مۇگەدەكتىگى بار بالالار بالاباقشا كەزەگىنە قالاي الىنادى

سوڭعى جاڭارتۋ

(وزگەرتىلگەن ۋاقىتى 3 كۇن بۇرىن)

16 اقپ. 2023 00:00
229

مۇگەدەكتىگى بار بالالار بالاباقشا كەزەگىنە قالاي الىنادى

ق ر پرەمەر-مينيسترىنىڭ ورىنباسارى التاي كولگىنوۆ ءماجىلىس دەپۋتاتتارىنىڭ ساۋالىنا جولداعان جاۋابىندا مۇگەدەكتىگى بار بالالار بالاباقشا كەزەگىنە قالاي الىناتىنىن ءتۇسىندىردى.

«ق ر «پەداگوگ مارتەبەسى تۋرالى» زاڭىنا سايكەس ەرەكشە ءبىلىم بەرۋدى قاجەت ەتەتىن بالالار، مۇگەدەك بالاسى بار وتباسىنداعى بالالار مەكتەپكە دەيىنگى ۇيىمداردان ءبىرىنشى كەزەكتە ورىن الۋعا ۇمىتكەر بولىپ تابىلادى. مەكتەپكە دەيىنگى ۇيىمداردىڭ ۇلگىلىك قاعيدالارىنا سايكەس (قازاقستان رەسپۋبليكاسى وقۋ-اعارتۋ ءمينيسترىنىڭ 2022 جىلعى 31 تامىزداعى № 385 بۇيرىعى) مەملەكەتتىك مەكتەپكە دەيىنگى ۇيىمداردا جانە مەملەكەتتىك ءبىلىم بەرۋ تاپسىرىسى ورنالاستىرىلعان جەكەمەنشىك مەكتەپكە دەيىنگى ۇيىمداردا اتا-انا بالانىڭ تاماقتانۋىنا كەتەتىن شىعىننىڭ 100%-ىن تولەيدى»، - دەپ جازىلعان جاۋاپتا.

التاي كولگىنوۆتىڭ مالىمەتى بويىنشا، ازاماتتىق اۆياسيا كوميتەتى مۇگەدەكتىگى بار بالالار ءۇشىن سىرتقى جانە ىشكى رەيستەرگە العان بيلەت قۇنىن ءىشىنارا سۋبسيديالاۋ ماسەلەسىن قاراستىرۋى مۇمكىن.

«مۇگەدەكتىگى بار جولاۋشىلارعا ىشكى جانە حالىقارالىق رەيستەرگە تۇراقتى نەگىزدە 50% جەڭىلدىك بەرۋ ماسەلەسىنە كەلسەك، ازاماتتىق اۆياسيا سالاسىنداعى ۋاكىلەتتى ورگان مۇگەدەكتىگى بار جولاۋشىلارعا وتاندىق اۆياكومپانيالاردىڭ ىشكى جانە حالىقارالىق رەيستەرىنە جەڭىلدىك بەرۋدى قارجىلاندىرۋ ماسەلەسى سۋبسيديالاۋ ارقىلى قاراستىراتىن بولادى»، - دەپ جازادى ۆيسە-پرەمەر.