مۇرات ابەنوۆ: پوليسەيلەردەن گورى مۇعالىمدەردىڭ جالاقىسىن ءوسىرۋ كەرەك
كەشە ءبىرقاتار دەپۋتاتتار مۇعالىمدەردىڭ جالاقىسىن كوتەرۋ تۋرالى باستاما كوتەردى. ءتىپتى قىزدى-قىزدىمەن مىڭ دوللاردان تولەۋ كەرەك دەپ كوسىلگەندەرى دە بولدى. ارينە، جاقسى ۇستازدىڭ شاكىرتى وزىنەن وزاتىنى بەلگىلى. ال جاقسى ۇستازدى قالىپتاستىرىپ، ودان بىلىكتى شاكىرت كۇتكىمىز كەلسە، ۇستازداردىڭ جاعدايىن جاساۋىمىز كەرەك. سانانى تۇرمىس بيلەگەن ۋاقىتتا ەل بولاشاعىن تاربيەلەپ جاتقان ۇستازدارىمىزدىڭ تىم بولماعاندا ماتەريالدىق ماسەلەسى شەشىمىن تاۋىپ وتىرسا قۇبا-قۇپ بولار ەدى.
كەشەگى دەپۋتاتتاردىڭ باستاماسىنا وراي ءبىر كەزدە ءوزى دە ەلىمىزدەگى ءبىلىم سالاسىن باسقارعان مۇرات ابەنوۆتەن قازىرگى مۇعالىمدەردىڭ جالاقى ماسەلەسىنە قاتىستى پىكىرىن بىلگەن ەدىك. قوعام قايراتكەرى «الەم بويىنشا قۇقىق قورعاۋ سالاسى قىزمەتكەرلەرىنىڭ كوپتىگى جاعىنان العاشقى ون ەلدىڭ قاتارىنداعى قازاقستاندا قۇقىق قورعاۋشىلاردان گورى ۇستازداردىڭ جالاقىسىن كوبەيتۋ كەرەك» دەگەن ۇستانىمىن ايتتى.
«ءبىز ءبىلىم سالاسىنداعى رەفورمالار جايلى كوپ ايتامىز. جىل سايىن وسى سالاعا قويىلار تالاپتى كۇشەيتەمىز. ءتۇرلى باعدارلامالار ەنگىزىپ، ونى قيىنداتا تۇسەمىز. ال ءبىلىم سالاسىندا قىزمەت ەتەتىن ماماندار جىلدان جىلعا ءوز بىلىمدەرىن جەتىلدىرىپ، جاڭارتىپ وتىرۋلارى كەرەك. وعان تالاپ پەن باقىلاۋ بار. ال ءبىلىم سالاسىنداعى رەفورمالاردى جۇزەگە اسىراتىن ۇستازدار. ۇستازداردىڭ ساپالى قىزمەتىنىڭ ارقاسىندا عانا رەفورما رەفورما بولا الادى. مۇعالىمدەردىڭ قىزمەتىندەگى ساپاسىزدىق رەفورمانى جوققا شىعارادى. ال كەز كەلگەن سالاداعى نارىقتىق-ەكونوميكا بويىنشا جۇمىستىڭ ساپاسىن ارتتىرۋ ءۇشىن مامانداردى ىنتالاندىراتىن، ولارعا جۇمىس ىستەۋگە مۇمكىندىك بەرەتىن ول – قارجى ماسەلەسى. ياعني ىستەگەن ىسىنە قاراي الاتىن ايلىعى. سول سەبەپتى ءبىلىم سالاسى ماماندارىنا قانشالىقتى تالاپ قوياتىن بولساق، سونشالىقتى ولاردىڭ ايلىعىن دا كوتەرۋىمىز كەرەك. ولاردى تەك ۇگىتتەپ، «سەندەر بولاشاق ءۇشىن جۇمىس ىستەپ جاتىرسىڭدار!» دەپ ارقاسىنان قاعىپ، مارتەبەسىن تەك قۇر سوزبەن كوتەرۋمەن شەكتەلەتىن بولساق، ءبىز ەشتەڭە شەشپەيمىز»، - دەيدى مۇرات ابەنوۆ.
ساپالى جۇمىس تالاپ ەتىلگەن جەردە جوعارى دەڭگەيدەگى قارجى دا قاراستىرىلۋى كەرەك. بۇل ەشكىمگە ايعايلاپ ايتپاسا دا تۇسىنىكتى جاعداي. دەگەنمەن ۇستازدار تاراپىنا كەلگەندە از ايلىقپەن كوپ ەڭبەك تالاپ ەتەتىنىمىز جاسىرىن ەمەس. مۇرات ابەنوۆ قازىرگى مۇعالىمدەردىڭ كوبى جۇمىسىنان ايرىلىپ قالماۋ ءۇشىن عانا بارىنە كونەتىنىن ايتادى.
«ءبىر بايقايتىنىم، قازىرگى كەزدە ءبىلىم سالاسىنداعى ءتۇرلى رەفورمالار، جاڭا باعدارلاما، جاڭا ءبىلىم جۇيەسىمەن قىزمەت ەتەتىن كوپتەگەن ۇستازدار قىزمەتىنەن ايىرىلىپ قالماۋ ءۇشىن جۇمىس ىستەپ ءجۇر. باسشىلىقتىڭ قىرىنا ءىلىنىپ كەتپەس ءۇشىن بەرگەن تاپسىرمالارىنىڭ بارلىعىن ورىنداپ، قايدا بار، نە ىستە دەسە سونى جاساۋعا تىرىسادى. ارتىعىمەن جۇمىس ىستەسەڭ دە، جوق، باياعىڭشا كوشتەن قالماي جۇرە بەرسەڭ دە تولەنەتىن جالاقىدا ايىرماشىلىق بولماعاندىقتان، مۇعالىمدەردىڭ دە ءبىلىمدى ۇرپاق تاربيەلەپ، بىلىكتى ماماننىڭ نەگىزىن قالاۋعا دەگەن قىزىعۋشىلىعى ارتپاسى بەلگىلى. قازىرگى ۋاقىتتا بارلىق ماسەلە قارجىعا تىرەلىپ تۇرعان ۋاقىتتا، ۇستازداردى ايلىق ارقىلى جۇمىسقا دەگەن قىزىعۋشىلىعىن ارتتىرماعاننان كەيىن ەشكىم دە ارتىق جۇمىس ىستەگىسى كەلمەيدى. وسىلاي عانا ءتۇسىنۋ كەرەك. ەشكىم ونىڭ ەڭبەگىن ەلەپ، ارتىعىمەن جاساعانى ءۇشىن ارتىعىمەن اقشا تولەمەگەن سوڭ كوپتەگەن ۇستازدار قوسىمشا جۇمىس ىستەۋگە ءماجبۇر. ال باسقا جەردە، قوسىمشا جۇمىس ىستەپ جۇرگەن ادامنىڭ ءبىر ىسكە تۇبەگەيلى بەرىلىپ ىستەۋى ەكىتالاي»، - دەيدى قوعام قايراتكەرى.
اڭگىمە كەشەگى دەپۋتاتتاردىڭ ۇسىنىسىنان شىققاندىقتان مۇرات ابدۋلاميتۇلىنان ەگەر ۇستازداردىڭ جالاقىسىن كوتەرگەندەي بولساق، مەملەكەتتىڭ وعان الەۋەتى جەتە مە دەگەن سۇراقتى قويعان ەدىك. قوعام قايراتكەرىنىڭ جاۋابى قىسقا بولدى.
«مىسالى، ءبىز پوليسەيلەردىڭ ايلىعىن كوتەرىپ، باسقا سالانىڭ قارجىسىن ەكى ەسە ازايتساق، پوليسەيلەردەن مەملەكەتكە تۇسەتىن پايدا از. وسى تۇرعىدان العاندا ۇكىمەت ەسەپتەۋى كەرەك. ەلدىڭ دامۋىن، مەملەكەتتىڭ ەكونوميكاسىن العا جىلجىتۋ ءۇشىن مىقتى، ساۋاتتى مامان كەرەك. ال مىقتى مامانداردىڭ مەكتەپتەردەن شىعاتىنى ايتپاسا دا تۇسىنىكتى. ساپالى ماماندار دايىندامايىنشا ءبىز ەكونوميكامىزدى كوتەرەمىز دەپ ايتا المايمىز. مىسالى، مۇناي باعاسى قىمباتتاعان ۋاقىتتا كوپ ماماننىڭ قاجەتى جوق، مۇناي ءوز اقشاسىن ءوزى تاباتىن ەدى. ءقازىر مۇناي ارزاندادى، بيۋدجەتتە كىرىس جوق، وعان كىرىس كىرگىزەتىن جۇمىسشىلار. دەمەك، ءبىز ساپالى جۇمىسشى دايىنداماساق ەل ەكونوميكاسىنا سالماق تۇسەدى. وسىدان قانداي قورىتىندى شىعارۋعا بولادى. ياعني، ءبىز مۇعالىمدەر ءۇشىن قايدان بولسا دا قارجى تابۋىمىز كەرەك. ال تاپپاساق، ەرتەڭ ساپاسىز ماماندار كوبەيەدى. ساپاسىز مامان ەل ەكونوميكاسىن تۇرالاتۋدىڭ باستاماسى. قازاق ايتادى عوي، «شىعىس شىقپاي، كىرىس كىرمەيدى» دەپ، سول قاعيدانى ەسكە ءتۇسىرۋ كەرەك»، - دەدى ول.
مۇرات ابەنوۆ ۇستازدارعا قارجىنى قايدان تابۋعا بولاتىنىن دا ايتتى. ونىڭ ايتۋىنشا، ەلىمىزدەگى قۇقىق قورعاۋ سالاسى ماماندارىنىڭ قارجىسىن قىسقارتۋدان ءبىز ۇتىلمايدى ەكەنبىز.
«مەنىڭ ويىمشا، قۇقىق قورعاۋ سالاسىنداعى مامانداردىڭ جالاقىسىن كوتەرگەننەن گورى ۇستازداردىڭ ايلىعىن ءوسىرۋ ءتيىمدى. مىسالى، ءبىزدىڭ بولاشاقتا جەتەر جەتىستىكتەرىمىزدىڭ كوبى پارتادان باستالادى. وقۋشىلارعا ساپالى ءبىلىم بەرۋگە مۇمكىندىك جاساماۋ – بولاشاق ەل ەكونوميكاسىن ءوز قولىمىزبەن تۇرالاتۋ دەگەن ءسوز. ال قۇقىق قورعاۋ سالاسىنداعىلار ۇستازداردان از دەگەننىڭ وزىندە ەكى ەسە كوپ ايلىق الادى. قاراپايىم عانا قاعيداعا سۇيەنىپ ايتار بولساق، مەكتەپتە ءبىلىمدى، تاربيەلى، ساپالى وقۋشى تاربيەلەي الساق، قوعامداعى قىلمىس پەن تارتىپسىزدىكتى ازايتا الامىز. ياعني، ءمۇعالىمنىڭ ايلىعىن كوتەرۋ ارقىلى ەلىمىزدىڭ ەكونوميكاسىن، دامۋىن العا جىلجىتا الاتىن بولساق، ەكىنشىدەن قوعامداعى قىلمىستىڭ ازايۋىنا دا سەپتىگىن تيگىزە الامىز. سوندىقتان، قۇقىق قورعاۋ سالاسىنان گورى ۇستازداردىڭ ايلىعىن كوتەرۋدە ۇتارىمىز كوپ»، - دەيدى مۇرات ابەنوۆ.
ەستەرىڭىزگە سالا كەتەيىك، كەشە پارلامەنت ماجىلىسىندە وتكەن جيىندا دەپۋتات يرينا سميرنوۆا مۇعالىمدەردىڭ جالاقىسىن كوتەرىپ، كەم دەگەندە مىڭ دوللارعا جەتكىزۋدى ۇسىنعان بولاتىن.
You Might Also Like
-
الەمدە كەڭ تاراعان ءتىل اعىلشىن، ورىس تىلدەرى. ولاردى ءبىلۋ كوپتىك ەتپەيتىن اقيقات. سەبەبى كوپتىلدى مەڭگەرگەن جاستاردىڭ الار بەلەستەرى بيىك. سوندىقتان كوپتىلدى ءبىلىم بەرۋدىڭ باستى ماقساتى...
-
سارى اۋرۋ – ۆيرۋستى گەپاتيت، اسىرەسە ۆ جانە س ءتۇرى قاتار جۇرگەندە – وتە ءقاۋىپتى جانە وكىنىشكە وراي، كەڭ تاراعان سىرقات. سوزىلمالى ناۋقاسقا شالدىعۋ ءقاۋپى وتە جوعارى. ۆ گەپاتيتىمەن اۋىرعا...
