InfoHub Logo

قارا كۇشىنە ماساتتانعان ءبىر ماقتانشاق بالۋان:

— بالۋان اتاۋلىنىڭ ءبارىن جىعىپ بولدىم. ەندى كىم قالدى مەنىمەن ۇستاساتىن، — دەپ جار سالىپتى.

ماقتانا سويلەيتىن كىسىنى جانى جەك كورەتىن ءبىر قاراپايىم ارىق جىگىت:

— مەن كۇرەسەمىن، — دەپ حالىقتى كۋا قىلىپ، ماقتانشاق بالۋانعا قارسى شىعىپتى. بالۋان تىرتىيىپ تۇرعان ارىق جىگىتتى كەلەمەجدەپ:

— بەل ومىرتقاڭ ۇزىلەدى عوي، سورلى، — دەپتى.

جىگىت:

— ۇزىلسە ءۇزىلسىن، ماعان سونىسى كەرەك. سوندىقتان مىنا شارتپەن كۇرەسەيىك: ۇستاسا كەتكەندە ءبىرىمىزدى ءبىرىمىز قىسىپ ويبايلاتايىق. سول جىققان بولىپ ەسەپتەلسىن، — دەگەن ەكەن.

كۇشىنە سەنگەن بالۋان جىگىتتى كەكەتە-مۇقاتا كەلىسىمگە كەلىپتى. جيىلعان حالىق كۋا بولا ماقتانشاق بالۋاننىڭ جىعىلۋىن تىلەپتى. سول ەكى ارادا ەكى بالۋان ۇستاسا كەتىپتى. شىن بالۋان جىگىتتىڭ بەلىن ءۇزىپ جىبەرمەكشى بولىپ، سويىلداي قولىن ويقاستىرا بەرگەندە، جىگىت الاقانىنا قىسقان تەبەنىن بەلىنە سۇعىپ الىپتى دا لاقتىرىپ جىبەرىپتى. بالۋاننىڭ جان داۋسى شىعىپ، جىگىتتى قويا بەرىپ، ىتىپ كەتىپتى. جيىلعان جۇرت «جىعىلدىڭ» دەسىپ، ماقتانشاقتى مازاقتاپ، جىگىتكە العىس ايتىسىپتى. ىزالانعان بالۋان داۋرىعا وزەۋرەپ:

— الدادى، دەنەمە ءبىر پالەنى تىعىپ الدى. نانباساڭدار قاراڭدار، قانى اعىپ تۇر، — دەپ كويلەگىن شەشىپتى. جۇرت قاراسا قان تۇگىلى سايتان دا جوق. «بۇل قالاي» دەپ اڭ-تاڭ بولعان بالۋانعا جۇرت:

— بالۋاندىعىڭ جاقسى، ماقتانشاقتىعىڭ جامان. ماقتانشاقتىڭ جولى ءبىر-اق تۇتام، — دەسىپتى.

سونىمەن، قاراپايىم جىگىت قان شىعارمايتىن دارىمەن دارىلەنگەن تەبەنمەن ماقتانشاقتىڭ ءۇنىن اقىل-ايلامەن وشىرگەن ەكەن.

---