InfoHub Logo

باسى: دوفامين، نەيروبيولوگيا جانە نەيروماركەتينگ: نەگە قالاۋ سەزىمىن باقىتپەن شاتاستىرامىز

ەكىنشى ءبولىمى: سۇرانىس بويىنشا بولىنەتىن دوفامين

ءۇشىنشى ءبولىمى: ءسىزدىڭ دوفامينەرگيالىق نەيروندارىڭىز نەدەن بولىنەدى؟

ءتورتىنشى ءبولىمى: ءدوفاميننىڭ اسەرىندەگى ميىڭىز: نەيروماركەتينگ سەرپىلىسى

بەسىنشى ءبولىمى: دوفامين تىڭشىسىنا اينالىڭىز

التىنشى ءبولىمى: تاجىريبە: ءدوفاميندى «مەنىڭ قالاۋىم» دەگەن كۇشىڭىزدى سىناۋعا باعىتتاڭىز

ولدس ەگەۋقۇيرىعىنىڭ تاماقتان باس تارتىپ، توردىڭ توك جۇرگىزىلگەن ەدەنىندە ارى-بەرى جۇگىرگەنىن كوردى، ءبىراق دوفاميننىڭ سەبىمەن تۋىنداعان ءوز ارەكەتىمىزدى تۇسىنۋگە تىرىسقاندا كوبىمىزدىڭ جاسايتىن قاتەلىگىمىزدى جاسادى. ويىمىز جيناقى، ۇنەمى ىزدەگەن نارسەمىزگە ۇمتىلامىز، قالاعان نارسەمىزگە قول جەتكىزۋ ءۇشىن جۇمىس ىستەۋگە — ءتىپتى قينالۋعا دا دايىنبىز. قالاۋمىزداعى نىسان بىزگە باقىت سيلايتىنداي بولىپ كورىنەدى. مىڭىنشى شوكولاد، جاڭا ءاسۇي جابدىعىن ساتىپ الامىز، تاعى ءبىر ستاقان ىشىمدىك، جاڭا شىنايى دوس، جاقسىراق جۇمىس، جوعارى تابىس ىزدەپ ءوزىمىزدى شارشاتامىز. قالاۋدان تۋعان الاڭداۋدى باقىتتىڭ كەپىلىمەن شاتاستىرامىز. ولدستىڭ ءوز-وزىن ابدەن قيناعان ەگەۋقۇيرىقتارى باقىتقا كەنەلىپ جاتىر دەپ ويلاعانى تاڭقالارلىق نارسە ەمەس. ءبىز، ادامدار، نەگىزىندە ماراپاتتان دامەلەنۋدى كەز كەلگەن قۋانىشتان نەمەسە ىزدەگەن ماراپاتتان اجىراتا المايمىز.

ماراپاتتىڭ ۋادەسى مىقتى، سول سەبەپتى بىزگە باقىت سىيلامايتىن نارسەنىڭ سوڭىنان قۋىپ جۇرە بەرەمىز، راقاتتان گورى ازاپ بەرەتىن نارسەنى تۇتىنامىز. ويتكەنى ماراپاتتىڭ ارتىنان ەرۋ — ءدوفاميننىڭ باستى مىندەتى، ءتىپتى ناتيجە ۋادەگە ساي بولماي تۇرسا دا — ول سىزگە توقتا دەپ بۇيرىق بەرمەيدى. كورنەلل ۋنيۆەرسيتەتىندەگى تاعام مەن برەندتەردى زەرتتەۋ زەرتحاناسىنىڭ جەتەكشىسى برايان ۋونسينك «فيلادەلفيا» كينوتەاترىنىڭ كورەرمەندەرىمەن ازىلدەسۋ ارقىلى وسىنى دالەلدەدى. پوپكورننىڭ ءتۇرى مەن ءيىسى — كوپتەگەن ادامداردىڭ دوفامينەرگيالىق نەيروندارىن قوزدىرۋدىڭ سەنىمدى ءادىسى: كەلۋشىلەر پاۆلوۆتىڭ يتتەرىنە ۇقساپ، تىلدەرى سالاقتاپ، سىلەكەيلەرى اعىپ پوپكورننىڭ العاشقى ۋىسىنان دامەلەنىپ كەزەكتە تۇرادى. ۋونسينك كينوسۇيگىش قاۋىمعا ەكى اپتا بۇرىنعى پوپكورندى ساتىپ، وتكىزىپ جىبەردى. ادامدار كينوعا الدانىپ، مۇنى جەي مە، الدە ولار ونىڭ شىن ءدامىن سەزىپ، لاقتىرىپ تاستاي ما، سونى تەكسەرگىسى كەلدى.

فيلمنەن كەيىن كورەرمەندەر ەكى اپتالىق پوپكورننىڭ جامان: قاتىپ قالعان، ەسكىرگەن، جابىسقاق جانە جۇرەك اينىتارلىقتاي بولعانىن ايتقان. ءبىراق ولار اقشالارىن قايتارىپ بەرۋدى تالاپ ەتىپ دۇڭگىرشەكتەرگە ۇمتىلدى ما؟ جوق، ولار ونى جەپ قويدى. ولار ءدام رەسەپتورلارىنا ەمەس، دوفامينەرگيالىق نەيروندارىنا سەنگەن.

بۇل قالاي بولۋى مۇمكىن دەپ ويلانىپ قالۋىمىز مۇمكىن. ءبىراق بۇعان توتەپ بەرەتىندەر كوپ ەمەس. «مەن باس تارتامىن» دەگەن كۇشىڭىزدى سىناپ كورگەن كەزىڭىزدى ەسكە ءتۇسىرىپ كورىڭىز. قالاۋىڭىزعا قول جەتكىزگەندە قۋانىشقا بولەنگەندەي نەمەسە بولەنەتىندەي بولىپ تۇيىلگەن سياقتى سەزىم شىعار. دەگەنمەن الاڭداۋ مەن ونىڭ سالدارلارىنا ناقتى اناليز جاساۋ كوبىنە مۇلدە باسقا نارسەنى كورسەتەدى. ءارى كەتسە قىزىعۋعا بەرىلىپ، ونى قاتتىراق قالاۋ ءۇشىن ماراپات ۋادەسىنەن تۋىنداعان الاڭداۋ سەزىمىنەن ارىلاسىز. سوڭىندا ءوزىڭىزدى شارشاعان، رازى ەمەس، كوڭىلى قالعان، ماسقارا بولعان، اۋرۋ نەمەسە بۇعان دەيىنگىمەن سالىستىرعاندا باقىتسىزداۋ بولىپ سەزىنەسىز. ەگەر ادامدار جالعان ماراپاتقا قول جەتكىزگەندەگى سەزىمدەرىن جاقسىلاپ زەردەلەپ قاراسا «سيقىردىڭ» تاراعانىن كورەدى. ەگەر ميىڭىزدىڭ كۇتكەن نارسەسى (باقىت، ءلاززات، راحات، ۋايىم مەن كۇيزەلىستىڭ اياقتالۋى) مەن ءسىزدى اكەپ سوقتىرعان نارسەسىن سالىستىرۋدى ماجبۇرلەسەڭىز، ۋاقىت وتە ول كۇتۋدى ۇيرەنەدى. ماسەلەن، ەگەر تاماق سۇيەر قاۋىم قوماعايلىقتى وياتاتىن تاعامدى باياۋىراق جەي باتاسا، ادەتتە ولار تاعامنىڭ ادەمى جانە حوش ءيىستى، ءبىراق اسا ءدامدى ەمەس ەكەنىن بايقايدى. ەگەر دە اۋىزدارى مەن اسقازاندارى تولىپ تۇرسا، ميلارى ءبارىبىر قوسىمشا تاماقتى سۇراتا بەرەدى. تاماقتانۋ بارىسىندا ولاردىڭ ۋايىمى كۇشەيە تۇسەدى: كەيدە ولار تىم تەز جۇتقاندىقتان، ءتىپتى ءدامىن دە سەزبەيدى، ال سودان كەيىن وزدەرىن فيزيكالىق جانە رۋحاني تۇرعىدان تاماقتانۋدان الدىنداعىدان دا ناشار سەزىنەدى. باسىندا بۇل ابىگەرگە سالۋى مۇمكىن: تۇپتەپ كەلگەندە ولار تاعامنىڭ باقىت كوزى ەكەنىنە شىنىمەن سەندى ەمەس پە؟ دەگەنمەن، زەرتتەۋلەر مۇقيات تاماقتاناتىن ادامنىڭ تاماقتانۋ ماسەلەسىندە وزدەرىن قولدا جاقسىراق ۇستاي باستاعانىن جانە ارتىق تاماقتانۋدان دا ۇزاقتاۋ بولاتىنىن كورسەتەدى. ۋاقىت وتە كەلە ولار ارتىق سالماقتان ارىلىپ قانا قويماي، كۇيزەلىس، الاڭداۋشىلىق پەن تۇنجىراڭقى كوڭىل-كۇيگە دە ازىراق دۋشار بولادى. ءوزىمىزدى جالعان ماراپاتتاردىڭ ۋادەسىنەن ارىلتقاندا، باقىت ىزدەگەن نىسانىمىز قايعىلارىمىزدىڭ ەڭ باستى قاينار كوزى بولاعانىن بايقايمىز.

تاجىريبە: ماراپاتتىڭ ۋادەسىن تەكسەرىڭىز

ميىڭىز باقىتقا كەنەلتەم دەپ سەندىرگەندىكتەن ۇنەمى بەرىلىپ كەتەتىن ەلىكتىرگىشتەن كۇتكەن سىيدىڭ قانشالىق راس ەكەنىن تەكسەرىڭىز. مەنىڭ ساباقتارىمدا كوبىنە تاماق، دۇكەن ارالاۋ، تەلەديدار جانە عالامتوردا ەلەكتروندى پوشتادان باستاپ، پوكەرگە دەيىن ۋاقىت وتكىزۋدى تاڭدايتىن. كوڭىل كوتەرۋگە ابايلاپ كىرىسىپ، ءبىراق وعان بەرىلىپ كەتۋدەن اۋلاق بولىڭىز.

سىزگە ماراپاتتىڭ ۋادەسىن سىيلايتىن نە نارسە ەكەنىن: دامەتۋ، ءۇمىت، قۋانىش، الاڭداۋشىلىق، سىلەكەيدىڭ ءبولىنۋى — ميىڭىز بەن تانىڭىزدە بولاتىن بارلىق وزگەرىستەردى بەلگىلەڭىز. سودان سوڭ بۇعان بەرىلىڭىز. قىزىقتىرۋ بارىسىنداعى سەزىم مەن كۇتۋ اراسىنداعى ايىرماشىلىق قانداي ەكەن؟ ماراپاتتىڭ ۋادەسى جوعالدى ما، الدە ول ءسىزدى ءالى دە كوبىرەك تاماقتانۋعا، كوبىرەك اقشا جۇمساۋعا جانە ۇزاعىراق وتىرۋعا يتەرمەلەيدى مە؟ ابدەن قاناعاتتاناتىن ۋاقىتىڭىز قاشان بولادى (جالپى ونداي بولادى ما)؟ الدە تىم كوپ تاماقتانعاندىقتان، شارشاعاندىقتان، اشۋلانعاندىقتان، كەشىككەندىكتەن نەمەسە «ماراپات» تاۋسىلعاندىقتان ءارى قاراي جالعاستىرا المايتىن كەزگە جەتەسىز بە؟

بۇل جاتتىعۋدى جاساپ كورەتىن ادامدار ادەتتە ەكى ناتيجەنىڭ ءبىرىن بايقايدى. ءلاززات تاجىريبەسىنە مۇقيات نازار ءسالعانداردىڭ كەيبىر وزدەرى كۇتكەننەن الدەقايدا ازىمەن قاناعاتتاناتىنىن بايقايدى. باسقالارى تاجىريبەنىڭ مۇلدە قاناعاتتاندىرمايتىنىن، ماراپاتتىڭ ۋادەسى مەن شىن باستان وتكەن نارسەنىڭ اراسىدا ۇلكەن ايىرماشىلىق بار ەكەنىن انىقتايدى. ەكى زەرتتەۋ دە باسقارا المايتىنداي بولىپ كورىنگەن جاعدايدا ءوز-وزىڭىزدى جاقسىراق باسقارۋعا كومەكتەسەدى.

قالاۋدىڭ ماڭىزدىلىعى

دارىگەردەن ءدوفاميندى باسىپ تاستايتىن ءدارىنى سۇراماس بۇرىن، ماراپاتتىڭ ۋادەسى سەزىمىنىڭ جاعىمدى جاقتارىنا نازار اۋدارۋ كەرەك. ءبىز قالاۋىمىز بەن باقىتتى شاتاستىرعاندا شىنىمەن دە كەلەڭسىزدىكتەرگە تاپ بولامىز، ءبىراق قالاۋدى جوعالتۋ دا ماسەلەنىڭ شەشىمى ەمەس. قالاۋى جوق ادامنىڭ ءومىرى ءوز-وزىن باسقارۋدى قاجەت ەتپەس، ءبىراق ول مانىنەن دە ايرىلادى.

تاۋەلدىلىگى بار ادام اۋەستىگىن جوعالتادى

ادام مۇلدە ۇستامدى جان ەمەس ەدى. ول 33 جاستا بولاتىن، ادەتتە كۇنىنە 10 بوكال ءسپيرتتى ىشىمدىك ءىشىپ، ءبىر شىمشىم كوكاين قولداناتىن، كەيدە بۇعان ەكستازيدەن قوساتىن. ول بۇرىننان، توعىز جاسىنان باستاپ ىشەتىن، كوكايندى 13 جاسىنان يىسكەي باستادى جانە ەرەسەك جاسىندا ماريحۋانا، كوكاين، وپيات جانە ەكستازيگە تاۋەلدى بولدى.

بارلىعى ونى وتىرىستان رەانيماسياعا اكەتكەن كۇنى وزگەردى: تەكسەرىس كەلگەندە ول پوليسيا الىپ كەتپەس ءۇشىن، وزىندە بار ەسىرتكىلەردى تەز قابىلداپ الدى (بۇل قيسىندى شەشىم ەمەس، الايدا ونىڭ اقىل-ەسىن تولىق بىلمەگەنىن ەسكەرۋ كەرەك). كوكاين، ەكستازي، وكسيدون مەن مەتادوننىڭ ءقاۋىپتى كومبيناسياسى ولىمگە اكەپ سوقتىراتىن ارتەريالدى قىسىمنىڭ ارتۋىنا سەبەپ بولا جازدادى جانە ميعا وتتەگىنىڭ بارۋىن قىسقارتتى.

ونىڭ ەسىن جيدىرىپ، اقىرىندا ەمحانادان شىعارعانىمەن، وتتەگىنىڭ ۋاقىتشا جەتىسپەۋشىلىگى ءبارىبىر ءوز ناتيجەسىن كورسەتتى. ادام ەسىرتكى مەن الكوگولگە دەگەن اۋەستىگىنىڭ ءبارىن جوعالتىپ الدى. ول بۇلاردى مۇلدە قابىلدامايتىن بولدى، مۇنى كەلەسى جارتى جىلدىقتاعى مەديسينالىق سىناقتار كورسەتتى. بۇل عاجايىپ وزگەرىس رۋحاني كەمەلدىك ەمەس ەدى — ول ءولىم اۋزىنان امان قالعان ساتىنەن ەسىن تولىق جيماعان. ادامنىڭ ءوزى ايتقانداي، ول بار بولعانى پسيحوبەلسەندى زاتتاردى تۇتىنۋعا دەگەن قالاۋىن جوعالتىپ العان.

بۇل جاقسى وزگەرىس بولىپ كورىنۋى مۇمكىن، ءبىراق ول كوكاين مەن الكوگولگە دەگەن قالاۋىن عانا جوعالتقان جوق. ادام بار قالاۋىنان ايرىلدى. ول ءوزىن قۋانتاتىن ەشتەڭە ويلاپ تابا المادى. ونىڭ قورقىنىشى دا، زەر سالۋ قابىلەتى دە جوعالدى، ول نەمقۇرايلى ادامعا اينالدى. ءلاززاتتى كۇتۋ قابىلەتىمەن بىرگە ءۇمىتىن دە جوعالتىپ، تەرەڭ كۇيزەلىسكە ۇشىرادى.

قالاۋىنىڭ جوعالۋىنا اكەپ سوقتىرعان نە؟ ادامدى ەمدەگەن كولۋمبيا ۋنيۆەرسيتەتىنىڭ پسيحياترلارى ونىڭ ميىنىڭ توموگرافياسىنىڭ ناتيجەلەرىن زەرتتەپ، بۇل سۇراقتىڭ جاۋابىن تاپتى. ەسىرتكىنى شەكتەن تىس قولدانۋ كەزىندەگى وتتەگى جەتىسپەۋشىلىگى ونىڭ قۋاتتاۋ جۇيەسىن زاقىمداعان.

ادامنىڭ جاعدايى «امەريكانىڭ پسيحياتريالىق جۋرنالىندا» جاريالاندى. وتە ەرەكشە جاعداي: ادام تاۋەلدىلىكتەن زارداپ شەگىپ ءجۇردى دە، كەنەتتەن «مەن قالايمىن» دەگەن كۇشىنەن تولىق ايرىلىپ قالدى. ءبىراق باقىتتان دامەتۋ قابىلەتىن جوعالتاتىن باسقا دا ادامدار بار. پسيحولوگتار بۇل كۇيدى انگەدونيا (تۋرا اۋدارعاندا «ءلاززاتسىز») دەپ اتايدى. انگەدونياسى بار ادامدار ءومىردى راحاتتانۋدى كۇتپەيتىن ادەتتەردىڭ جيىنتىعى سياقتى سۋرەتتەيدى. ولار تاماقتانىپ، زاتتار ساتىپ الىپ، سويلەسىپ، جىنىستىق قاتىناسقا تۇسە الادى، ءبىراق ولار ءلاززات  كۇتپەيدى. ال ءلاززات الۋ مۇمكىندىگى جوعالعاندا، ۇمتىلىس، موتيۆاسيا دا جوعالادى. ءوزىڭىزدى قۋانتاتىن نارسە ويلاپ تابا الماساڭىز، توسەكتەن تۇرۋ دا وڭاي ەمەس. قالاۋدان مۇلدە ارىلۋ ۇمىتتەن، ءتىپتى كوپتەگەن ادامداردى — ومىرگە دەگەن قۇشتارلىقتان دا ايىرادى.

قۋاتتاۋ جۇيەسى تىنىشتالعان كەزدە، ادام رازىلىقتى ەمەس، زاۋىقسىزدىقتى، اپاتيانى سەزىنەدى. سوندىقتان ميلارى ءدوفاميندى مۇلدە دەرلىك بولمەيتىن پاركينسون سىرقاتىنا شالدىققان ناۋقاستاردىڭ كوپشىلىگى تىنىشتىقتى ەمەس، باسىلىپ، جانشىپ قالعان كۇيدى باستان كەشىرەدى. شىن مانىندە، ءقازىر نەيروبيولوگتار قۋاتتاۋ جۇيەسى قىزمەتىنىڭ السىرەۋىن كۇيزەلىستىڭ بيولوگيالىق نەگىزى دەپ سانايدى. عالىمدار كۇيزەلىس كەزىندە ادامداردىڭ ميى قالاي جۇمىس ىستەيتىنىن زەرتتەگەن: ولاردىڭ قۋاتتاۋ جۇيەسى ءتىپتى بىردەن، اپ-ساتتە ماراپاتقا يە بولعان جاعدايدا دا ارەكەت ەتە المايتىن بولىپ شىقتى. ازداعان بەلسەندىلىك نىشانى بار، ءبىراق ول «مەن قالايمىن» جانە «تالپىنۋعا دايىنمىن» دەگەن تۇرتكىلەردىڭ ويانۋى ءۇشىن جەتكىلىكسىز. ادامدار قىزىعۋشىلىعى مەن ۇمتىلىسىن، موتيۆاسياسىن جوعالتادى — كۇيزەلىس، دەپرەسسيا دەگەن دە وسى.

ماراپاتتىڭ قاراما-قايشىلىعى

ستۋدەنتتەرىمنىڭ كوپشىلىگى سياقتى، ءسىز دە ەندى نە ىستەۋ كەرەك دەپ سۇرايتىن شىعارسىز. سىيدىڭ، ماراپاتتىڭ، ۋادەسى باقىتقا كەپىلدىك بەرمەيدى، ءبىراق ماراپات ۋادە ەتىلمەسە، باقىتسىز بولارىمىز انىق. ەگەر وعان قۇلاق اسساق ازعىرىلامىز. ءبىراق ونسىز ءبىزدى ەشتەڭە قىزىقتىرا المايدى.

بۇل ناعىز ديلەمما جانە ونى شەشۋ وڭاي ەمەس. ماراپاتتىڭ، سىيدىڭ ۋادەسى ءبىزدى ومىرگە ۇمتىلدىرۋ ءۇشىن كەرەك ەكەنى انىق. ءساتى تۇسسە، قۋاتتاۋ جۇيەسى بىزگە مۇنى عانا بەرمەي — بىزگە قارسى شىقپايدى دا دەپ ۇمىتتەنەيىك. ءبىز ۇنەمى قالاۋىمىزدى تۋدىرىپ جانە سول قالاۋدى سيرەك قاناعاتتاندىراتىن تاۋلىك بويعى مۇمكىندىكتەر، تەحنولوگيا مەن جارناما الەمىندە ءومىر سۇرەمىز. ەگەر ءوز-وزىمىزدى باسقارعىمىز كەلسە، ومىرىمىزگە ءمان بەرەتىن شىنايى ماراپاتتاردى كوڭىلدى ارباپ، تاۋەلدىلىك تۋدىراتىن جالعان ماراپاتتاردان ايىرۋدى ۇيرەنۋىمىز كەرەك. مۇنى ۇيرەنۋ قولىمىزدان بار كەلگەننىڭ ەڭ دۇرىسى شىعار. بۇل وڭاي بولا بەرمەيدى، ءبىراق ميدا بولىپ جاتقان نارسەلەردى ءتۇسىنۋ ماسەلەنى ازداپ جەڭىلدەتۋى مۇمكىن. ولدس پەن ميلنەردىڭ تەتىكتى باساتىن ەگەۋقۇيرىعىن ەسكە سالا وتىرىپ، ازعىرىلىپ الداناتىن كەزىمىزدە سانا تازالىعىن ساقتاپ، ميىمىزدىڭ ءوزىمىزدى الداۋىنا جول بەرمەۋىمىز مۇمكىن.

تۇپكى ءتۇيىنى

قالاۋ ارقىلى مي ءبىزدى ارەكەتكە يتەرمەلەيدى. كوز جەتكىزگەنىمىزدەي، قالاۋ ءوز-وزىن باسقارۋعا ءقاۋىپ ءتوندىرۋى دە، سونىمەن قاتار، ەرىك كۇشىنىڭ كوزى دە بولۋ دا مۇمكىن. دوفامين ءبىزدى ەلىكتىرگىش نارسەگە باعىتتاعاندا، قالاۋ مەن باقىتتى اجىراتا الۋىمىز كەرەك. سونداي-اق دوفامين مەن ماراپاتتان دامەتۋدى ءوزىمىزدى جانە باسقالاردى موتيۆيۆاسيالاۋ ءۇشىن دە قولدانا الامىز. تۇپتەپ كەلگەندە قالاۋ سەزىمى جاقسى دا، جامان دا ەمەس، باستىسى ول ءبىزدى قايدا اپاراتىنىندا جانە ونىڭ سوڭىنان ەرۋ نەمەسە ەرمەۋ كەرەك پە دەگەندى اجىراتا الۋىمىزدا.

نەگىزگى وي: ميىمىز ماراپاتتى ۋادە ەتۋدى باقىتتىڭ كەپىلدىلىگىمەن شاتاستىرادى، ءسويتىپ راحاتتى بىزگە بەرمەيتىن نارسەلەردەن ىزدەيمىز.

جاقىننان قاراعاندا:

— ءسىزدىڭ دوفامينەرگيالىق نەيروندارىڭىز نەدەن بولىنەدى؟ سىزگە ماراپات ۋادەسىن بەرەتىن جانە ءلاززات ىزدەۋگە يتەرمەلەيتىن نە نارسە؟

— ءسىزدىڭ دوفامينەرگيالىق نەيروندارىڭىزدى كىم باسقارادى؟ ساتۋشىلار ءسىزدى سىيدان دامەلەندىرۋمەن قالاي اربايتىنىنا نازار اۋدارىڭىز.

— قالاۋ كۇيزەلىسى. قالاۋىڭىزدىڭ قاي كەزدە سترەسس پەن الاڭداۋشىلىقتى تۋدىراتىنىن باقىلاڭىز.

تاجىريبەلەر:

— ءدوفاميندى «قول جەتكىزەم» دەگەن كۇشىڭىزدى سىناۋعا باعىتتاڭىز. ەگەر قانداي دا ءبىر شارۋانى وزىڭىزگە ۇناماعاندىقتان كەيىنگە قالدىرساڭىز، ونى دوفامينەرگيالىق نەيروندارىڭىزدى ىنتالاندىراتىن نارسەمەن بايلانىستىرىپ، ىسكە كىرىسىڭىز.            

— ماراپات ۋادەسىن تەكسەرىڭىز. ميىڭىزدىڭ سەزدىرۋىنشە ءسىزدى باقىتقا بولەيتىندەي كورىنەتىن، ءبىراق ەشقاشان قاناعاتتاندىرمايتىن (ماسەلەن، تاماق، دۇكەن ارالاۋ، تەلەديدار كورۋ نەمەسە عالامتور) ىسپەن اينالىسىپ كورىڭىز. شىنايىلىق ميدىڭ ۋادەسىنە سايكەس كەلە مە؟

---