ناعىز حانشا
ەرتە، ەرتە، ەرتەدە ءبىر حانزادا بولعان ەكەن، ونىڭ قايتسەم دە حانشاعا ۇيلەنەم دەگەن اسىل ارمانى بار كورىنەدى، تەك ناعىز حانشاعا. مىنە، ول سول سەبەپتى دۇنيەنىڭ ءتورت بۇرىشىن تۇگەل كەزىپ شىعادى، الايدا ءوزى ويلاعانداي ەشكىم ۇشىراسپايدى. حانشا دەگەندەرىڭ تولىپ جاتىر، ءبىراق ناعىز حانشا ما ەكەن سولار؟! وسى اراسىن بىلە الماي، ول ارىپ-اشىپ ەلىنە ورالادى، – ناعىز حانشا قولعا ۇستاتپاس اسىلداي ىنتىقتىرا تۇسەدى.
بىردە ىڭىردە كۇن رايى كىلت وزگەرىپ، تاۋ-تاستى جاڭعىرىقتىرىپ كۇن كۇركىرەپ، نايزاعاي ويناپ، جاڭبىر شەلەكتەپ قۇيدى. بۇل نەتكەن سۇمدىق!
كەنەت قالانىڭ قاقپاسى سارت-سارت قاعىلدى، كارى كورولدىڭ ءوزى شىقتى.
قاقپا الدىندا بەيتانىس حانشا تۇر ەدى. قۇدايىم-اۋ، ونىڭ سيقى نە بولىپ كەتكەن! جالبىراعان شاشىنان، مالمانداي كويلەگىنەن سورعالاعان سۋ كەبىسىنە قۇيىلىپ، اسىپ توگىلىپ جاتىر، سول تۇرىنە قاراماي، ناعىز حانشامىن دەپ قويمايدى ءوزى.
«ونى ءبىز ءالى بىلە جاتارمىز!» دەپ ويلادى دا كارى حانىم ءلام دەمەستەن جاتار بولمەگە بەتتەدى. بارعان بويدا بار توسەنىشتەر مەن كورپە-جاستىقتى الىپ تاستاپ، توسەكتىڭ تاقتايىن جالاڭاشتاپ، وعان ءبىر ءتۇيىر بۇرشاق ءدانىن قويىپ، وسىنىڭ ۇستىنە قاباتتاپ جيىرما كورپە، جيىرما قۇس توسەك سالدى.
وسى سالىنعان توسەككە حانشانى جاتقىزدى.
ەرتەسىنە ودان قالاي ۇيىقتاپ تۇردىڭ دەپ سۇرادى.
– اح، ايتا كورمەڭىز وتە ناشار! – دەپ حانشا بەزەك قاقتى. ءتىپتى كوز ىلمەدىم دەسە دە بولار! بۇل نەعىلعان توسەك ەكەنىن ءبىر قۇدايدىڭ ءوزى ءبىلسىن! ايتەۋىر، ءبىر قاتتى زاتتىڭ ۇستىندە جاتىپ شىقتىم، ونە بويىم كوكپەڭبەك بولىپ قالعان شىعار! قىرسىق دەپ وسىنى ايت!
مىنە، وسى ارادا ونىڭ ناعىز حانشا ەكەنىنە ەشكىمنىڭ ءشۇباسى قالمادى. قىرىق قابات كورپە استىنداعى بۇرشاق ءدانىنىڭ قاتتىلىعىن سەزۋ – تەك اسىل تۋعان تەكتى بەكزاتتارعا عانا ءتان بولسا كەرەك.
قالىڭدىق ىزدەپ شارق ۇرعان حانزادامىز وعان ۇيلەندى. ەندى ول ءوزىنىڭ ناعىز حانشاعا ۇيلەنگەنىنە سەنىمدى. ال ءبىر ءتۇيىر بۇرشاقتى مۋزەيگە جىبەردى، الدەكىم ۇرلاپ كەتپەسە ول ءالى سوندا جاتقان بولۋ كەرەك.
حانزادانىڭ ۇيلەنۋ تاريحى، مىنە، وسىنداي!
اۋدارعان ش.بەيسەنوۆا
You Might Also Like
-
يسلانديانىڭ ۆەستمان ارالدارىنداعى تريدرانگار شامشىراعى الەمدەگى وڭاشا تۇرعان ەڭ ۇرەيلى شامشىراقتاردىڭ ءبىرى بولىپ تابىلادى.
-
شولپان سارسەنبايعا شىققان جىلى وزىندەي جاس كەلىنشەكتەرمەن اۋلاقتا كەڭەسكەندە: «بالاسىز ءومىردىڭ قىزىعى جوق قوي»، – دەپ اۋزىمەن عانا ايتۋشى ەدى. مال ورنىنا ساتىلىپ، جانى سۇيمەگەن جا...
