مەكتەپ جىلدارى - ەڭ الاڭسىز جانە باقىتتى جىلدار
ادام بالاسىنىڭ بۇكىل ءومىرى كوپتەگەن ساتتەردەن تۇرادى، ال ولاردىڭ ىشىندەگى ەڭ كەرەمەت ساتتەرىن كەيدە توقتاتىپ، ەڭ بولماعاندا بىرنەشە سەكۋندقا كەرى قايتارعىمىز كەلەدى. ءبىراق، وكىنىشكە وراي، بۇل مۇمكىن ەمەس. وسىلايشا كۇندەر بىرتىندەپ ءوتىپ، ول بىرنەشە اپتاعا، ايعا، جىلعا جىلجىي بەرەدى. ادامداردىڭ جاسى كەلگەن سايىن وتكەنگە قاراپ، ءاردايىم وتكەن كۇندەرىن كۇلىمسىرەپ ەسكە الادى. اسىرەسە، مەكتەپتە وقىپ جۇرگەن كەزىمىز كوپتەگەن جىلى ەستەلىكتەردى ەسكە تۇسىرەدى.
«مەكتەپ» - دەگەن ءسوزدى ەستىگەندە وقۋشىلاردىڭ ويىندا بىردەن «قوڭىراۋ» تۇسەر. بارلىق مەكتەپ وقۋشىلارى ساباق كەزىندە قوڭىراۋدىڭ كەلۋىن اسىعا كۇتەدى. ساعاتقا قاراپ، قاجەتتى ۇزىلىسكە دەيىن مينۋتتاردى ساناپ وتىرادى. قوڭىراۋ سوعىلا سالىسىمەن كوپتەگەن وقۋشىلار بىردەن مۇعالىمدەردى تىڭداۋعا ۋاقىت تاپپاي، ورىندارىنان شىعىپ كەتەدى، ال ءمۇعالىم ولاردى توقتاتۋعا ۋاقىت تا تاپپايدى. بار-جوعى 10-15 مينۋت ىشىندە ءبىز دوستارىمىزبەن سوڭعى جاڭالىقتارمەن ءبولىسىپ، ويىن ويناپ، كۇلىپ ۇلگەرەمىز. كەيدە قوڭىراۋ كەشە كەشكە باستاعان ءۇي جۇمىسىن اياقتاۋعا، وقۋلىقتاعى ابزاستى قايتالاۋعا نەمەسە تەست ءۇشىن بىرنەشە ماڭىزدى فورمۋلالاردى جازىپ الۋعا جەتكىلىكتى ۋاقىت. ال، اسىعا كۇتەتىن ءۇزىلىس - ۇلكەن ءۇزىلىس. ۇلكەن ءۇزىلىس باستالعاندا دوستارىمىزبەن اسحاناعا بارىپ، كىشكەنە ءبالىش الساق سوعان قۋانىپ، دوستارىمىزبەن اڭگىمە-دۇكەن قۇرامىز.
ءبىزدىڭ ءارقايسىمىز ءوز مەكتەبىمىز تۋرالى ويلانعاندا ءار ءتۇرلى نارسەنى ەسىمىزگە تۇسىرەمىز. بىرەۋلەر ءۇشىن بۇل ويىن-ساۋىق پەن مەكتەپ كەشتەرى بولسا، ال باسقالار ءۇشىن وليمپيادالار، بايقاۋلار، سۇيىكتى ساباقتار. ءبىراق ەڭ باستىسى - ءبىز مەكتەپتە وقىپ ءجۇرىپ، ناعىز دوستارىمىزدى تاپتىق. «مەكتەپتەگى دوستىق - ەڭ مىقتى دوستىق»، - دەپ ايتىپ جاتادى. مۇمكىن ول كوپ ۋاقىتىن بىرگە وتكىزگەندىكتەن جانە ءبىر-بىرىمىزدى جاقسى تانيتىندىقتان بولار. ارينە، مەكتەپتەگى دوستارىمىز ارقىلى مەكتەپ ءومىرى تۋرالى ءاردايىم ەستە قالاتىن نارسەلەر بولادى.
«ءومىرىنىڭ بارلىق ءمانى - وزدەرى بىلەتىن نارسەنى ۇيرەتۋ» بولىپ تابىلاتىن مۇعالىمدەر ءبىزدى مەكتەپتە قارسى الادى. ولار ءبىزدىڭ زەيىنىمىزدى، جادىمىزدى، قيالىمىزدى دامىتادى، بىزگە ومىردە ءوز جولىمىزدى تابۋعا كومەكتەسەدى. ەڭ باستىسى، ولار وزدەرىنىڭ ىستەرىمەن جانە سوزدەرىمەن بىزگە ەڭ ماڭىزدى عىلىمدى - ادام بولۋدى ۇيرەتەدى. ءمۇعالىم ءبىزدى بالالىق شاق، ءجاسوسپىرىم جىلدارى باسقارادى، بايقالمايتىن ەرلىك جاسايدى - بىزگە ءوز ءبىلىمىن بەرەدى، جۇرەگىنىڭ ءبىر بولىگىن وقۋشىلارىنا ارنايدى. جانە ءاربىرىمىزدىڭ مەكتەپتە جاقسى كورەتىن مۇعالىمدەرىمىز بولادى. الايدا، مەكتەپ بىتىرەر ساتتە بۇرىن ۇناتپايتىن مۇعالىمدەردىڭ ءوزىن قيماي جاتامىز.
ۋاقىتتىڭ تەز وتۋىمەن قالاي مەكتەپتى اياقتاپ قويعانىمىزدى بايقامايمىزدا. مەكتەپ جىلدارى - ەڭ الاڭسىز جانە باقىتتى جىلدار. ءبىر وكىنىشتىسى كوبىمىز مۇعالىمدەرگە دۇرىس العىس ايتپاعانىمىزدى جانە ەڭ قىزىق ساتتەرىمىزدى شىنايى باعالاي الماعانىمىزدى مەكتەپ بىتىرەر ساتتە عانا ءتۇسىنىپ جاتامىز.
ۋ. م. دجولدىبايەۆا ءال-فارابي اتىنداعى ءقازۇۋ-نىڭ قازاقستان تاريحى كافەدراسىنىڭ دوسەنتى
ج. ن. الياسقار ءال-فارابي اتىنداعى ءقازۇۋ-نىڭ شىعىستانۋ فاكۋلتەتىنىڭ 1-كۋرس ستۋدەنتى
You Might Also Like
-
كورەگەندىكتەن تاعى ءبىر كوركەم كورىنىسى سىنگا تۇسكەن ەكى ۇداي تۇستا مىنا، قارامايدى ول باقىتقا، باس قامىنا، لايىق ول بايقاساڭ قازاق تۇگىل، الەمدى دە ادەمى باسقارۋعا.
-
قازاق ءتىلى ءوزىنىڭ دالاسىنداي باي. قازاق ءسوزى قاشاندا دالانىڭ قوڭىر جەلىندەي اڭقىلداپ، ەركىن ەسىپ تۇرادى.
