InfoHub Logo

وتكەندە مەكتەپ ديرەكتورى ءبىر جيىندا وقۋشىلاردى ۇنەمى ماقتاپ تۇرۋىمىزدى سۇرادى. بۇل كوپتەگەن ماسەلەلەردىڭ الدىن الاتىنىن جانە بالانىڭ ءتىلىن تابۋ، مەرەيىن ءوسىرۋدىڭ العىشارتى ەكەنىن ەسكەرتتى. راسىندا، وسى ءبىز ماقتاۋدى جاقسى كورەمىز دە، بىرەۋدىڭ جەتىستىگىن اسىرىپ ماقتاۋ، لەبىز ءبىلدىرۋ، نيەتتەس بولۋ دەگەن سياقتى قاسيەتتەردەن كەم ەكەندىگىمىزدى سەزىندىم. ءوزىڭىز ويلاڭىزشى: ءسىزدى كوپشىلىكتىڭ الدىندا ماقتاۋىڭىزدى اسىرىپ، مىقتى ارىپتەس، مامان رەتىندە باعالاسا، مەرەيىڭىز ءوسىپ، كوڭىلىڭىزدە قۋانىش كەرنەيدى ەمەس پە؟ ءدال سولاي بالالارىمىزدىڭ نەمەسە وقۋشىلاردىڭ كىشكەنتاي بولسا دا جەتىستىكتەرىن اۋىزعا الىپ، كوپشىلىككە جەتكىزە بىلسەك، ول بالانىڭ بولاشاقتاعى تالپىنىسى مەن تالابىنا ايرىقشا اسەر ەتەتىنىن ءسوزسىز.

سونىمەن ءبىز كۇندەلىكتى بالاعا قانشا رەت ماقتاۋ ايتامىز. جانە ونىڭ جەتىستىگى ءۇشىن نەمەن ماراپاتتاپ جاتىرمىز؟

1. بالاڭىز سايىستان نەمەسە وليمپيادادان ماقتاۋ قاعازدارىمەن ورالسا، جاي عانا "جارايسىڭ!" دەپ ايتىپ قويا سالۋ جەتكىلىكسىز. "سەن مەنىڭ ءۇمىتىمدى اقتادىڭ، سەنەن مىقتى عالىم، جۋرناليست، ادەبيەتشى شىعادى" دەگەن سياقتى ماداقتاۋ سوزدەر ايتۋىمىزدى ۇمىتپاۋىمىز ءتيىس.

2.  كۇندەلىكتى العان باعالارىمەن ماقتانۋ بالانىڭ ادەتى. ونداي ساتتەردە "جاقسى وقۋ-سەنىڭ مىندەتىڭ!" دەپ بالاعا جۇك ارتپاي، "مەن دە كەزىندە كۇندە جاقسى باعا الۋشى ەدىم، سەن وزىمە تارتقان وزاتسىڭ، سەنىمەن ماقتانامىن" دەگەن سوزدەرمەن ءوزىڭىزدىڭ ارتىڭىزدان ەرىپ كەلە جاتقان ۇرپاعىڭىزبەن ماقتانعانىڭىز دۇرىس. ادەتتە، بالالار ءوز اتا-اناسىنا ەلىكتەپ، سولارعا ۇقساپ باققىسى كەلەدى.

3. ەشقاشان بالاڭىزدى كورشىڭىزدىڭ نەمەسە تۋىستارىڭىزدىڭ بالالارىمەن سالىستىرماڭىز. سالىستىرۋ-بالانىڭ جەكە تۇلعا رەتىندەگى "مەندىگىن" ءولتىرۋ دەگەن ءسوز. "جۇرتتىڭ بالاسى" تىركەسى قانشاما بالالاردىڭ جامان كومپلەكستەرىن تۋدىرىپ، ءومىر بويى ونىمەن كۇرەسۋگە يتەرمەلەگەن. ءول-سىزدىڭ بالاڭىز. جانە ول باسقالارعا ۇقساۋعا مىندەتتى ەمەس! ءارقاشان بالاعا: "سەن ەرەكشەسىڭ، ويتكەنى سەن مەنىڭ بالامسىڭ، سەنەن ارتقى بالا ماعان كەرەك ەمەس" دەگەن سوزدەر بالانىڭ مەرەيىن ءوسىرىپ، وزىنە دەگەن سەنىمدىلىگىن ارتتىرادى.

4. بالانىڭ ەندى دامىپ كەلە جاتقان شىعارماشىلىعىن دامىتاتىن دا اتا-انا. ويتكەنى العاش رەت قولىنا قالام الىپ سۋرەت سالۋ، ولەڭ جازۋ، ءان سالۋ، مۋزىكالىق اسپاپتاردى مەڭگەرۋدە العاشقى پىكىر ايتۋشى-اتا-اناسى بولادى. وسى كەزدە جاقسى ماداقتاۋلار تالانتتى بالالاردىڭ دۇنيەگە كەلۋىنە سەپتىگىن تيگىزەدى.

5. بالانىڭ ءبىرىنشى قادامىنا ۇنەمى قولداۋ ءبىلدىرىڭىز. بالا ۇنەمى قولداۋ، ماداقتاۋعا مۇقتاج. ءوز قولىڭىزبەن بالاڭىزدىڭ بولاشاعىنا بالتا شاۋىپ جۇرمەڭىز. ءسىز قالاي ماقتاۋ سۇيسەڭىز، ءوز پەرزەنتىڭىز دە ماقتاۋدى، جىلى لەبىز ءبىلدىرىپ، قولداۋ كورسەتىڭىزدى شىن جۇرەكتەن قالايدى. جۇرەگىڭىز بالاعا كەلگەندە ءاردايىم تازا بولعاي!

---