ءاردايىم قۇلشىنىپ تۇرۋ قىيىن، ويتكەنى بۇل سانالى تۇردە كۇش سالۋدى تالاپ ەتەدى. وتكەنىڭ مەن بولاشاعىڭ تۋرالى ويلار كەلە بەرىپ، ناقتى وسى شاققا كوڭىل بولۋگە جانە وزگەرتۋگە بولمايتىن نارسەلەر ءۇشىن الاڭداماۋعا كەدەرگى قىلادى. ونىڭ ۇستىنە ءار ادام ەرتە مە-كەش پە، ايتەۋىر ءبىر كۇنى پسيحولوگيالىق ورعا تۇسەدى. مىنە وسى وردان شىعا الۋداعى يكەمدىلىك ورتا ادامدى ۇلى ادامنان ەرەكشەلەيدى. ەگەر ءسىز ءوزىڭىزدى جىگەرلەندىرە الساڭىز، اعىننىڭ ىڭعايىنا كونىپ جۇرە بەرەتىن ادامنان كوبىرەك جانە جاقسىراق ناتيجەگە جەتەسىز.

موتيۆاسيانى يەلەنۋ ونى ۇستاپ تۇرۋدان الدەقايدا وڭاي. ءوزىڭدى بەلگىلى ءبىر قام-قارەكەتكە كىرىسەتىندەي كۇيگە كەلتىرۋ ءۇشىن، كەيدە، بىرنەشە مينۋتتىڭ ءوزى جەتىپ جاتىر. ال سول موتيۆاسيانى ۇزاق ۋاقىت بويى ۇستاپ تۇرۋ قىيىننىڭ قيامەتى.

موتيۆاسيادان ايىرىلىپ قالۋىمىزدىڭ ءۇش سەبەبى بار:

1. بويداعى سەنىمدىلىكتىڭ جەتىسپەۋشىلىگى. ماقساتقا جەتۋگە بولادى دەگەن سەنىم بولماسا، تىرىسۋدىڭ قانداي ءمانى بار؟ 

2. فوكۋستىڭ جەتكىلىكسىزدىگى. نە نارسەگە قول جەتكىزۋ كەرەك ەكەنى تۇسىنىكسىز بولسا، قاجەت نارسەنى ىستەپ جاتقانىڭدى قالاي بىلۋگە بولادى؟  

3. باعىت-باعداردىڭ جەتىسپەۋشىلىگى. ناقتى نە ىستەۋ كەرەكتىگىن بىلمەسەڭ، ءوزىڭدى بەلگىلى ءبىر قام-قارەكەتكە قالاي موتيۆاسيالايسىڭ؟ 

ەندى جاعدايدى قالاي وزگەرتۋگە بولاتىنىن كورەيىك.  

①

وزىڭە دەگەن سەنىمدىلىكتى قالاي ارتتىرۋعا بولادى؟ 

سەنىمسىزدىك — موتيۆاسيانىڭ ەڭ باستى دۇشپانى بولۋى مۇمكىن. بۇنداي جاعداي باسىڭىزعا كەلگەن كەزدە ومىرىڭىزدە ءقازىردىڭ وزىندە نە بار ەكەنىن تۇيسىنە وتىرىپ، نەنى شىنىمەن-اق قالايتىنىڭىزعا كوڭىل ءبولىڭىز. ءدال قازىرگى ساتتە باسپاناڭىز، ىشەتىن سۋىڭىز، جەيتىن تاماعىڭىز، جاقىن ادامدارىڭىز بار ەكەنىن ءبىلۋدىڭ ءوزى — پروبلەمانىڭ جارتىسىنىڭ شەشىلۋى. ەندى، ءوتىپ كەتكەن قاتەلىكتەر مەن ساتسىزدىكتەرگە بايلانىپ قالماي، قولدا بارداعىدان كوبىرەككە قول جەتكىزۋ جايىندا ويلانۋ كەرەك. تەگىندە، تۇنەكتە قالعان وتكەن شاق تۋرالى ويلار وزىڭە دەگەن سەنىمدىلىكتىڭ استاڭ-كەستەڭىن شىعارادى.

باسقا كىسىلەر مەن كومپانيالاردى كورە الماعانشا، ولاردىڭ جەتىستىكتەرىنەن ۇلگى الىپ، شابىتتانىڭىزدار. كورە الماۋشىلىق پايدا بولا سالىسىمەن بىرگە بىرەۋدىڭ جەمتىگى بولۋ سيندرومى دا دامي باستايدى. باسقالاردىڭ جەتىستىگىن قابىلداۋدىڭ ورنىنا، وزگەلەردەن ءبىر جەرىڭىز كەم دەپ ويلاي باستايسىز. ۇلى ادامداردىڭ تابىسىنان شابىتتانۋ — موتيۆاسيانى سومداپ جانە دۇرىس ويلانىپ، ءوزىڭدى جەتىلدىرىپ وتىرساڭ، بارىنە قول جەتكىزۋگە بولاتىنىن تۇسىنەتىن تاماشا ءتاسىل.

بىرنەشە ءتىزىم: ءوزىڭىزدىڭ مىقتى جاقتارىڭىزدىڭ، بۇرىنعى تابىستى ىستەرىڭىزدىڭ، قازىرگى ساتتەگى ناقتى زاتتارىڭىز بەن بولعان جاعدايلاردىڭ تىزىمدەرىن جاساپ شىعىڭىز. قولىڭىزدان كەلەتىنى انىق نارسەلەردى ىستەڭىز. بۇل ءسىزدى ءپوزيتيۆتى، پرواكتيۆتى ويلاۋ كۇيىنە ءتۇسىرىپ، نەگاتيۆ تۋرالى ويلاتقىزبايدى.  

②

اۋىز تولتىرىپ ايتارلىقتاي فوكۋستى قالاي جاساۋ كەرەك؟ 

ءوزىڭىزدىڭ جانىڭىز قالايتىن نارسە تۋرالى ويلاۋدىڭ ورنىنا كوڭىلىڭىز قالامايتىن نارسەگە كوڭىل ءبولۋىڭىز ءجيى بولىپ تۇرا ما؟  

قالىپتى جاعدايدا ءبىز قورقىنىش تۇرعىسىنان ويلاپ تۇرامىز. كەدەيلىكتەن، جالعىزدىقتان، ءقادىرىمىزدىڭ قاشۋىنان قورقامىز. بۇلاي ويلانۋدىڭ كەمشىلىگى سول، ونداي كەزدە قارەكەت ەتۋگە زاۋقىمىز سوقپاي، تەك قورعانعىمىز كەلىپ تۇرادى. سايكەسىنشە موتيۆاسيا تۋراسىندا ايتۋدىڭ ءوزى ارتىق.

ەگەر ءسىز قورقىنىش پريزماسى ارقىلى ويلايتىن بولساڭىز، نەگىزگى كۇشتى ماقساتىڭىزعا سالۋ العاشقى قادامىڭىز بولۋى كەرەك. ناقتى ماقساتتى ايقىنداپ العان سوڭ قام-قارەكەتتى باستاۋ وڭاي بولادى.  

كەدەي بولىپ قالۋ ۇرەيى ادامنىڭ ەشقانداي ارەكەت قىلماي قويۋىنا اپارىپ سوعىپ، قالىپتاسقان جاعدايعا كوندىگۋىڭىزگە ماجبۇرلەيدى. باي ادام بولۋدىڭ جوسپارىن جاساۋ ءسىزدى ونداي ادام قىلماۋى دا مۇمكىن، ءبىراق ۇرەي-قورقىنىشقا ەمەس، مۇمكىندىكتەرگە نازار سالۋىڭىزعا ماجبۇرلەيدى. بۇل وزدىگىڭىزدەن ءوقىپ-بىلۋ، قاجەتتى داعدىلارعا ماشىقتانۋ جانە ءوزىڭىزدى جەتىلدىرۋ تۋرالى ويلانۋعا مۇمكىندىك بەرەدى. كەپىلدىكتى ەشكىم بەرمەيدى، ءبىراق مۇمكىندىكتەرىڭىز ەسەلەپ ارتادى. ونىڭ ۇستىنە ءسىز دۇرىس نارسەلەرمەن اينالىسا باستاپ، ۋاقىتىڭىز بەن كۇش-قايراتىڭىزدى كەرەكسىز ىستەر مەن ويلارعا جۇمسامايتىن بولاسىز.  

③

باعىت-باعداردى قالاي بەلگىلەپ الۋعا بولادى؟ 

ءسىز ءوزىڭىز ءجۇرىپ وتىراتىن باعىتتى تاڭداپ الاسىز. ەگەر فوكۋس دەگەنىمىز تۇپكى ماقساتتى بىلدىرسە، باعىت — سول ماقساتقا جەتۋ ءۇشىن ءار كۇنگە ارنالعان ستراتەگيانى بىلدىرەدى.  

بەلگىلەنگەن باعىتتىڭ جوقتىعى موتيۆاسيانى تۇپ-تامىرىمەن قۇرتادى، ويتكەنى كەلەسى قادامنىڭ قانداي بولاتىنىن تۇسىنبەۋشىلىك پروكراستيناسياعا اپارىپ سوعادى. ءوزىنىڭ بلوگىن جازۋمەن اينالىسۋدى ۇيعارعان جانە ۋاقىتىنىڭ كوبىن باسقا كىسىلەردىڭ بلوگتارىن وقۋعا جۇمسايتىن ادام ۇيرەنشىكتى مىسال بولا الادى. بۇل ماڭىزدى ۇدەرىس، الايدا تەك قانا وقي بەرۋ ەش پايدا بەرمەي، تەك جالقاۋلىقتىڭ سىلتاۋى دا بولىپ ەسەپتەلۋى مۇمكىن. 

سوندىقتان، ەڭ اۋەلى، تابىسقا كەنەلتەتىن (نەمەسە كەنەلتپەي قوياتىن، ەشكىم ءبىلىپ بولمايدى) قام-قارەكەت ءتۇرىن ايقىنداپ الۋ قاجەت. بۇل تۇستا باستىسى — قانداي قادامدارىڭىزدىڭ دۇرىس، قانداي كادامدارىڭىز بۇرىس بولاتىنىن بايقاپ-باعامداپ وتىرۋ.  

بلوگگەر بولعىسى كەلەتىن ادامعا ول قادامدار مىنالار بولۋى مۇمكىن:

1. كونتەنت جازۋ.

2. وزەكتى بولىپ تۇرعان تاقىرىپتاردى زەردەلەۋ.

3. وزگە بلوگگەرلەرمەن تانىسىپ الۋ.

4. سايتتى وڭتايداندىرۋ جانە ديزاينىن جاساۋ.

5. جازىلعان كوممەنتاريلەرگە جاۋاپ بەرىپ وتىرۋ.

6. باسقا بلوگتاردى وقىپ وتىرۋ.

ەگەر ءسىز موتيۆاسياڭىز ازايىپ بارا جاتقانىن سەزسەڭىز، جالپى جاعدايعا قاراي قام-قارەكەت جوسپارىن جاساپ، كەلەسى قادامىڭىز قانداي بولماعىن ءبىلىپ الۋىڭىز قاجەت. ونى ناقتى قالاي جۇزەگە اسىرۋدى ءبىلۋدىڭ دە ماڭىزى زور.

موتيۆاسياسى «ۇرىپ» تۇرعان ادامدار نە ىستەپ جانە نە ءۇشىن ىستەپ جۇرگەندەرىن ويىنان شىعارماي، ءار ءىسىنىڭ ۇدەرىسىنەن ءلاززات الادى. جوسپارىڭىز قانشا قادامنان تۇرماسىن، ءار قادامىڭىزدىڭ ءمانى جايلى ويلاي ءجۇرىڭىز. 

كەي كەزدەرى موتيۆاسيا جوق بولىپ كەتىپ تۇراتىنىن ەستەن شىعارماڭىز، بۇل قاشىپ قۇتىلماس ۇدەرىس. ءبىراق، ءتارتىپ پەن جىگەرىڭىز ونى قايتارۋعا كومەكتەسەدى.

ساتتىلىك جولداس بولسىن!

وقۋعا كەڭەس بەرەمىز: جالقاۋلىقتى جەڭۋدىڭ ەڭ جاقسى ءادىسى

---