مەكتەپكە ديرەكتور تاعايىنداۋدا پرەزيدەنت كادر رەزەرۆىنىڭ مۇشەلەرىنە باسىمدىق بەرىلەدى
پرەزيدەنت كادر رەزەرۆى مەن «بولاشاق» باعدارلاماسىنىڭ قاتىسۋشىلارىنا ءبىلىم بەرۋ ۇيىمىنىڭ ديرەكتورىن تاڭداۋدا باسىمدىق بەرىلمەك. بۇل تۋرالى ق ر بعم مەكتەپكە دەيىنگى جانە ورتا ءبىلىم كوميتەتىنىڭ پەداگوگيكالىق كادرلار مەن كورسەتىلگەن مەملەكەتتىك قىزمەتتى مونيتورينگتەۋ جۇمىستارى جونىندەگى باسقارما باسشىسى ايمان دۇيسەمبايەۆا ءمالىم ەتتى.
«قازىرگى تاڭدا «پەداگوگ مارتەبەسى تۋرالى» زاڭ اياسىندا ءبىرقاتار ءنورماتيۆتى-قۇقىقتىق قۇجاتتاردى قابىلداپ جاتىرمىز. سونىڭ ءبىرى – ءبىلىم بەرۋ ۇيىمدارىنىڭ باسشىلارىن تاعايىنداۋ ەرەجەسى. بۇل جەردە مەكتەپكە دەيىنگىدەن باستاپ تولىعىمەن تەحنيكالىق-كاسىپتىك ءبىلىم بەرۋ جۇيەسىنە دەيىنگى ءبىلىم بەرۋ ۇيىمدارىنىڭ باسشىلارىن تاعايىنداۋ ەرەجەسى جاسالىپ جاتىر. قازىرگى تاڭدا بۇل ەرەجە مەملەكەتتىك جانە جەرگىلىكتى اتقارۋشى ورگاندارمەن كەلىسىلۋدە. جەرگىلىكتى اتقارۋشى ورگاننىڭ بارلىعىنان كەلىسىم الدىق»، - دەدى ايمان دۇيسەمبايەۆا ءبىلىم جانە عىلىم مينيسترلىگىنىڭ ەلوردادا ءوتىپ جاتقان جينالىسىندا.
باسقارما باسشىسىنىڭ ايتۋىنشا، بۇرىنعى ءتارتىپ بويىنشا تەك تالاپتار قويىلىپ، ديرەكتورلار تاعايىندالىپ كەلگەن. ال ءقازىر مەكتەپكە دەيىنگى ۇيىمدار ءۇشىن - ءبىر بولەك، ارنايى مامانداندىرىلعان مەكتەپتەر ءۇشىن - ءبىر بولەك، تەحنيكالىق جانە كاسىپتىك ءبىلىم ۇيىمدارىندا - ءبىر بولەك تالاپتار بەكىتىلگەلى وتىر. ياعني، ءار ۇيىمنىڭ وزىندىك تالاپتارى بار.
«ءبىراق بارىنە قاتىستى ءبىر تالاپ بار - ۇمىتكەر 72 ساعاتتىق مەنەدجمەنت كۋرسىنان مىندەتتى تۇردە ءوتۋى ءتيىس. سونىمەن قاتار ونىڭ ءبىرىنشى، جوعارى نەمەسە جاڭا دەڭگەيدەگى ساراپشى، زەرتتەۋشى جانە شەبەر ساناتتارىنىڭ بولۋى مىندەتتى. بۇل ءۇردىس ءتورت كەزەڭمەن وتكىزىلەدى. «بولاشاق» باعدارلاماسى جانە پرەزيدەنت كادر رەزەرۆىنەن كەلگەن ۇمىتكەرلەردى بىردەن ءتورتىنشى كەزەڭگە جىبەرۋدى قاراستىرىپ وتىرمىز. ودان بولەك كەيىنگى كەزدە قامقورشىلىق كەڭەستەن وتپەگەن جاعدايدا ءبىز ۇمىتكەردى وبلىستىق ءبىلىم باسقارماسىنا ۇسىنامىز»، - دەدى ول.
باسقارما باسشىسى ءبىلىم ۇيىمدارىنا باسشىلىق ەتۋ ءۇشىن ديرەكتور ءوتۋى ءتيىس ءتورت كەزەڭدى اتاپ بەردى.
«ءبىرىنشىسى – ۇمىتكەردىڭ قۇجاتتارىن قاراۋ، ەكىنشى كەزەڭ – قامقورشىلىق كەڭەسىنە جىبەرۋ، ءۇشىنشىسى – وبلىستىق ءبىلىم باسقارماسىنان كەلىسىم الۋ، ءتورتىنشى كەزەڭ – جەرگىلىكتى جەردەگى كونكۋرستىق كوميسسياعا بارۋ. سونىمەن قاتار پەداگوگيكا جانە پسيحولوگيا بويىنشا تەست جالپى 120 سۇراقتان تۇرادى. سونىڭ ءاربىر باعىتىنان مىندەتتى تۇردە 50 پايىزدىق ۇپاي جيناۋ كەرەك. سوندا عانا كونكۋرسقا جىبەرىلەدى»، - دەدى ول.
You Might Also Like
-
قازاقستان رەسپۋبليكاسىنىڭ باس سانيتار دارىگەرى جانداربەك بەكشين كوروناۆيرۋس ينفەكسياسىنان ساقتانۋ ءۇشىن قاشىقتان وقىتۋ جۇيەسىن ەنگىزۋ ماسەلەسىنە قاتىستى پىكىر ءبىلدىردى.
-
قازاقستان ۇستازدارىنىڭ ۇلتتىق بىلىكتىلىك تەستىلەۋى وسى جىلدىڭ ءساۋىر ايىندا باستالادى. بۇل تۋرالى ءبىلىم جانە عىلىم مينيسترلىگىنىڭ اپپاراتتىق وتىرىسىندا ۆيسە-مينيستر شولپان كارينوۆا ءمالىم ەتتى.
