InfoHub Logo

ەرتەدە ءبىر كەمپىر-شال قىزىمەن ەلدەن بەزىپ، اڭ جورتپاس، قۇس ۇشپاس ءبىر قۇلا دالانى مەكەندەپ ءومىر وتكىزىپتى. ولاردىڭ كۇنكورىسى جالعىز نارى ەكەن. جىلداردا ءبىر جىل قۋاڭشىلىق ءجۇرىپ، دالانىڭ ءشوبى قۋراعاندىقتان، ءبىر ءۇيلى ءعارىپتىڭ، بەتىنە قاراپ وتىرعان نارىنىڭ بوتاسى ءولىپ، نار جۇدەپ-جاداپ، سۋالىپ كەتىپتى. ۇركەردەي ءۇش جاننىڭ تالشىعى قۇرىپ، تاعدىرىنا ءقاۋىپ ءتونىپ، قاسىرەت-قايعىدا قالىپتى. ءبىر كۇندەرى ءبىر شال
مەن ءبىر جىگىت وسى اراعا پايدا بولعان ەكەن. جۇرگىنشىلەر بۇلاردىڭ مۇڭ-زارىن ۇققان سوڭ، الگى شال جانىنداعى جىگىت ارقىلى كەمپىر-شالعا: «ەگەر قارىمجىعا قىزىن بەرسە، ءقازىر قارا ناردى دومبىرامەن ءيىتىپ بەرەم!» دەگەن ەكەن.

بۇل ءسوز سورلى كەمپىر-شالدىڭ قايعىسىن اۋىرلاتا ءتۇسىپتى. قىزدارىن بەيساۋات بىرەۋگە قولىنان جەتەلەتە سالعانعا شىداماپتى. زەردەلى قىز اكە-شەشەسىنىڭ ويىن اڭعارىپ:

— تاعدىر باسقا سالسا، ماقۇلمىن، — دەپ شالعا كۇي شەرتتىرگەن ەكەن. ءۇي ىشىنەن بەبەۋلەگەن كۇي ءۇنىن ەستىگەن دالاداعى قارا نار ورنىنان تۇرىپتى. قىز ىدىس-اياق جاقتاعى شەلەكتى الا ءجۇرىپ، شالعا لەسىپ كەلگەن جىگىتكە ىم قاعادى. ول تىسقا شىقسا، قارا نار راس يىگەن ەكەن. قىز ناردىڭ قوس ەمشەگىن تاس قىپ قىسىپ تۇرىپ، ەرە شىققان جىگىتكە ءوز جۇرەك سىرىن جانارىنان توككەن جاسپەن اڭعارتىپ، وزىنە كومەك سۇراپتى. شالعا قور بولىپ بارا جاتقانىنا قورلانىپ، جالىن اتقان جۇرەگى وزىنە ءۇمىت ارتىپ تۇرعانىن اڭعارعان جىگىت شاپشاڭ باسىپ ۇيگە كىرەدى دە، شىن
جۇرەگى ءوزى دەپ تۇرعان قىز كوڭىلىنىڭ كىلتى بولعان زارلى، مۇڭلى ءبىر كۇيدى شەرتەدى. سوندا قىز شەلەگىنە ءسۇت بۇلاق بولىپ اعادى. قىزدىڭ كوز جاسى دا توقتاۋسىز سورعالايدى. وسى كەزدە كەمپىر-شال دا ريزا بولىپ قىزىن جىگىتكە اتاپ، اق باتاسىن بەرگەن ەكەن. «نار يدىرگەن» سونداعى جىگىت شەرتكەن كۇي دەيدى.

 

---