InfoHub Logo

مەكتەپتە سمارتفونعا تىيىم سالۋ ماسەلەسىن اتا-انالارمەن بىرگە تالقىلاۋ كەرەك. بۇل تۋرالى بۇگىن ورتالىق كوممۋنيكاسيالار قىزمەتىندەگى باسپا ءسوز قىزمەتىندە ءبىلىم جانە عىلىم ۆيسە-مينيسترى ەلميرا سۋحانبەردييەۆا ءمالىم ەتتى.

«سمارتفون ماسەلەسىندە ءار مەكتەپ مەن ۇيىم وزىندىك جەكە شەشىم قابىلدايدى. وسى باعىتتا اتا-انالارمەن بىرلەسىپ تالقىلاۋ جۇرگىزۋ كەرەك. نەگىزىندە كوپ اتا-انالار بالالارىنىڭ مەكتەپكە نەمەسە ۇيگە قالاي جەتكەنىن بايقاپ وتىرعىسى كەلەدى. سوڭعى بۋىندى تەحنولوگيالار بويىنشا ءتيىستى حابارلاما تاراتۋ دا كەيبىر مەكتەپتەردە جاساقتالماعان. سوندىقتان بۇگىندە سمارتفونعا تىيىم سالامىز دەپ ايتا المايمىز»، - دەدى ول.

ايتا كەتەيىك، وسىعان دەيىن سمارتفوندار بالالاردىڭ وقۋ ۇلگەرىمىنە تەرىس اسەر ەتۋى مۇمكىن دەگەن پىكىرلەر ايتىلعان بولاتىن.

بۇدان بۇرىن حابارلانعانداي، ق ر ءبىلىم جانە عىلىم مينيسترلىگىنىڭ بالالاردىڭ قۇقىقتارىن قورعاۋ كوميتەتى ءتوراعاسىنىڭ ورىنباسارى مانشۇك ابدىكارىم مەكتەپتەردە سمارتفوندارعا تىيىم سالۋ تاقىرىبى اتا-انالار جينالىستارىندا تالقىلاناتىنىن اتاپ ءوتتى.

 «مەنىڭ ويىمشا، باس پروكۋراتۋرانىڭ ۇسىنىسى زەرتتەلەتىن بولادى. بۇگىندە ءبىز ءۇشىن ەڭ باستى ءرول قوعامداستىقتىڭ قۇزىرىندا، سوندىقتان اتالعان ماسەلەلەر مەكتەپتەردە اتا-انالار جينالىستارىندا تالقىلانىپ، ءتيىستى ۇسىنىستار زەردەلەنەدى. ءبىرىڭعاي پىكىر ناتيجەسىندە ناقتى شارالار قابىلدانادى»، - دەدى ول. 

م. ابدىكارىمنىڭ پايىمىنشا، ساباق بارىسىندا سمارتفونداردى پايدالانۋ دۇرىس ەمەس. «الايدا، بۇگىن پايدالانۋ دۇرىس ەمەس دەپ ايتقاننان كەيىن، ەرتەڭنەن باستاپ تىيىم سالىنادى دەگەندى بىلدىرمەيدى. بۇل تاقىرىپ مىندەتتى تۇردە وقۋشىلار مەن اتا-انالاردىڭ، مەكتەپتىڭ پەداگوگيكالىق ۇجىمى اراسىندا تالقىعا سالىنۋى قاجەت»، - دەدى ول.

ەستەرىڭىزگە سالا كەتەيىك، مەكتەپتەردە سمارتفوندارعا تىيىم سالۋ ماسەلەسىن  وڭىرلەردەگى بىرنەشە پروكۋرورلار، سونداي-اق شىمكەنت قالاسىنىڭ اكىمى كوتەرگەن بولاتىن. وسى رەتتە مەكتەپتەردە سمارتفوندار ءبىلىم بەرۋ ۇدەرىسىنە كەرى اسەر ەتىپ وتىرعاندىعى، سونىمەن قاتار سمارتفوندار ارقىلى ينتەرنەت-كەڭىستىككە قاداعالاۋسىز قولجەتىمدىك بالالاردىڭ رۋحاني دامۋىنا تەرىس ىقپال تيگىزىپ جاتقاندىعى ايتىلۋدا.  

---