مەكتەپ - ءبىلىم مەن تاربيەنىڭ وشاعى
بۇل ماقالانى جازعان كەزدە ىشىمدە ءتۇرلى ەموسيالاردىڭ ارپالىسى بولدى دەسەم وتىرىك ايتپاعانىم بولار. سەبەبى، مەكتەپتە وتكەن ۋاقىتتارىڭدى، ءتۇرلى قىزىقتارعا تولى ساتتەردى جازۋ وڭاي ەمەس. الايدا، ءوزىمنىڭ مەكتەپكە دەگەن ساعىنىشىمدى تەك قاعاز بەتىنە ءتۇسىرۋ ارقىلى عانا باسا الامىن.
مەكتەپ... ءبىر ءسوزدىڭ ءوزى قانشاما قۋانىشتى ساتتەرگە تولى دەسەڭىزشى! ويىن قۋىپ ءجۇرىپ، 11 جىلدىڭ قالاي وتكەنىن بىلمەي دە قالىپپىن. ارتقا كوز سالسام وسى جىلداردىڭ بەينەسىنەن بالالىق شاعىمنىڭ بالداي ءتاتتى كەزدەرىن كورەمىن.
العاش قولىما گۇل شوقتارىن الىپ، مەكتەپ تابالدىرىعىن اتتاعانىم، ماعان كۇلىمسىرەپ قاراعان ۇستازىمنىڭ اقجارقىن كەلبەتى ءالى دە ەسىمدە. باسىندا بارلىق زاتقا تاڭىرقاۋمەن باستالعان مەكتەپ ءومىرى كەيىننەن جانىڭا جاقىن دوس تابۋمەن ۇشتاستى.
ارينە، العاشقى ءارىپ تانۋىڭ، العاشقى العان بەستىك باعالارىڭ، مەكتەپ تۋرالى، ونىڭ نە ەكەنىن، ماعىناسىن تۇسىنگەن ۋاقىتتار – مۇنىڭ ءبارى دە ادامنىڭ جادىنان وشىرىلمەيتىن ەستەلىكتەر. ماعان ءبىلىم بەرىپ، قاناتىمنىڭ كەڭىستىكتە جايىلۋىنا مۇمكىندىك بەرگەن العاشقى مەكتەبىمە العىسىم شەكسىز!!!
ۇمىتىلماس ەسىمىڭ،
ارمانداردىڭ اشتىڭ ەسىگىن
ماڭگى وشپەس ءىز قالدىرعان ليسەي...
ءيا، مەن 11 جىلدىڭ ىشىندە ءبىر عانا مەكتەپتىڭ وقۋشىسى بولعان جوقپىن. ارمانداعان ارماندارىما جەتۋ جولىندا مەن قازاق-تۇرىك مەكتەپ-ينتەرناتىنىڭ (“ءبىلىم-يننوۆاسيا” ليسەيى) جاس شاكىرتى اتاندىم. ءومىرىمنىڭ ەڭ قىزىقتى، ەڭ ماعىنالى بەس جىلى وسى ليسەي قابىرعاسىندا ءوتتى دەسەم قاتەلەسپەگەنىم بولار...
ليسەي – بۇل ءوزىنىڭ ايرىقشا تاربيەسىمەن، جوعارى بىلىمىمەن، بىلىكتى مۇعالىمدەرىمەن كوزگە تۇسەتىن قازاقستانداعى بىردەن-بىر ءبىلىم ورداسى. العاش جاتاقحانادا تۇرىپ اتا-انامدى ساعىنعان كەزدەرىم، ساباقتارىمنىڭ قيىنداپ، ولاردى وقۋعا ۇلگەرمەگەن شاقتارىم ءالى ەسىمدە. الايدا، ءدال وسى كەزدە ماعان جان-جاقتان كەلگەن، ءبىراق، ءبىر ءۇيدىڭ بالاسىنداي بولىپ كەتكەن قۇربىلارىم قولداۋ كورسەتتى. ءبىز بىر-بىرىمىزبەن ءبىر ناندى ءبولىسىپ جەدىك، قيىندىقتى ءبارىمىز بىرگە كوردىك، ۇرىستىق، كەرىستىك، ءبىراق ءبارىبىر دە سوڭىندا تاتۋلاسۋدى ۇمىتقان جوقپىز. شىنىمدى ايتسام، وسى ساتتەردى ەسىمە تۇسىرگەندە كوزىمە ساعىنىشتىڭ جاستارى كەلەدى. مەنىڭ جۇرەگىمدە ءار سىنىپتاسىمنىڭ ورنى بار. سەبەبى، ءارقايسىسى ءوزىنىڭ ماعان جاساعان جاقسىلىعىمەن ەرەكشە.
ليسەيىم جايلى اڭگىمە قوزعاعاندا ماقساتىمدى الدىما ايقىن قويۋدى، ءومىردىڭ كىشكەنە بولىگىن بولسا دا ءتانىپ-بىلۋدى ۇيرەتكەن ۇستازدارىم مەن تاربيەشىلەرىمدى ايتىپ وتپەسەم بولماس. ليسەي بىزگە جانىڭا جاقىن جاندارمەن قوشتاسۋدى، الايدا، ولاردى ۇمىتپاۋدى ۇيرەتتى. مۇنى ايتقان سەبەبىم، وسى 5 جىل ىشىندە ءبىز تالاي مۇعالىمدەردىڭ اقىل-كەڭەستەرىن الدىق، تاربيەشىلەردىڭ تالىم-تاربيەسىن بويىمىزعا سىڭىردىك. جانىمىزدا جۇرگەن ءار تالىمگەر، ءار تاربيەشى ءبىزدىڭ ماڭگىلىك جادىمىزدا. قاسىمىزدا انامىز بولماعاندا، ءبىزدىڭ قۋانىشتى ساتتەرىمىزگە كۋا بولعان وسى جاندار ەكەنىن سەنىممەن ايتا الامىن.
بۇگىندە ءبىز – مەكتەپ بىتىرگەن تۇلەكتەرمىز. ءار قىرىق بەس مينۋتتىق ساباقتاردى، ۇزىلىستەردى، اقكوڭىل مۇعالىمدەرىمىز بەن اپكەمىزدەي بولىپ كەتكەن تاربيەشىلەرىمىزدى، العاشقى قوڭىراۋ ءۇنى مەن سوڭعى قوڭىراۋدى ساعىناتىن تۇلەكتەرمىز. جانە دە بىرگە تۋعان باۋىرداي بولىپ كەتكەن جان دوستارىمىزدى ساعىنامىز. ءبىز – ىشىنە قۋانىش پەن ءتۇرلى ەستەلىكتەردى ساقتاپ قالعان مەكتەپ اتتى كەمەدەن تۇستىك، بالالىقتىڭ ەسىگىن جاپتىق. الدا ءبىزدى باعىندىرار تالاي بەلەستەر تۇر.
قورىتىندىلاي كەلە، بويىما ءبىلىمنىڭ ءنارىن سەپكەن مەكتەپتەرىمە تەك العا قاراي وركەندەۋدى جانە ماعان ءبىلىم بەرگەن ءار ۇستازعا الداعى ۋاقىتتا تەك ساتتىلىك تىلەگىم كەلەدى. ال قيىن قىستاۋ زاماندا بىرگە بولعان دوستارىما بولاشاقتا ءبىلىمنىڭ بيىك شىڭىنا شىعۋىنا شىن جۇرەكتەن تىلەكتەسپىن.مەن سەندەردىڭ جەتكەن ءار جەتىستىكتەرىڭە قۋانامىن، ماقتان تۇتامىن. كەلەشەكتە ءارقايسىسىمىز ەلدىڭ بەتكە ۇستار ازاماتشاسى بولىپ، الەمنىڭ جارقىراعان 27 جارىق جۇلدىزىنا اينالاتىنىمىزعا كامىل سەنەمىن!!!
You Might Also Like
-
ءاربىر اتا-انا دۇنيەگە شىر ەتىپ كەلگەن بالاسىن وسى جارىق دۇنيەنىڭ ەسىگىن اشىپ، سول جارىق دۇنيەنىڭ قىزىعى مەن قۋانىشىن كورسىن، ۇرپاعىمدى جالعاسىرىپ، ارتىمدا ءوز ءىزىمدى قالدىرسام دەپ الدىنا ماقسا...
-
ساندىق ۆاليۋتا دەگەن نە، ءارى ونىڭ نە ءۇشىن قاجەت ەكەندىگىن قاراپايىم سوزبەن ءتۇسىندىرىپ بەرۋگە تىرىسىپ كورەيىك.
