مۇسىندەر
- ول كەزدە ۋنيۆەرسيتەتتىڭ ءبىرىنشى كۋرسىندا وقىپ جۇرگەن كەزىم، - دەيدى ول. - قالاداعى مەكتەپتى بىتىرە سالىپ، وسى وقۋعا تۇسكەنمىن.
توپتا ستاروستانىڭ كومەكشىسى ەدىم. ستاروستا - ءبىر توپتا وقيتىن قىز. كۋراتورىمىز بار. كۋراتورىمىز - اپاي. ءالى تاجىريبەسى كوپ ەمەس جاس مامان. سولاردىڭ تاپسىرماسىمەن ارلى-بەرلى جۇگىرەمىن دە جۇرەمىن.
ءبىر كۇنى سولاي جۇگىرىپ كەلە جاتىر ەدىم، الدىمنان كۋراتورىم شىعا كەلدى. "توپتى جينا، - دەدى كۋراتورىم. - قالامىزعا ءمۇسىن جاسايتىن شەبەرلەردىڭ كورمەسى كەلىپتى. سوعان بارامىز".
ءبىرىنشى كۋرستىقتارعا ءبارى قىزىق. جينالىپ الدىق تا، الگى مۇسىندەر قويىلعان عيماراتقا تارتىپ بەردىك.
عيماراتتىڭ ەسىگىنىڭ اۋزىنا كەلگەندە-اق، كۇلكىگە كەنەلدىك تە قالدىق. ءدال ەسىكتىڭ اۋزىندا بيلەت تەكسەرۋشى ادام تۇر ەكەن دەپ ويلاعانبىز. سويتسەك، ءمۇسىن قويىپ قويىپتى.
تاڭدانىسىمىز ىشكە بارعان سوڭ ۇلعايا ءتۇستى. مۇسىندەر ءتىرى ادام سەكىلدى.
بۇل جەرگە تاماشالاۋعا كەلگەن جالعىز ءبىز ەمەس ەكەن. باسقا ماماندىقتاردىڭ دا ستۋدەنتتەرى ءجۇر.
كىشكەنتايىمنان ءبىر ادەتىم ءبىر نارسەنى كوزبەن كورىپ، قولمەن ۇستاپ كورمەسەم، تىنشىمايتىن ەدىم. مىنا مۇسىندەردى دە بۇل نە زاتتان جاسالعان نارسە دەپ ۇستاپ كورگىم كەلىپ ءجۇر. ءبىراق مۇسىندەردىڭ بەر جاعىنا ءجىپ كەرىپ قويىپتى. قولمەن ۇستاۋعا بولمايدى دەيدى.
جولىم بولعىش قوي ءبىراق. نەگىزى، جولىم بولعىش جىگىتپىن! ءبىر ءمۇسىن ءجىپتىڭ بەر جاعىنا شىعىپ قالىپتى. وزدەرى دە بايقاماي قالعان-اۋ دەيمىن. الدە ادەيى قويىپ قويدى ما؟
ءمۇسىن ەر ادامنىڭ بەينەسىندە جاسالعان ەكەن. اياعىن اياعىنىڭ ۇستىنە سالىپ، شىنتاعىن ورىندىقتىڭ ارقالىعىنا قويعان كۇيى وتىرعان ەر ادام. قۇددى ءتىرى ادام دەرسىڭ!
ەلدەن بۇرىن ۇستاپ قالايىن دەدىم دە، ءمۇسىننىڭ جانىنا جەتىپ كەلدىم.
بۇل نە زاتتان جاسالعان نارسە دەپ كوستيۋمىنىڭ جەڭىنەن ۇستاي بەرگەنىم سول ەدى، اينالام جاڭعىرىققان كۇلكىگە تولسىن دا كەتسىن. وعان قوسا ءمۇسىنىم دە قوزعالىپ كەتتى.
سويتسەم، بۇل وتىرعان بىزدەگى ءبىر فاكۋلتەتتىڭ زامدەكان اعايى ەكەن عوي. ول دا ستۋدەنتتەرىن الىپ كەلگەن. شارشاعان سوڭ وتىرا تۇرايىن دەپ شەشكەن. مەن ونى ءمۇسىن ەكەن دەپ... ءوزى دە ءمۇسىن قۇساپ قوزعالماعان كۇيى وتىرا قالعان ەكەن... اياعىندا ءتىرى ادامى قايسىسى، ءمۇسىنى قايسىسى، اجىراتۋدان قالدىق قوي...
You Might Also Like
-
بۇگىندە ۋلترادىبىستىك زەرتتەۋ (ۋدز) ەشقانداي اۋىرسىنۋ اكەلمەيتىن جانە ءينۆازيۆتى ەمەس (ياعني جاراقاتسىز، تانگە ەنبەيتىن) ءادىس بولعاندىكتان، مەديسينادا كەڭىنەن قولدانىلادى.
-
...بۇل ويىندارمەن ءوزىڭىز دە ويناعىڭىز كەلىپ كەتەدى
