InfoHub Logo

- اينۇردى ايتامىن-اۋ، - دەيدى اپاسى. - اينۇردى ايتىپ وتىرمىن! - دەيدى سونان سوڭ، "كىمدى ايتىپ وتىرعانىمدى ءوزىڭ ءبىلىپ وتىرسىڭ با؟" دەگەندەي. بۇل - اپاسىنىڭ ۇلكەن اعاسىنا قاراپ داستارقان باسىندا سويلەپ وتىرعانداعى كەيپى.

- اۋ، ءبىلىپ وتىرمىن عوي، - دەيدى اعاسى. - اينۇر دەگەن وزىمىزبەن قارايلاس
وقىعان جىگىتتەر ەمەس پە؟

- سول بالا مەكتەپتى التىن مەدالمەن ءبىتىردى عوي، - دەيدى اپاسى.

- اۋ، اينۇرلار دەگەن مىقتى وقىعان جىگىتتەر عوي! - دەيدى اعاسى. - اينۇرلار دەگەن مەكتەپتە مىقتى وقىدى ەمەس پە؟!

- انە! وقىساڭ، سول بالاداي بولىپ وقى! - دەيدى اپاسى. - اۋىلدىڭ قاراپايىم ۇلى. مەكتەپتى ءوزىنىڭ بىلىمىمەن التىن مەدالعا ءبىتىرىپ شىقتى.

اپاسى سوڭعى ءسوزدى ايتقاندا بۇلار وتىرعان جاققا قاراپ وتىرىپ ايتادى. "وسىنى سەندەر ءۇشىن ايتىپ وتىرمىن، وزدەرىڭ بىردەڭە ءتۇسىنىپ وتىرسىڭدار ما؟" دەگەندەي.

- سول بالا قاي عىلىمنىڭ سوڭىنا ءتۇستى؟ - دەيدى سونان سوڭ تاعى دا اعاسىنا قاراپ.

اپاسى وسىنى ءوزى ءبىلىپ وتىرىپ ادەيى سۇرايدى. بۇل - اپاسىنىڭ بۇلارعا تاربيە بەرۋدەگى مەتوديكاسى.

- تەحنيكا عىلىمى، - دەيدى اعاسى. - اينۇر تەحنيكا عىلىمىنان قورعادى عوي.

- انە! - دەيدى اپاسى تاعى دا بۇلار وتىرعان جاققا قاراپ. - تەحنيكا عىلىمى!

"تەحنيكا" دەگەن ءسوزدى ايتقاندا اپاسى ءبىر ءتۇرلى سالماق ءتۇسىرىپ ايتادى.

- توقبولات تا وسى مەكتەپتى ءبىتىردى عوي؟ - دەيدى سونان سوڭ تاعى دا اعاسىنا قاراپ. - توقبولاتتى ايتىپ وتىرمىن؟

- ءيا، وسى مەكتەپتىڭ تۇلەگى عوي، - دەيدى اعاسى. - وسى مەكتەپتى ءبىتىردى.

- "وركەندىنىڭ" بالاسى عوي، - دەيدى اپاسى "وركەندەۋ" دەگەن اۋىل جاقتى ءبىر نۇسقاپ كورسەتىپ قويىپ. - وسى مەكتەپتى ءبىتىردى. ءقايبىر جىلى سول بالا اكەڭە كەلدى. ويپىرم-اي، ءوزىن ۇلكەن ادامدارشا ۇستايدى. ەلدىڭ تاريحىن سۇرادى ما، جەردىڭ تاريحىن سۇرادى ما، اۋىلدىڭ تاريحىن سۇرادى ما؟ انە، بولاتىن بالانىڭ ءوزى ءسويتىپ ەسكى ءسوزدى كەرەك ەتىپ جۇرەدى عوي. بولمايتىن بالا تەك بۇگىنگىسىمەن ءومىر سۇرەدى. كادىمگى جۇرەكتەرى ابلىعىپ، ابلىعىپ. ۇشىپ-قونىپ. تەك كوزىنىڭ الدىندا تۇرعاندى عانا كورەدى.

"سونىڭ ءبىرى سەندەر عوي" دەگەندەي اپاسى بۇلار وتىرعان جاققا شۇيلىگە قارايدى. سونان سوڭ:

- سول بالا ءقازىر قايدا؟ - دەيدى ءوزىنىڭ كانىگى ادىسىنە كوشىپ، سۇراعىنىڭ جاۋابىن ءوزى ءبىلىپ وتىرسا دا.

- قىزىلوردادا عوي، - دەيدى اعاسى.

- نە قىزمەت ىستەيدى؟

- وبلىستىق گازەتتە. ادەبيەت ءبولىمىن مەڭگەرەدى. ول كىسى فيلولوگيا عىلىمىنىڭ كانديداتى عوي.

- انە! - دەيدى اپاسى تاعى دا بۇلارعا قاراپ. - ادەبيەت ءبولىمىن مەڭگەرەدى!

"ادەبيەت" دەگەن ءسوزدى ايتقاندا اپاسى تەحنيكا دەگەن ءسوزدى ايتقانداعىداي، تاعى دا سالماق تۇسىرە ايتادى. ءسىرا، ادامعا تەحنيكا دا كەرەك، ادەبيەت تە كەرەك دەگەندەي.

"سول بالا وسى مەكتەپتى ءبىتىردى"، - دەيدى سونان سوڭ تاعى دا بۇلارعا قاراپ وتىرىپ. "الدە ماعان سەنبەي وتىرسىڭدار ما؟" دەگەندەي قارار ەدى.

وسىلاي مەكتەپتىڭ ىلگەرىدەگى تۇلەكتەرىمەن بىرگە مەكتەپتىڭ بۇرىنعى ديرەكتورلارى دا، مەكتەپتىڭ بۇرىنعى ۇستازدارى دا قاتارلاسا ايتىلىپ جاتار ەدى.

ارادا ءبىرشاما ۋاقىت ءوتتى. ءبىر كۇنى ءوزى دە سول مەكتەپكە ادەبيەتتەن ساباق بەرەتىن ءمۇعالىم بولىپ باردى. بىردە پەدسوۆەتتىڭ ۇستىندە مەكتەپتىڭ ديرەكتورى: "كەلەسى جىلى مەكتەبىمىزگە 50 جىل تولعالى وتىر"، - دەدى. بۇل اڭگىمە سودان كەيىن قوزعالا قويماعان ەدى. كەلەسى جىلى ويىنا ءتۇستى. "سول اڭگىمە بىلتىر ايتىلماپ پا ەدى؟ وندا مەكتەپكە 50 جىل تولىپ وتىرعانى بيىل عوي". مەكتەپ جايلى بىردەڭە جازعىسى كەلگەنى سول ەدى، كوز
الدىنا داستارقان باسىندا وتىرعان اق جاۋلىقتى اپاسى ەلەستەپ كەتكەنى:

"اينۇردى ايتامىن-اۋ. سول بالا مەكتەپتى التىن مەدالمەن ءبىتىردى عوي".

"بولاتىن بالانىڭ ءوزى ەسكى ءسوزدى كەرەك ەتىپ جۇرەدى عوي. بولمايتىن بالا تەك بۇگىنگىسىمەن ءومىر سۇرەدى. كادىمگى، جۇرەكتەرى ابلىعىپ، ابلىعىپ..."

بۇل جازىلعان دۇنيە ماقامعا سالىپ ورىندالاتىن مەكتەپتىڭ بۇرىنعى تۇلەكتەرى مەن ىلگەرىدەگى ۇستازدارىنىڭ اتى اتالاتىن مەكتەپ تاريحىنا بايلانىستى جازىلعان جىر ەدى.

ارادا ءبىر جىل ءوتتى. وسى جىل مەكتەپتىڭ ءوزىنىڭ 50-تۇلەكتەرىن ۇشىراتىن جىلى بولاتىن.

بىردە مادەنيەت قىزمەتكەرى بولىپ ىستەيتىن سازگەر جىگىتكە: "مەكتەپكە 50 جىل تولدى. بيىل مەكتەپ ءوزىنىڭ 50-تۇلەكتەرىن ۇشىرعالى جاتىر.
وسىلاردىڭ قۇرمەتىنە ءبىر ءان جازسايشى"، - دەدى. "ولەڭىن جازىپ الىپ كەلسەيشى"، - دەدى سازگەر جىگىت.

بۇل اڭگىمە اقپان ايىندا ايتىلعان ەدى. ارادا ءۇش اي وتكەندە مامىر ايى باستالىسىمەن-اق، كوكتەمنىڭ جايما-شۋاق كۇنىمەن بىرگە اشىق تۇرعان سىنىپ ەسىكتەرىنەن ءار ءۇزىلىس سايىن مەكتەپتىڭ ءبىتىرۋشى 50-تۇلەكتەرى ءوز مەكتەپتەرىنىڭ ءانىن شىرقاپ جاتتى. انا مەكتەپ 50-گە كەلدى. انا مەكتەپ ءوزىنىڭ 50-تۇلەكتەرىن ۇشىرعالى تۇردى. "قوجاباقى مەكتەبىنىڭ ءۆالسى" ءانىنىڭ سازىنىڭ اۆتورى - بۇل كۇندە قازالى اۋداندىق مادەنيەت ورتالىعىنىڭ ديرەكتورى بولىپ قىزمەت اتقاراتىن كەمەڭگەر وتەپ. تۇلەكتەر ءاندى قايتا-قايتا شىرقادى. سونان سوڭ وزدەرىنىڭ سوڭعى قوڭىراۋلارىنا ارنالعان سالتاناتتى جيىندارىنا الىپ شىقتى. مەكتەپ ءبىتىرۋ كەشىندە اۋەلەتتى.

جازىلعان دۇنيەلەردىڭ ار جاعىن ويلاسا، سول ءبىر داستارقان باسىندا اندا-ساندا جاۋلىعىن ءبىر تۇزەپ قويىپ ۇلكەن اعاسىنا قاراپ سويلەپ وتىرعان اپاسى كوز الدىنا كەلەدى. ال كەيدە ءتىپتى سونا-ا-ۋ جىلى سوعىستان ورالىپ، 20 جاسىندا مەكتەپتىڭ مەڭگەرۋشىسى بولىپ، ودان كەيىن باسقا قىزمەتكە اۋىسقانشا، سول قىزمەتتى 2 جىلداي اتقارعان، ول كەزەڭدە قازالى قالاسىندا ورنالاسقان وقۋ ءبولىمى مەن اۋىل اراسىن اتپەن جول قىلىپ جۇرگەن، ءالى اپاسىنا قوسىلا قويماعان شاقتاعى اكەسى كوز الدىنا ەلەستەپ كەتەتىنى دە بار.

---