ناۋرىز سىباعاسى
قىرسىق قىلعاندا، سول كۇنى ساباق بولدى. مۇنى بىلگەن نارتاي قاتتى قامىقتى. ەندى-شى! بۇگىن ۇلمان اجەي اۋىلدا ءبىرىنشى بولىپ ناۋرىز كوجە بەرگەلى جاتىر. ءبىر جىل بويى كۇتكەن كوجەدەن قۇر قالاتىن بولدى عوي! ونى ايتاسىز، ءبىر جاسقا وسپەي قالۋى دا مۇمكىن اۋەلى. اجەسى سولاي دەگەن. العاشقى ناۋرىز كوجەنى ىشكەن كۇنى ادام ءبىر جاسقا وسەدى ەكەن. ال ىشپەي قالسا، ءبىر جاس وسپەي قالادى دەگەن ءسوز عوي! قايتپەك كەرەك؟! بارمايىن دەسە تاعى بولمايدى. وتە ماڭىزدى ساباق. ءمۇعالىمنىڭ ۇرساتىنى ەشتەڭە ەمەس-اۋ! ءبىر ساباق جىبەرىپ الساڭ كەيىن قۋىپ جەتۋ قيىن. سونى ويلاپ تاعى قينالدى. ەندى ءقايتتى؟!
ءوزى ويلانىپ شەشە الماعان سوڭ، اياڭداپ اجەسىنە كەلدى.
— اجە، وقۋشى ءۇشىن ساباق ماڭىزدى ما، الدە ناۋرىزكوجە ماڭىزدى ما؟ — دەدى تۇيىققا تىرەلىپ تۇرعانى وڭىنەن ايقىن بايقالىپ.
— وقۋشى ءۇشىن، ارينە، ساباق ماڭىزدى،— دەدى اجەسى ويلانباستان.
— وندا مەن… بۇگىن ۇلمان اجەمنىڭ ناۋرىزكوجەسىن ىشپەسەم، ءبىر جاسقا وسپەي قالاتىن بولدىم عوي؟
— ا، ول ما… ول جاعى وڭاي، — دەدى اجەسى نارتايدىڭ ىشكى ويىن وقىپ قويعانداي مەيىرلەنە كۇلىمسىرەپ. — بۇل وڭاي شەشىلەتىن ماسەلە.
— قالاي؟
— سەن ساباققا الاڭسىز بارا بەرەسىڭ. ۇلمان اجەڭنىڭ ۇيىنە اتاڭ ەكەۋمىز بارامىز. كوجەنى ساباقتان كەلگەن سوڭ ىشەسىڭ.
— قالاي؟ ۇلمان اجەمنىڭ ۇيىنە بارىپ پا؟
— جوق. ناۋرىزدىڭ ءوز جول-جورالعىسى بولادى. بارماي قالعاندارعا ىدىسقا قۇيىپ بارعانداردان بەرىپ جىبەرەدى. مۇنى «سىباعادان قۇر قالدىرماۋ» دەيدى. بارماي قالعان ادام ءوز سىباعاسىن ءوزى ۇيىندە ىشەدى. سەن مۇنى بىلمەۋشى مە ەدىڭ؟
— جوق، بىلمەيمىن. ەندى ەستىپ قۋا نىپ وتىرمىن. جاقسى بولدى عوي. ۇلمان اجەمنىڭ ناۋرىزكوجەسىن ىشە الماي قالاتىن بولدىم دەپ قاتتى ۋايىمداپ ەدىم. ەندى ساباققا الاڭسىز باراتىن بولدىم. ءبىراق، اجە، ءسىز ۇمىتىپ كەتپەڭىز.
— جوق. الاڭداما، قۇلىنىم! مەن ۇمىتسام دا، ۇلمان اجەڭ ۇمىتپايدى. ويتكەنى، سىباعا بەرۋ — ولاردىڭ مىندەتى.
— وندا جاقسى، اجە! مەن مەكتەپكە كەتتىم.
ۋايىمى سەيىلگەن نارتاي مەكتەپكە دايىن دالۋ ءۇشىن ءوز بولمەسىنە قاراي بۇرىلدى.
You Might Also Like
-
نارتاي بۇگىن ۇيدەن جالعىز شىقتى. بەتالىسى كورشىلەرى ەرلان اعالارىنىڭ ءۇيى. ارا جاقىن، ءازىر-اق جەتىپ بارادى.
