— تۋعان جەرىڭ؟
— ۇلانىمىن، قاراساز دەپ اتالاتىن اۋىلدىڭ.
— تۋعان جىلىڭ؟
— 1931. قۇرداسىمىن ءشامىلدىڭ.
— جىنىسىڭ كىم؟
— ەركەكپىن عوي، ەركەكپىن!جانە-داعى ءتاۋىرمىن...
— پارتيادا بارسىن، با؟
— جوقپىن.
ءبىراق، كوممۋنيستىك كوزقاراسپەن قارايمىن.
— شىققان تەگىڭ؟
— شارۋامىن.
بار تىرلىكتەن باعالى ونى سانايمىن.
— ءبىلىمىڭ شە؟
— ورتاشا عوي.
الايدا ءوزىم جوعارىعا بالايمىن.
— انا ءتىلىڭ؟
— قازاقشا.
قىسىلعاندا ورىسشا دا، نەمىسشە دە، تاعى بار.
— قايدا ىستەدىڭ؟
— مىناۋ «ەڭبەك كىتاپشامنان» تانىپ ال.
وقىماعان، ديپلومسىز دەمەسەڭ،
ءبىر باسىمنان بار ماماندىق تابىلار.
— مىندەتتىسىڭ بە اسكەرگە؟
— مىندەتتىمىن.
ءبىزدىڭ ءالى جاس كەۋدە.
جاۋىنگەردىڭ ۇلىمىن عوي،
جانىن قيعان ماسكەۋگە.
— سوگىس الىپ كوردىڭ بە؟
— ول جاعىنان پەرىشتە ەدىم دەي المايمىن
مەن مۇلدە.
ويلى-قىرلى ءبۇل ومىردە بولادى عوي ءمۇلت كەتۋ،
ول ءوزى ءبىر ەنشىسى عوي ەزدىڭ ءارى ەردىڭ دە...
— شەتەلدەردە بولدىڭ با؟
— بولعامىن جوق.
ولار ماعان تۇرعان دا جوق قول بۇلعاپ.
قالسام بولدى، ولسەم بولدى جايىممەن،
وسى وتىرعان ورنىمدا-اق.
— مەكەن-جايىڭ؟
— مەكەن-جايىم - جەر مەنىڭ.
جەردە جۇرگەن اقىن دەگەن پەندەمىن.
قالام، قاعاز، ۋاقىت بەر تەك ازداعان،
مەن ءومىردى جىرلاۋ ءۇشىن كەلگەمىن!

---