مۇعالىمدەردىڭ جالاقىسىنا ۇستەمەاقى قاشان قوسىلادى
ق ر ءبىلىم جانە عىلىم ۆيسە-مينيسترى بيبىگۇل اسىلوۆا ءبىلىم بەرۋدىڭ جاڭارتىلعان مازمۇنى بويىنشا ساباق بەرەتىن مۇعالىمدەردىڭ جالاقىسىنا ۇستەمەاقىنىڭ قاشان قوسىلاتىنىن ايتىپ بەردى.
«جاڭارتىلعان مازمۇن بويىنشا ساباق بەرەتىن مۇعالىمدەردىڭ جۇكتەمەسى ارتقاندىقتان، لاۋازىمدىق جالاقىسىن دا ارتتىرۋ قاراستىرىلعان. قاۋلى 7 اقپان كۇنى شىقتى، ءقازىر وڭىرلەر شۇعىل تارتىپتە ەسەپ جۇرگىزەدى جانە مەنىڭ پايىمداۋىمشا، اقپان ايىنىڭ جالاقىسى بەرىلەردە قاڭتار جانە اقپان ايلارىنىڭ ۇستەمە اقىسى بىرگە تۇسەدى»، - دەپ جاۋاپ بەردى ول ق ر بعم القاسىنىڭ كەڭەيتىلگەن وتىرىسى اياسىندا جۋرناليستەردىڭ سۇراعىنا.
سونىمەن بىرگە، ۆيسە-مينيستر جالاقىعا قوسىلعان ۇستەمە اقىنىڭ ازدىعى تۋرالى پارلامەنت ءماجىلىسىنىڭ دەپۋتاتى گۇلجان قاراعۇسوۆانىڭ سىنىنا جاۋاپ بەردى.
«كابينەتتى مەڭگەرۋ، سىنىپقا جەتەكشىلىك ەتۋگە قوسىلاتىن تولەمدەر 5 مىڭ تەڭگەدەن اسپايدى، بۇل تۇرعىدا قاراعۇسوۆانىڭ الاڭداۋشىلىعىن تۇسىنەمىن. ءبىراق، ءقازىر مەملەكەت باسشىنىڭ تاپسىرماسىمەن قاراستىرىلعان لاۋازىمدىق جالاقىنى كوبەيتۋدە اناعۇرلىم كوبىرەك اقشا قوسىلادى. ماسەلەن، ورتا ەسەپپەن مۇعالىمدەر 80 مىڭ تەڭگە السا، 30% ۇستەمە اقى ءدال وسى 80 مىڭ تەڭگە نەگىزىندە، ياعني شامامەن 24 مىڭ تەڭگە قوسىلادى»، - دەدى ب. اسىلوۆا.
ۆيسە-مينيستردىڭ ايتۋىنشا، 1 قاڭتاردان باستاپ، رەسپۋبليكا اۋماعىنداعى 90 مىڭعا جۋىق ءمۇعالىمنىڭ جالاقىسى كوبەيەدى. 1 قىركۇيەكتەن باستاپ - 200 مىڭ ءمۇعالىم ۇلتتىق بىلىكتىلىك تەستىن تاپسىرۋ ارقىلى ءوز ەڭبەكاقىلارىن كوبەيتە الادى. اتتەستاسيانىڭ جاڭا ەرەجەلەرى ازىرلەنىپ جاتىر.
قازاقپارات
You Might Also Like
-
بيىلعى وقۋ جىلىنان باستاپ ينفورماتيكا ءپانى ءۇشىنشى سىنىپتان باستاپ وقىتىلاتىن بولدى. بۇل تۋرالى ۇكىمەت وتىرىسىندا ق ر ءبىلىم جانە عىلىم ءمينيسترى ەرلان ساعادييەۆ ۇكىمەت وتىرىسىندا ءمالىم ەتتى.
-
شۆەدتىڭ ۇلى رەجيسسەرى ينگمار بەرگمان ايگىلى «ۇنسىزدىك» دەپ اتالاتىن فيلمىندە ادام ارى مەن ءناپسىسى ورتاسىنداعى كۇرەستى قاراما-قارسى تيپتەگى ەكى كەيىپكەر ارقىلى كورسەتكەن بولاتىن. ەڭ قىز...
