InfoHub Logo

مەنىڭ ناعاشىلارىم شانشار ەلىنىڭ ادەت-عۇرپىن ەسكە الىپ، مىناداي ءبىر اڭگىمە ايتتى.

قىس ايى بولاتىن. كۇن شاڭعىتقان اياز ەدى. ءۇش سالت اتتى ادام اقايدىڭ قاسەنىنىڭ اۋلىنان قايتىپ كەلە جاتىپ، ءتورت ۇيدەن عانا تۇراتىن شانشاردىڭ از عانا اۋلىنا كەز بولدىق. كەلگەن قوناققا تانىعان-تانىماعانىنا قاراماي قوناقاسى بەرىپ، سىيلاۋ قازاق ەلىنىڭ ەجەلگى ءداستۇرى عوي. «بوي جىلىتىپ الايىق» دەپ ويلاپ، اتتاردىڭ اۋىزدىعىن الىپ، شوپكە بايلاپ، سالەم بەرىپ، ءبىر ۇيگە كىرىپ كەلدىك.

كەلسەك، ءبىر قىز جۇكاياقتىڭ ۇستىندە ءجۇن ءتۇتىپ، جەڭگەسى سىرماقتىڭ ۇستىندە ۇرشىق ءيىرىپ وتىر ەكەن. ەكەۋىنەن باسقا ۇيدە ادام جوق. ءبىز تورگە شىعىپ جايلاسىپ وتىردىق. قاسىمداعى جىگىتتەردىڭ ءبىرى اتقوسشى بولاتىن. باسىندا جاڭادان تىكتىرگەن، پليۋش بارقىتپەن تىستالعان قارا ەلتىرى
تىماعى بار-دى. باسقا كيىمدەرى جۇپىنى ەدى. ەكىنشى جىگىتتىڭ اياعىندا قونىشى ۇزىن جىلتىر ساپتاماسى بار-دى. قاي ۇيگە كەلمەسىن قونىشىنداعى كيىزىن الىپ، تۇكىرىپ-تۇكىرىپ ەتىگىنىڭ قونىشىن جالتىراتىپ سۇرتە باستايتىن-دى. ىسپالايتىن دا جاتاتىن-دى. الگى جىگىت ۇيگە كىرىپ وتىرىسىمەن، ءوزىنىڭ سول داعدىلى كاسىبىنە كىرىستى.

جۇكاياقتىڭ ۇستىندە وتىرعان قىز بارىمىزگە كوز توقتاتىپ ءبىر قاراپ الدى دا:

— جەڭەشە، مىنا كىسىلەردىڭ ءجون-جوباسىن سۇراپ، تانىسپايسىز با؟ — دەدى جەڭگەسىنە بۇرىلىپ.

— جوندەرىن سۇراماي-اق وزدەرى ءتۇسىندىرىپ جاتقان جوق پا؟ تاۋدىڭ باسىنان ەتەگىنە دەيىن تۇلكى قۋعان تازى ۇقساپ، ۇيگە كىرىپ ۇلگەرمەي-اق ساندەنىپ، اياقتارىن جالاپ جاتقان ەل اراسىنىڭ سەرىلەرى ەمەس پە؟ — دەدى جەڭگەسى ەرىندەرىن سىلپ ەتكىزىپ.

— مەنىڭ بايقاۋىمشا بۇل كىسىلەر قايىن جۇرتىنىڭ اۋلىنا بارا جاتقان ادامدارعا ۇقسايدى. ويتكەنى شەتكەرەك وتىرعان اعاي تىم باسىنان جاراسىپتى، — دەدى قىز ءسوزدى ءىلىپ اكەتىپ.

ول ەلدىڭ سىرى ەرتەدەن بىزگە ءمالىم عوي. ءبىزدى ەرمەك جاساپ كۇلكىگە اينالدىرا باستاعانىن سەزدىم دە:

— قاراقتارىم، ءبىزدىڭ ءجايىمىزدى ايتقىزباي-اق بىلگەندەرىڭدى ءتۇسىنىپ وتىرمىز. ءبىراق، ەندى، الىس جولعا كەتىپ بارا جاتقان ادامدار ەدىك. اسىعىسپىز. بىزگە ارناپ ەت اسپاڭدار. اششى قۋىرداق پەن ءبىر شاي ازىرلەي قويىڭدار، — دەدىم مەن. ءۇيدىڭ يەسى:

— قاقساپ-زارلاپ ايتاتىنىن ايتتى عوي، ورىنداماساق بولماس، — دەپ ورنىنان تۇردى [جەڭگەسى]. ونىڭ سوڭىنان قىز دا كەتتى. تاعى قاي جەرىمىزدەن ءمىن تابادى بۇلار دەپ كۇدىكتەنىپ، بەرگەن شايلارىن قىسىلا-قىسىلا ءىشىپ، اسىعىس اتتاندىق الگى ۇيدەن.

---