InfoHub Logo

باياعىدا ءبىر شال مەن ونىڭ جالعىز قىزى بولىپتى. ولاردىڭ كۇن كورەتىنى دە جالعىز نار ەكەن: ىشسە اسى، مىنسە كولىگى. كۇندەردىڭ كۇنىندە ساۋىپ وتىرعان تۇيەسىنىڭ بوتاسى ءولىپ قاپ، قىزى مەن اكەسى اس-سۋسىز قالادى. ۇيلەرىندە ۇنەم جوق، اشتان ولۋگە اينالادى، شال نە ىستەرىن بىلمەي قاتتى قاپالانادى. اقىلدى قىزى ونى جۇباتىپ: «اكە، قايعىرا بەرمە، قۇدايدىڭ ءبىر جاقسىلىعى بار شىعار، شىداي تۇرايىق»، — دەيدى ەكەن. سول ايتقان ءسوزىن ەستىگەندەي كۇن ساسكەگە كوتەرىلە كەدەيدىڭ ۇيىنە ەكى جولاۋشى كەلىپ ءتۇسىپتى. كەلگەن اقساقال قارت كىسى دە، جانىنداعى جاس جىگىت تە دومبىراشى بولىپ شىعادى. قىزدىڭ اكەسى وزەگى تالىپ، ءولىمنىڭ از-اق الدىندا وتىرعان جايىن قوناقتارىنا ايتىپ بەرىپتى. قارت دومبىراشى ەكى سوزگە كەلمەي «قىزىڭدى ماعان قيساڭ، نارىڭدى بوتاسىز-اق ءيىتىپ بەرەمىن» دەگەن. بۇل ءسوزدى اكەسى قىزىنا كەلىپ ايتادى. سوندا قىزى: «بەتىن قايتارما، اكە. اۋەلى تۇيەنى ءيدىرسىن، قالعانىن كورە جاتارمىز» دەيدى. كۇيشى قىزعا: «قاراعىم، كونەگىڭدى الىپ بارىپ، جەلىنىن ۇستاپ دايىن وتىر» دەپ، دومبىراسىنىڭ قۇلاق كۇيىن كەلتىرەدى. سوسىن تۇيەنىڭ جانىنا بارىپ تارتا جونەلگەندە، دومبىرا «قوس، قوس» دەپ سويلەپ قويا بەرەدى. ءبىر كەزدە قىز تۇيە ءيىپ، ەمشەگىنە ءسۇت كەلە باستاعانىن بايقايدى، ءبىراق شالعا تيگىسى كەلمەگەن ول، ءسۇتى اعىپ كەتپەسىن دەپ ءۇرپىسىن ساۋساعىمەن قىسىپ ۇستاپ وتىرادى. «قالاي؟» دەپ ىمداعان قارياعا ءالى ءسۇت كەلگەن جوق دەپ ىمدايدى، قىزدىڭ جايىن قاباعىنان ۇققان جىگىت دومبىراسىن الىپ، ەندى ول تارتا جونەلەدى. سول كەزدە ءسۇت قىسقان جەلىندى قويا بەرىپ ەدى، ءسۇت كونەككە ساۋىلداپ توگىلە باستادى. قارت دومبىراشى بۇعان اڭ-تاڭ قالادى. وتاعاسى ءوزىنىڭ بەرگەن ۋادەسىن ورىنداپ ناردى يىتكەن جىگىتكە قىزىن بەرەدى. سول تۇيەنىڭ ءسۇتىن ازىق ەتىپ، اكەسى، قىزى، كۇيەۋ بالاسى ۇشەۋى ەشتەمەدەن تارىقپاي كوزىن ساتىپ ەشكىمگە تەلمىرمەي، كوڭىلى دە، قارىنى دا توق بولىپ ءوتىپتى دەسەدى.

---