InfoHub Logo

ءومىر... ءسىرا، ءومىر جايلى تولعانباعان، سىرلى قالامىمەن جىرلاماعان اقىن-جازۋشى دۇنيەدە جوق شىعار. تالاي عاسىردان بەرى «دۇنيە قالاي پايدا بولدى، ادام قالاي جاراتىلدى، ءومىردىڭ ءمانى نەدە؟» دەگەن سۇراقتار ادامزاتتى مازالاعانى داۋسىز. ول تۋرالى فيلوسوفتار، عالىمدار، ساياساتكەرلەر بىر-بىرىنەن ەرەكشەلەنەتىن تۇجىرىمدار كەلتىرگەن. مەندە ءوزىمنىڭ ومىرگە كوزقاراسىمدى، ءومىردىڭ ءمانى نەدە ەكەنىن ايتا كەتەيىن.

ەشتەڭەنى ويلاماي، الاڭسىز، ۋايىمسىز كۇن كەشىپ جۇرگەن بالالىق شاعىم. اجەمنىڭ ەرتەگىسىن تىڭداپ، اتامنىڭ اقىلىن ەستە ساقتاپ، اكەمە ەلىكتەپ، اناما ەركەلەپ، باۋىرلارىما قامقور بولىپ جۇرگەن باقىتتى كەزىم. اۋىلدىڭ تازا اۋاسىن جۇتىپ، دوستارىممەن ويناپ، ورىستەن قايتقان مالداردى تاماشالاپ، كۇننىڭ ىستىعىنا قاراماي قىزىق قۋىپ كەتەتىن شاتتىققا تولى بالالىق شاعىم. قولىما گۇل الىپ مەكتەپتىڭ تابالدىرىعىن  اتتاعان قورقىنىش پەن قىزىققا تولى ءسات، سىنىپتاستارىممەن جارىسىپ، ءمۇعالىمنىڭ ءتالىمىن الىپ، ءبىلىم قۋعان كەز. ءبارى وتكەننىڭ ەنشىسىندە. قايتا اينالىپ كەلمەيدى. ويتكەنى، بۇل ءومىر. ال، «ءومىر» دەگەن نە؟ بىرىنشىدەن، توقتاۋسىز زىمىراپ جاتقان التىن ۋاقىت. ەكىنشىدەن، كۇندەلىكتى كۇيبەڭ تىرشىلىك. ۇشىنشىدەن، وتباسى، مەكتەپ، جۇمىستى ويلاپ ءوتىپ جاتقان كۇنىڭ... ءسىزدىڭ ءومىرىڭىز قالاي وتۋدە؟ وسى جاسىڭىزعا دەيىن ىستەگەن ىستەرىڭىز، ۋاقىتىڭىزدى قالاي جۇمساپ جاتقانىڭىز جايلى ويلاناسىز با؟

ادام ادام بولىپ جاراتىلعاننان بەرى ءبىراز ۋاقىت ءوتتى. سول ۋاقىت ارالىعىندا ادامزات سوعىس، جۇت، تابيعي اپات جانە باسقا دا قيىنشىلىقتاردى باسىنان وتكىزدى. ءوز قولدارىمەن جاسالعان ارەكەت قانشاما. وسىدان كىم قانداي پايدا كوردى؟ ولار ءۇشىن ءومىردىڭ ءمانى نەدە؟

ادامداردىڭ ارماندارى، ماقساتتارى، قالاۋلارى ءار ءتۇرلى بولادى. بىرەۋى – باي بولسام، مەنىڭ اتىمدى دۇنيەجۇزى بىلسە ەكەن، ەكىنشىسى – ادامدارعا قالاي كومەك كورسەتسەم، ولاردى تازا جولعا تۇسىرسەم ەكەن دەسە، ءۇشىنشىسى – تەك ءبىر ساتتىك ءلازاتتى ىزدەپ، ويىن-ساۋىقتان قۋانىش تابادى. ولار ءۇشىن ءومىردىڭ ءمانى وسىلار. جانە وزدەرىنىڭ ارمان-ماقساتتارىنا جەتكەننەن كەيىن ريزا بولىپ، قاناعاتتانبايدى. نە سەبەپتى؟ ءسىز سول جايىندا ويلانىپ كوردىڭىز بە؟

سىزگە «ءومىردىڭ ءمانى نەدە؟» دەپ سۇراق قويسا مىندەتتى تۇردە ويلاناسىز. ەس بىلگەن كەزىڭىزدەن قازىرگى شاققا دەيىنگى ءومىرىڭىزدى تىزبەكتەپ وي ەلەگىنەن وتكىزىپ شىعاسىز. جىبەرگەن قاتەلىك، وتكىزىپ العان مۇمكىنشىلىككە وكىنەسىز، شىنايى قۋانعان، باقىتتان گۇلدەي جايناعان كەزدەردى ساعىناسىز، العاش عاشىق بولىپ، ماحابباتتىڭ ارباۋىنا بايلانعان بالداي ءتاتتى ساتتەردى اڭسايسىز. سودان كەيىن ءومىردىڭ ءمانىن تۇسىنەسىز. ول ءسىز ءۇشىن قاتەلىكتەر جىبەرگەن وتكەن ءومىرىڭىز جانە سول قاتەلىكتەردەن ساباق العان بۇگىنگى ءومىرىڭىز بولۋى مۇمكىن. ەڭ باستىسى، وتباسى جانە دوستارىڭىزدىڭ ورتاسىندا وتكەن ءاربىر ساعات، مينۋتىڭىز.

ال، مەن ءۇشىن ءومىردىڭ ءمانى – وتباسىم، جانىما جاقىن دوستارىمنىڭ اماندىعى، ەلىمنىڭ تىنىشتىعى مەن بەيبىتشىلىگى. مەنىڭ قالاۋىمنان تىس زۋلاپ جاتقان ومىرىمدە وكىنبەيتىن، ەسكە السام جىميىپ كۇلەتىن باقىتقا تولى ساتتەر كوپ. ادامعا ءومىر سۇرۋگە ءبىر عانا مۇمكىندىك بەرىلگەن. كوزدى اشىپ جۇمعانشا زىمىرايتىن مۇمكىندىك. قۇر ەرىنشەكتىك قىلىپ جاتپاي، بۇگىنگى ءىستى ەرتەڭگە قالدىرماي ەڭبەك ەتۋ كەرەك جانە ءبىلىمىڭدى ودان سايىن جەتىلدىرىپ، يگى ىستەر جاساپ، وكىنبەيتىن عۇمىرلى ءومىر ءسۇرۋ كەرەك.

 

---