان اسىقتىرمايدى جانە شىن كوڭىلىمەن كۇننىڭ قالاي وتكەنىن سۇرايدى. كەيبىرەۋلەرى ءتىپتى ادەتتە قانداي تاعامعا تاپسىرىس بەرەتىنىمدى دە بىلەدى.
► بۇل نەگە ءسىزدى قايتا-قايتا وسى مەيرەمحاناعا بارا بەرۋگە ماجبۇرلەيدى؟ — بۇل جەردە ءوزىمدى وتباسى مۇشەسىندەي سەزىنەمىن، بۇل قازىرگى كەزدە وتە سيرەك بولاتىن جاعداي.
قايتا-قايتا سۇراق قويا وتىرىپ، مەكەمەگە دەگەن كوڭىل بۇرۋشىلىقتىڭ سەبەبى ناقتى ءبىر تاعامدار مەن ولاردىڭ باعاسىندا عانا ەمەس، سونداي-اق سول جەردە ءوزىڭدى قالاي سەزىنەتىنىڭە دە بايلانىستى ەكەنىن بايقادىق. قاي سالادا جۇمىس ىستەپ جۇرسەڭىز دە، ءسىز ءۇشىن كليەنتتەرىڭىز بەن ولاردىڭ قانداي سەزىمدە بولاتىنى بارىنەن دە ماڭىزدى بولۋى ءتيىس. سونىمەن قاتار «نەگە؟» دەگەن سۇراق كليەنتتەرىڭىزدى جاقسىراق ءتۇسىنىپ الۋىڭىزعا سەپ بولادى.
2. ميىڭىزدىڭ الفا-تولقىندارىن ىسكە قوسىڭىز
«ەگەر جاڭا ىنتالار پايدا بولماسا، جاڭا يدەيالار دا بولمايدى»، — دەپ Walt Disney Company يننوۆاسيالار جانە شىعارماشىلىق ءبولىمىنىڭ بۇرىنعى باسشىسى دۋنكان ۋوردل (Duncan Wardle) الدەنەشە رەت ايتقان. شىنىمەن دە سولاي. ۇنەمى ءبىر نارسەنى ىستەي بەرىپ، ءسىز ءوزىڭىزدى جاڭا بىردەڭە ويلاپ تابۋ مۇمكىندىگىنەن ايىراسىز.
ءوزىڭىزدىڭ ادەت بولىپ قالعان كۇن ءتارتىبىن وزگەرتىپ، ميىڭىزدىڭ الفا-ىرعاعىن ىسكە قوسۋعا تىرىسىپ كورىڭىز. مي تولقىندارىنىڭ بۇل ءتۇرى تىنىش جاعدايداعى سەرگەكتىك كۇيدە پايدا بولادى. عالىمدار ولاردىڭ (الفا-تولقىنداردىڭ) جوعارى دەڭگەيلى كرەاتيۆتىلىكپەن بايلانىستى ەكەنىن دالەلدەدى.
ءبىز بوساڭسىپ، ەركىن جۇرگەن كەزدە: ۆاننادا، سەرۋەندەپ جۇرگەندە، مەديتاسيا نەمەسە جاتتىعۋ جاساۋ كەزىندە باسىمىزعا كەرەمەت يدەيالار قوناقتايدى.
جۇمىس كۇنى ىشىندە الفا-ىرعاققا ەنۋ بىلاي تۇرسىن، تىنىش وتىرىپ ءبىر دەم الۋدىڭ وزىنە ۋاقىت بولماي قالىپ جاتادى. بۇنداي جاعدايدى وزگەرتۋگە تىرىسىڭىز. مىسالى، Google كومپانياسىنىڭ قىزمەتكەرلەرى ۋاقىتتارىنىڭ 20% ويلانىپ-تولعانۋعا جۇمساي الادى، وسىنىڭ ارقاسىندا Gmail، AdSense جانە «Google جاڭالىقتار» پايدا بولدى.
الفا-تولقىنداردى قولدانۋعا بولاتىن جۇمىس جاعدايىن جاساڭىز. مىسالى، كوماندانىڭ بۇكىل مۇشەلەرىنىڭ جينالىسىن بىرلەسىپ ىستەلەتىن جاتتىعۋعا نەمەسە مەديتاسياعا اۋىستىرىڭىز. ەگەر بۇل ءسىز ءۇشىن اسىرا سىلتەۋ بولىپ تابىلسا، جينالىس كەزىندە مۋزىكا ويناتىپ قويساڭىز بولادى. سونداي-اق جينالىستاردى رەسمي تۇرىنەن گورى جاي اڭگىمەلەسۋ رەتىندە وتكىزىپ كورىڭىز.
3. ءار ادامنىڭ شىعارماشىلىق تۇرعىدا الەۋەتى زور ەكەنىن ەستە ۇستاڭىز
شىعارماشىلىق — تەك «كرەاتيۆشىلەردىڭ» قۇزىرەتى دەپ بىلەتىن باسشىلار ءجيى قاتەلەسىپ جاتادى. ءبىراق بۇنداي الەۋەت اركىمدە دە بار. جاسامپازدىق الەۋەتىنىڭ كوزى اشىلۋى ءۇشىن قولايلى جاعداي تۋدىرۋ قاجەت.
►كەڭسە ديزاينىن وزگەرتىپ تاستاڭىز. ءار-الۋان بولىمدەردە ىستەيتىن ادامدار ءبىر بىرىمەن كەزدەيسوق جولىعىپ قالىپ، اڭگىمەلەسىپ كەتە الاتىنداي ەتىپ جۇمىس ورنىن قۇرىڭىز. ءدال وسىنداي اياقاستى بولعان اڭگىمەلەر كەزىندە جاڭا يدەيالار وتە ءجيى پايدا بولىپ جاتادى.
►«جاقسى» يدەيانىڭ تۇسىنىگىن وزگەرتىڭىز. ءبىر قاراعاندا قانشا جەردەن اقىلعا قونبايتىن بولىپ كورىنسە دە، جۇرتتىڭ ۇسىنعانىن كەرى ىسىرا بەرمەڭىز. ادامنىڭ قازىرگى ايتىپ تۇرعان يدەياسى ناشارلاۋ بولسا دا، كەلەسى يدەياسى كەرەمەت يدەيا بولىپ شىعۋى مۇمكىن. ونىڭ يدەيالارىن سالعان جەردەن سىناپ تاستاي بەرسەڭىز، كەلەسى جولى ول ويىنداعىسىن ايتپاي قويۋى مۇمكىن.
►پايىمداۋ ءتۇرىن وزگەرتىڭىز. باسشىلىق نەمەسە كرەاتيۆتىك ءبولىم كومانداداعى باسقا ادامداردان شىعارماشىلىق تۇرعىسىندا ارتىق دەپ ويلاۋدىڭ ءجونى جوق. كومپانيادا ءبىر بىرىنە سەپتەسۋ، قولداۋ مادەنيەتى دامىعان، ال ادامدار ءبىر ءبىرىن تەڭ كورەتىن بولسا، قىزمەتكەرلەردىڭ الەۋەتى ارتا تۇسەدى.
تەحنولوگيا + كرەاتيۆ = سىيقىر
جاساندى ينتەللەكتتىڭ دامۋىنا بايلانىستى ميلليونداعان جۇمىس ورىندارى اۆتوماتتاندىرىلادى. ءبىراق كرەاتيۆتىلىكتىڭ قۇنى ارتا بەرەدى. بۇل ءسىزدىڭ برەندىڭىزدىڭ سۋىرىلىپ العا شىعۋى ءۇشىن عانا ەمەس، سونداي-اق كەيىن باسقالارعا جەم بولماۋى ءۇشىن دە قاجەتتى ينگرەديەنت.
قازىرگى ءوز كومانداڭىزدىڭ تاپقىرلىعىن بارىنشا قولداپ، بولاشاقتا بارلىعىڭىز بىرلەسىپ ءوز سىيقىرلارىڭىزدى جاساۋ ءۇشىن كومانداڭىزعا ينۆەستيسيا سالاتىن ۋاقىت. ۋولت ديسنەي ايتپاقشى: «جوسپار جاساي بەرۋگە نەمەسە الەمدەگى ەڭ عاجايىپ جەردى تۇزۋگە بولادى. ءبىراق ارماندى اقيقاتقا اينالدىرۋ ءۇشىن ادام قاجەت».
وقۋعا كەڭەس بەرەمىز:
ۋولت ديسنەي جەتىستىگىنىڭ تاريحى
You Might Also Like
-
بۇگىن ۇكىمەت وتىرىسىنان كەيىن ق ر ءبىلىم جانە عىلىم ءمينيسترى اسحات ايماعامبەتوۆ مەكتەپتە وقۋشىلاردىڭ سىنىپ ەدەنىن جۋۋى باستاماسىنا قاتىستى پىكىر ءبىلدىردى.
-
«انا، ماما» ءسوزىنىڭ كەرەمەتتىلىگىن ەشكىم تۇسىنە بەرمەيدى. ول سوزگە يە بولۋعا كەز –كەلگەن ايەل ادامنىڭ قولىنان كەلمەيدى. نەگە دەيسىزبە؟
