ميشلەن جۇلدىزدارى: ميشلەن مەيرامحانالارى نەسىمەن قۇندى؟
بۇل ماتەريالدا اسپازدىق جانە ميشلەن جۇلدىزدارى تۋرالى تولىق مالىمەتتەر ايتىلادى.
ميشلەن جۇلدىزدارى دەگەنىمىز نە؟
ءتۇرلى ەلدەرگە ساياحاتتاپ، ساپالى مەيرامحانا تاعامدارىن باعالايتىن ءاربىر تاماق تالعاعىشتار ميشلەننىڭ جانە ميشلەن جۇلدىزىنىڭ نە ەكەنىن جاقسى ءبىلۋى كەرەك. بۇل ۇعىمدار 1900 جىلى اندرە ميشلەننىڭ جاساپ شىعارعان انىقتامالىعىنان باستاۋ العان. ول ءوزىنىڭ ەسىمىمەن اتالاتىن (قازىرگى تاڭدا تانىمالدىلىققا يە بولعان) كومپانيانى باسقارا وتىرىپ، نارىقتا اۆتوموبيل شيناسىن عانا ەمەس، سونداي-اق اۆتوموبيلگە قاتىسى بار بارلىق قۇرال-جابدىقتاردى ىلگەرى جىلجىتقان.
بۇل انىقتامالىقتا جولدا اۆتوموبيل جۇرگىزۋشىلەرىنە قاجەت بولاتىن ورىنداردىڭ ءتىزىمى عانا ۇسىنىلعان. ولاردىڭ اراسىندا مەيرامحانالار دا بولعان. انىقتامالىقتى جاساۋشىلار مەيرامحانالاردىڭ كەيبىرىن جۇلدىزشامەن بەلگىلەپ، تاعامداردىڭ قىمبات ەكەندىگىن كورسەتىپ وتىرعان. اندرە ميشلەن فرانسۋزداردىڭ نەنى قالايتىندارىن - اۆتوموبيلدەر مەن ءدامدى تاماقتى ۇناتاتىندارىن جاقسى بىلگەن.
«ميشلەن گيدى» حح عاسىردىڭ 20-جىلدارى اسا ۇلكەن سۇرانىسقا يە بولدى. ونىڭ باستى سەبەبى – بۇل انىقتامالىقتا ءتۇرلى مەيرامحانالاردىڭ تاعامدارى مەن باس اسپازشىلاردىڭ جۇمىستارىنا ءۇش جۇلدىزدان قۇرالعان شكالا بويىنشا باعا بەرىلگەن. سونىمەن، ميشلەن جۇلدىزى دەگەنىمىز نە؟
- ءبىر جۇلدىز مەيرامحاناداعى تاعامنىڭ وتە ءدامدى ەكەندىگىن بىلدىرگەن.
- ەكى جۇلدىز – ءسىزدىڭ باعىتىڭىزدىڭ بويىندا جول-جونەكەي ورنالاسقان مەيرامحانانىڭ تاعامدارىنىڭ تاماشا ەكەندىگىن جانە ول جەردەن تاماقتانۋعا تۇرارلىق ەكەندىگىن كورسەتكەن.
- ءۇش جۇلدىز – باس اسپازدىڭ جۇمىسى كەرەمەت، تاعامى – ونەر تۋىندىسى سانالعان. مۇنداي مەيرامحانالاردان 2-3 اي بۇرىن ورىن الىپ جانە ساياحات جوسپارىنا ەنگىزىپ، ارنايى اتباسىن بۇرعان.
سول ۋاقىتتان بەرى ميشلەن جۇلدىزى بار مەيرامحانالار جوعارى ساپا مەن اسپازدىق ونەردىڭ ەگىز ۇعىمى سانالادى. ال، «ميشلەننىڭ قىزىل گيدى» - الەمدەگى ەڭ ۇزدىك مەيرامحانالاردىڭ جول كورسەتكىشى. قانداي ەلگە ساپار شەكسەڭىز دە قايدان تاماقتانۋعا بولاتىنىن بىلەتىن بولاسىز. وتە ىڭعايلى!
«ميشلەن گيدى» نەلىكتەن قىزىل ءتۇستى؟
وتە وڭاي... ميشلەن ەكى ءتۇرلى جولنۇسقا – «قىزىل» ءتۇستىسى مەيرامحانالار مەن قوناقۇيلەرگە، ال «جاسىل» ءتۇستىسى ءار ەلدىڭ تابيعي جانە تاريحي ماڭىزى بار كورىكتى جەرلەرىنە ارنالىپ شىعارىلادى. ءار كىتاپتىڭ كولەمى اۋقىمدى جانە اس ءمازىرى جازىلعان ەگجەي-تەگجەيلى اقپاراتتاردى قامتيدى.
ايتپاقشى، ميشلەن ەۋروپا ەلدەرى بويىنشا بارلىعى 12 «قىزىل» گيد شىعارادى. فرانسيا، گەرمانيا، يتاليا، يسپانيا، نيدەرلاندى، بەلگيا، ليۋكسەمبۋرگ، ۇلىبريتانيا مەيرامحانالارى بويىنشا جەكە جولنۇسقالار جاساپ شىعارۋدا. ميشلەن جۇلدىزى بار فرانسياداعى مەيرامحانالار سانى ەۋروپاداعى باسقا ەلدەرگە قاراعاندا ارتا تۇسۋدە.
الايدا، جۇلدىزى بار مەيرامحانالار سانى كوپ ەل فرانسيا ەمەس. بۇل – توكيو، مۇندا 3 جۇلدىزى بار 9، ەكى جۇلدىزى بار 25 جانە ءبىر جۇلدىزى بار 117 مەيرامحانا ورنالاسقان. وكىنىشكە وراي، ميشلەن مەيرامحانالارىنىڭ تىزىمىندە وسى ۋاقىتقا دەيىن قازاقستاننىڭ ءبىر دە ءبىر تاماقتانۋ ورىندارى كىرمەگەن. ساراپشىلار ءالى قازاقستانعا كەلە قويماعان سياقتى.
ميشلەن مەيرامحاناسى دەگەنىمىز نە؟
ميشلەن مەيرامحانالارى بىرنەشە ونجىلدىقتار بويى اۆتورلىق تاعامدارىمەن، جوعارى دەڭگەيدەگى قىزمەت كورسەتۋلەرىمەن جانە ماڭعاز ينتەرەرلەرىمەن ەرەكشەلەنىپ كەلەدى. شىنتۋايتىندا، بۇل تۇسىنىكتىڭ ءمانى الدەقايدا تەرەڭدە جاتىر، ال ميشلەن تىزىمدەمەسىنە كىرەتىن مەيرامحانالار الۋان ءتۇرلى جانە جايلىلىعى بويىنشا بىر-بىرىندە ۇلكەن ايىرماشىلىق جوق. مىسالى، سىزدەر سينگاپۋرداعى فاست-فۋد ازىرلەيتىن دۇكەننىڭ جاقىندا عانا ميشلەن جۇلدىزىن العانىن بىلەسىزدەر مە؟
الەمدە العاش رەت كوشە تاعامىن ازىرلەيتىن اسپاز وسىنداي مارتەبەگە يە بولدى. چان حون مەن سويا سوۋسىمەن تۇزدىقتالعان كەسپە، كۇرىش جانە تاۋىق ەتىن ۇسىنادى. ءبىر قاراعاندا ەرەكشە ەشتەڭەسى جوق سياقتى، ءبىراق ميشلەن ساراپشىلارى ونىڭ اسپازدىق ونەرىنە لايىقتى باعا بەردى. سالتاناتتى مەيرامحانالىق ينتەرەردىڭ ورنىنا كوشە دۇكەنىنىڭ ورنالاسۋىنا بايلانىستى ساراپشىلار، ەڭ الدىمەن، تاماقتاناتىن ورىندى ەمەس، تاعامدى باعالايتىندارىن مالىمدەدى.
ايتپاقشى، ءبىز وقىرماندارعا ميشلەن جۇلدىزىن يەلەنۋ ءۇشىن قويىلاتىن باستى تالاپتاردىڭ ناقتى ءتىزىمىن ۇسىنا المايمىز، سەبەبى بۇل – كومپانيانىڭ كوممەرسيالىق قۇپياسى بولىپ تابىلادى. ساراپشىلار «ميشلەننىڭ قىزىل گيدىنە» اۆتورلىق تاعامدار ارقىلى كىرۋگە بولاتىنىن عانا جاسىرمايدى. ولاردىڭ پىكىرىنشە، اۆتورلىق تاعامدارى جوق جەردى باعالاۋدىڭ قاجەتى جوق. مىنە، سوندىقتان تاماق تالعاعىشتار ميشلەن مەيرامحانالارىن تاڭداۋ بارىسىندا ءدامحانانىڭ باس اسپازى مەن ونىڭ قوناقتارعا ۇسىناتىن تاعامى تۋرالى بىلە الادى.
ميشلەن جۇلدىزى – ماڭگىلىك ەمەس
مەيرامحاناعا ميشلەن جۇلدىزىن بەرۋ - قانداي دا ءبىر ماعىناسىندا سپورت سياقتى. ونى يەلەنۋگە دە بولادى، سونداي-اق جوعالتىپ الۋ دا عاجاپ ەمەس. ەكىنشىسىن ىستەۋ وڭايىراق. فرانسيادا كوپتەگەن تاماق تالعاۋشىلار قاي مەيرامحانانىڭ جۇلدىزىن جوعالتاتىنىن بولجاپ، ءباس تىگەدى. ميشلەن باس اسپازى – جوعارى دەڭگەيدەگى كاسىپقويلار، ءبىراق كەيبىرەۋلەر جۇلدىزدىڭ جوعالۋىن جەكە قايعىمەن ۇشتاستىرادى.
باس اسپاز بەرنارد لويزەو ءۇش جۇلدىزدىڭ بىرەۋىن جوعالتۋى مۇمكىن ەكەندىگى تۋرالى قاۋەسەت شىققاندا دەپرەسسياعا ءتۇسىپ، وز-وزىنە قول جۇمسايدى. بۇل وقيعا 2003 جىلى بولعان، بۇل - اسپازدار ءۇشىن ميشلەن جۇلدىزىنىڭ قانشالىقتى ماڭىزدى ەكەندىگىن كورسەتەدى. شىندىعىندا، بەرنارد بوسقا زارداپ شەكتى – ونىڭ مەيرامحاناسىنداعى جۇلدىز الىنعان جوق. بۇل «جۇلدىز» ءۇشىن جاسالعان ءبىرىنشى ءوزىن-وزى مەرت قىلۋ وقيعاسى ەمەس. قايعىلى ءتىزىمدى 1966 جىلى باس اسپاز الەن زيك باستادى – ونىڭ مەيرامحاناسى راسىندا جۇلدىزىن جوعالتقان ەدى.
الايدا، «جۇلدىزىنا قول سۇعىلمايتىن» باس اسپازشىلاردىڭ ءتىزىمى دە جوق ەمەس. ساراپشىلار ءۇش جۇلدىزدىڭ بىرەۋىن دە الا المايتىن باس اسپازدار مىنالار: ميشەل جەرار، پول بوكيۋز، الان سەندەران، ميشەل ترۋاگرو، جورج بلان. ولار قولىنان ونەرى تامعان ءوز ءىسىنىڭ شەبەرلەرى سانالادى.
ميشلەن جۇلدىزى بارلار قالاي ءومىر سۇرۋدە؟
ەستە قالارلىعى، ميشلەن جۇلدىزى بار مەيرامحانالار بۇل مارتەبەنى وزىنە-وزى جارناما رەتىندە قولدانا المايدى. ءسىز كەز كەلگەن ءدامحاناعا بارىپ، ونىڭ «قىزىل» گيدكە كىرەتىنىن بىلمەي كەتۋىڭىز عاجاپ ەمەس. ەرەجە بويىنشا، مەيرامحانانىڭ ميشلەن جۇلدىزىن يەلەنگەنى تۋرالى ەسكەرتپەنى تەك جولنۇسقادان عانا بىلە الاسىز. سوندىقتان، الدىن الا گيدتى وقي ءجۇرىڭىز.
سونىمەن قاتار، جۇلدىزدى مارتەبەگە يە بولعاننان كەيىن كەلۋشىلەردىڭ بولماۋى سالدارىنان جابىلىپ قالعان مەيرامحانالار دا بار. ونداعى تاعامداردىڭ ءتىل ۇيىرەرلىك بولعانى انىق... مىسالى، Casa Julio يسپان مەيرامحاناسىنىڭ يەسى حۋليو بيوسكا ميشلەن گيدى رەداكسياسىنان ونىڭ ءدامحاناسىنان جۇلدىزدى الىپ تاستاۋىن وتىنگەن، سەبەبى تابىس پەن كەلۋشىلەر سانى ايتارلىقتاي تومەندەگەن...
ەگەر ءسىز ميشلەن جۇلدىزىنىڭ ءدامىن تاتۋ كوپ قارجىنى تالاپ ەتەدى دەپ ويلاساڭىز، قاتەلەسەسىز. ءيا، كوپتەگەن مەيرامحانالار 100-250 ەۋرو ارالىعىنداعى شوتتى بەرۋى مۇمكىن، ءبىراق قولجەتىمدى نۇسقالارى دا بار. گونكونگتە باس اسپاز ماك پۋ گور Add Good Luck اتتى ءدامحانا اشتى. وندا قۇنى 1 ەۋرونى قۇرايتىن تاعامدارعا تاپسىرىس بەرۋگە بولادى. جانە ونىڭ تاعامدارى ميشلەن جۇلدىزىنا يە بولعان!
گيدتى كىم جاسايدى جانە ونىڭ رەداكسياسى قالاي جۇمىس ىستەيدى؟
جولنۇسقانىڭ رەداكتورى بار، ال ونداعى اقپاراتتاردى ارنايى ينسپەكتورلار – 90-عا جۋىق ساراپشى تولىقتىرىپ وتىرادى، ونىڭ ىشىندە 70 ساراپشى ەۋروپالىق ەلدەردە جۇمىس ىستەيدى. بۇل – ءتۇرلى ەلدەردەگى مەيرامحانالارعا ايىنا ءۇش اپتادان جانە جىلىنا 150 تاۋلىككە دەيىن ساياحات جاسايتىن بىرەگەي تۇلعالار. وسى ۋاقىت ىشىندە ءاربىر ينسپەكتور شامامەن 800 مەيرامحاناعا بارادى. ولار مەيرامحانالارعا كىم ەكەندىكتەرىن ايتپاي بارادى، سوندىقتان ينسپەكتورلاردىڭ ءتۇرىن ەشكىم تانىمايدى. ولاردىڭ قايسىسى قاي مەيرامحاناعا باراتىنىن بولجاۋ مۇمكىن ەمەس.
قالاي ميشلەن ينسپەكتورى اتانۋعا بولادى؟ ول ءۇشىن:
- «ءقوناقۇي بيزنەسى» ماماندىعى بويىنشا جوعارى وقۋ ورنىن ءبىتىرۋ كەرەك؛
- قىزمەت كورسەتۋ سالاسىندا جۇمىس ىستەپ، 5-10 جىل تاجىريبە جيناۋ قاجەت؛
- بىرنەشە سۇحباتتاسۋدان ءوتۋ ءتيىس؛
- اعا ينسپەكتورمەن بىرگە تاماقتانىپ، تاعامدار تۋرالى ەسەپ بەرۋ كەرەك؛
- جارتى جىل بويى تاعامدارعا باعا بەرۋدى ۇيرەنۋ قاجەت.
ينسپەكتور ساياحاتتى اياقتاعاننان كەيىن ەسەپ جازادى، ونىڭ نەگىزىندە ميشلەن كەڭسەسىندە جۇلدىز تاعايىنداۋ تۋرالى شەشىم قابىلدانادى. جىل سايىن گيدتىڭ رەداكسياسى 45 مىڭ رەستوراننىڭ جۇمىسىن ساراپتايدى جانە سونىڭ نەگىزىندە 18 ايدا ءبىر رەت كەزەكتى جولنۇسقانى شىعارادى.
ايتپاقشى، ەگەر دەمالىستا ساياحاتقا شىقساڭىز، ەۋروپادا ميشلەن گيدىن الۋدى ۇمىتپاڭىز. وكىنىشكە وراي، بىزدە ونداي قىزمەت كورسەتىلمەيدى.
You Might Also Like
-
ابايدىڭ وريگينالدىق پوەماسى ءۇش شىعارما: "ماسعۇت"، "ەسكەندىر"، "ءازىم".
