مۇسىلمان مەملەكەتتەرىنىڭ جارتىسى ساۋاتسىز - تۇركيا پرەزيدەنتى
تۇركيا پرەزيدەنتى رەدجەپ تايىپ ەردوعاننىڭ ايتۋىنشا، بۇگىندە مۇسىلمان مەملەكەتتەرى ءبىلىم مەن عىلىمعا كوپ كوڭىل بولمەيدى. سونىڭ سالدارىنان وزىق ويلى عالىمدار باتىسقا كەتىپ جاتىر. ال اقپاراتتىق تەحنولوگيالار سالاسىنداعى ساۋاتسىزدىق بارشا مۇسىلمان الەمىنە ءقاۋىپ ءتوندىرىپ وتىر، دەپ قازاقپارات حابارلايدى.
«كەزىندە يسلام الەمى ءبىلىم، عىلىم مەن يننوۆاسيالاردىڭ ورتالىعى بولدى. ارتىنان سونىڭ بارلىعى ەكىنشى ورىنعا ءتۇسىپ كەتتى. سول كەزدە توقىراۋ زامانى باستالدى. قازىرگى كەزدە الەمدەگى مۇسىلمان حالقىنىڭ 55 پايىزى ساۋاتسىز. ەكونوميكالىق دامۋ جانە ىنتىماقتاستىق ۇيىمىنا مۇشە مەملەكەتتەردە ءبىلىم بەرۋ سالاسىنا جالپى ىشكى ءونىمنىڭ 5،2 پايىزىن جۇمسالادى. ال مۇسىلمان ەلدەرىندە اتالعان كورسەتكىش 1 پايىزعا دا جەتپەيدى. ءبىزدىڭ ماڭداي الدى عالىمدارىمىز بولسا، باتىسقا كەتىپ، سول جاقتا قىزمەت ەتىپ ءجۇر»، - دەپ اتاپ كورسەتتى ەردوعان بۇگىن يسلام ىنتىماقتاستىعى ۇيىمنىڭ عىلىم جانە تەحنولوگيالار جونىندەگى سامميتىندە.
ونىڭ ايتۋىنشا، قازىرگى كەزدە مۇسىلمان ەلدەرى اقپاراتتىق تەحنولوگيالاردى شىعارمايدى. الايدا ءاربىر مەملەكەت ۇلتتىق قاۋىپسىزدىگىنە باسا نازار اۋدارۋى قاجەت.
استاناداعى سامميتكە وزبەكستان، پاكىستان، ازەربايجان، اۋعانستان، يران، تۇركيا، ۆەنەسۋەلا، كامور ارالدارى، ماۆريتانيا، جانە باسقا دا مۇسىلامان مەملەكەتتەرىنىڭ پرەزيدەنتتەرى مەن ۇكىمەت باسشىلارى كەلدى.
ايتا كەتەيىك، يسلام ىنتىماقتاستىعى ۇيىمى - 1969 جىلى 25 قىركۇيەكتە مۇسىلمان مەملەكەتتەرى باسشىلارىنىڭ راباتتا وتكەن كونفەرەنسياسىندا نەگىزى قالانعان ەڭ ءىرى جانە ىقپالدى ۇكىمەتتىك ءارى حالىقارالىق مۇسىلمان ۇيىمى. قازىرگى ۋاقىتتا ول جالپى سانى شامامەن 1،5 ميلليارد ادامدى قامتيتىن 57 ەلدىڭ باسىن بىرىكتىرىپ وتىر.
يىۇ-نىڭ نەگىزگى قاعيداتتارى مىنالار: تولىق تەڭدىك؛ ءار حالىقتىڭ ءوز تاعدىرىن ءوزى شەشۋ قۇقىعىنا دەگەن قۇرمەت؛ ىشكى ىستەرىنە ارالاسپاۋ؛ مەملەكەتتەردىڭ ەگەمەندىگىن، تاۋەلسىزدىگىن جانە اۋماقتىق تۇتاستىعىن قۇرمەتتەۋ؛ يىۇ-عا مۇشە مەملەكەتتەر اراسىنداعى داۋلى ماسەلەلەردى كەلىسسوز، ارااعايىندىق نەمەسە اربيتراج ارقىلى بەيبىت جولمەن شەشۋ؛ ۇيىمعا مۇشە مەملەكەتتەر اۋماقتارىنىڭ تۇتاستىعىنا، سونىمەن بىرگە ساياسي تاۋەلسىزدىگىنە دە قارسى كۇش قولدانباۋ نەمەسە قوقان-لوققى كورسەتپەۋ.
قازاقستان 1995 جىلى يسلام ىنتىماقتاستىعى ۇيىمىنىڭ تولىق قۇقىلى مۇشەسىنە اينالدى.
You Might Also Like
-
2025 جىلعا قاراي لاتىن الىپبيىنە تولىقتاي ەنە الامىز. بۇل تۋرالى ش. شاياحمەتوۆ اتىنداعى رەسپۋبليكالىق ورتالىعىنىڭ ديرەكتورى ەربول تىلەشوۆ ءمالىم ەتتى.
