ءماز بولادى بولىسىڭ،
ارقاعا ۇلىق قاققانعا،
شەلتىرەيتىپ ورىسىڭ،
شەندى شەكپەن جاپقانعا.

كۇندە جاقسى بولا ما،
ءبىر قىلىعى جاققانعا؟
وقالى تون تولا ما،
ار-ۇياتىن ساتقانعا؟!

كۇلمەڭ قاعىپ قاسقايىپ،
سالىنىپ اپ ماقتانعا،
تاڭقالامىن، قامپايىپ
جوقتى-باردى شاتقانعا.

ءۇيى ءماز بوپ، قوي سويدى
سۇيىنشىگە شاپقانعا.
اۋرە قىلدى، سالدى ويدى
ۇيدەگى تىنىش جاتقانعا.

ەش نارسە ەمەس جۇبانار،
اقىل كوزبەن باققانعا.
جاس بالاداي قۋانار
ءبىر ءدامدىنى تاتقانعا.

كوزى بارلار ويىنىڭ
كۇلەر كوتىن اشقانعا.
قاسيەتىن بويىنىڭ
بەكەر توگىپ شاشقانعا.

قۋانارلىق قىز ەمەس
جىلتىراۋىق تاققانعا.
وزگەلەردى، ءبىز ەمەس،
تۇسىرمەكشى قاقپانعا.

وسى دا ەسەپ بولا ما
ار، ابۇيىر تاپقانعا؟
ميىڭ بولسا جولاما
بوس جەلىگىپ شاپقانعا.


ءبىر بەس نادان، وڭباسسىڭ،
نانساڭ، ونىڭ قوسقانعا.
جاسىق، جامان بولماسسىڭ،
جاماندىقتان قاشقانعا.

ول «بولدىم-اق» دەي بەرەر،
بۇلعاق قاعىپ باسقانعا.
ەلەڭ قاعىپ ەلبىرەر،
ەلەرتىپ كوزدى اسپانعا.

جايى ءمالىم شوشقانىڭ،
تۇرتكەنىنەن جاسقانبا.
ءبىر عىلىمنان باسقانىڭ
كەسەلى كوپ اسقانعا.

ودان ءۇمىت كىم قىلار،
جول تابار دەپ ساسقاندا؟
ءۇيتىپ اسقان جولىعار
كەشىكپەي-اق توسقانعا.

---