InfoHub Logo

ادام ولىمىنە اكەلىپ سوعاتىن كەز كەلگەن بيلەر شەشىمىنە مەن قارسىمىن. ول  ادامدىققا، ادامگەرشىلىككە جاتپايدى.

اۆتور

ادال ماحابباتتىڭ  قۇربانى بولعان عاشىقتاردىڭ جان تۇرشىگەرلىك ولىمىنە اكەلىپ سوققان بيلەر شەشىمىنىڭ نۇكتەسى - ەڭلىك پەن كەبەكتىڭ موينىنا ارقان سالىپ، ەكى اتتىڭ قۇيرىعىنا بايلاپ الىپ، سۇيرەپ، "ماتايلاپ" ۇرانداتىپ شاۋىپ-شاۋىپ توبەگە تومپەشىك جاساپ تىندى. ءتىپتى ادام تۇگىلى، جىرتقىش اڭدا ءوز بالاسىنا ءولىم تىلەمەيدى. بۇل جازا وتە قاتە شەشىم ەدى.

قاي زامان، قاي عاسىردا بولماسىن ەكى جاستىڭ باقىتتى بولعانىن قالاسا جۇرەگىندە مەيىرىمى، باسىندا تاۋىقتىڭ ميىنداي اقىلى بولسا شەشىم شىعارعان بيلەر ولىمگە كەسپەس ەدى. وسىنداي ولىمگە اكەلىپ سوعاتىن بيلەردىڭ اۋىر شەشىمىنە سەبەپ - اۋىلدا قالعان بيلەردiڭ سۇڭعىلا قارامەندە ءدال باسىپ ايتقان “مەنمەندiگiندە” جانە بوزبالالاردىڭ (ماتاي جاعى) جالعان نامىسشىل كەۋدەمسوقتىعىندا. تەرەڭ ويسىزدىقپەن، اسىعىس اقىلسىزدىق ارقاسىندا عاشىق جانداردىڭ ءومىرى قىرشىننان قيىلدى.

مۇمكىن اجالعا اراشا تۇستەتىن قابانباي مەن توقتامىس جاۋ ءوتiندە جۇرمەي ەلدە بولعاندا ات قۇيرىعىنا بايلانباس پا ەدى، كىم ءبىلسىن؟ سوندىقتان دا اجالعا اراشا تۇسەتiن ادامدارى جوق بولعاندىقتان قاتىگەز توبىقتى بيلەرىنىڭ شەشىمىنىڭ قۇربانى بولدى.

ماتاي مەن توبىقتى رۋىنىڭ اراسىنداعى جارانىڭ بەتىنە تۇز سەپكەن كۇننىڭ وزىندە، كەبەكتi جار قىلۋعا بەكiنگەنى دە، الىپ قاشۋعا ءماجبۇر ەتكەنى دە، ەكi ەلدiڭ ءباتۋاسىن بۇزۋعا سەبەپشi بوپ، وت تاستاعانىنا دا، اتاستىرىپ قويعان باسقا قالىڭدىعىنىڭ بار ەكەندىگىن بىلگەن كۇننىڭ وزىندە وسنىڭ بارىنە ەڭلىكتى كىنالى دەپ سانايتىن بولساق تا - ءادىل بيلەردىڭ ءولىم جازاسىنا كەسۋى تىم ارتىق اقىلسىزدىق ەدى. 

سونىمەن بىرگە ءبىر شەڭبەردەن شىعا المايتىن نادان حالىقتىڭ - نادان ءسالت-داسۇرىنىڭ (اتاستىرۋ) ارقاسىندا - ەكى جاس وپات بولدى. وسىعان ۇقساس سول زاماندا "امەڭگەرلىك"، "بەسىك قۇدا"، "اتاستىرۋ" سەكىلدى ادام ساناسىنا سىڭبەيتىن تۇسىنىكپەن قالىپتاسقان سالت-داستۇرلەر تالاي جاستى انا دۇنيەگە ەرتە اتتاندىردى.

شىركىن! تۇندىگىنەن ءتۇتىنى ءتۇزۋ ۇشىپ، باقىتتىڭ بەسىگىندە تەربەلىپ، ايرانداي ۇيىپ ەكى جاستىڭ باقىتتى ءومىر سۇرگەنىنە نە جەتسىن. كوگىندە قىران قۇسى سامعاپ، بايتەرەگى اسپانمەن سىرلاسقان، بەيبىت تە تاۋەلسىز ەلدە ءومىر ءسۇرىپ جاتىرمىز. قۇدايعا شۇكىر اقتى اق دەپ، قارانى قارا دەپ ايىرا بىلەتىن ءادىل شەشىم شىعاراتىن اتا زاڭىمىز بار. قازىرگى تاڭدا ەڭ باستىسى پاراساتتى ويلاي بىلەتىن، ەركىندىك پەن ماحابباتقا قۇرمەتپەن قارايتىن سانالى قوعام بار.

توقسان اۋىز ءسوزدىڭ توبىقتاي ءتۇيىنىن جاسار بولسام، "اعاش ءبىر ورىندا تۇرىپ كوگەرەدى"-دەگەن ەكەن دانالارىمىز. ولاي بولسا جاپىراعىن جايىپ كوگەرمەك بولعان تەرەكتىڭ تامىرىن كەسپەيىك. ول ءوسسىن، كوگەرسىن.

---