InfoHub Logo

اۋىلدا، بولىستا قىزىلبورىك بولىپ ىستەيتىن اپەرباقان ءبىر شابارمان اۋىلعا ءجيى كەلىپ، كەزدەسكەن ادامداردىڭ ءبارىن جازىقسىز جازعىرىپ، ەلدىڭ مازاسىن الا بەرىپتى. سول اۋىلدا بىرىمەن-بىرى قاتتى وينايتىن ەكى قۇرداس ادام بولسا كەرەك. بىرەۋى ەكىنشى قۇرداسىن الىستان نۇسقاپ:

— مىنا كەلە جاتقان ادام پاتشانى دا، بولىستى دا تانىعىسى كەلمەيتىن، ەلدى ولارعا قارسى ۇگىتتەيتىن ارام پەيىلدى ادام، — دەپ تانىستىرىپتى قىزىل بورىككە. قىزىلبورىك ەكى كوزى قانتالاپ، ەكى الاقانىنا كەزەك تۇكىرىپ، كىجىنە باستاپتى وعان.

ەكىنشى قۇرداسى كەلىپ سالەم بەرگەن كەزدە:

— سەن پاتشانى دا، بولىستى دا تانىمايتىن كورىنەسىڭ عوي، — دەپ قىزىلبورىك مۇرتىن شىكىرەيتىپ، كوزىن ەجىرەيتە باستاپتى.

— كورمەسەم، ول كىسىلەردى مەن قالاي تانيمىن؟ — دەپتى ەكىنشى قۇرداس.

— كورسەتەمىن مەن ساعان كورمەگەندى، تانىماعاندى. قول-اياعىڭدى كىسەندەپ، بارسا-كەلمەسكە اتتاندىرامىن مەن سەنى، — دەپ اۋزى كوپىرىپ، گۇر-گۇر ەتىپ، اۋىلدى باسىنا كوتەرىپتى الگى قىزىلبورىك. كوپكە دەيىن باسىلماي داۋلاپ سويلەي بەرىپتى.

ەسىك الدىندا شاي قويىپ جۇرگەن ءبىر جاس ايەل بولىستىڭ شابارمانىنىڭ كوپ سويلەۋگە بەت العانىن ءتۇسىنىپ، ءبىر اياق قىمىز اكەلىپ ۇسىنىپتى.

— اعاتاي، ول كىسىگە بوسقا ۇرسا بەرمەڭىزشى. ول كىسى ءوزىڭىزدىڭ كۇشىگىڭىز بولادى، — دەپتى.

قىزىلبورىك ءوزىنىڭ اقىماق بولعانىن سوندا ءتۇسىنىپ:

— اكەڭنىڭ، — دەپ شاعىستىرعان العاشقى قۇرداسقا قامشىسىن الا ۇمتىلىپتى. ەستىپ تۇرعان ەل كۇلكىدەن ىشەكتەرى ءتۇيىلىپ، ولە جازداپتى.

---