نازاربايەۆ: مۇعالىمدەردىڭ جالاقىسى 30-50 پايىزعا دەيىن ارتادى
ق ر پرەزيدەنتى نۇرسۇلتان نازاربايەۆتىڭ قازاقستان حالقىنا ارنالعان بيىلعى جولداۋىنداعى 10 نەگىزگى مىندەتتىڭ ءبىرى ادام كاپيتالىن جاڭا ساپاسىنا ارنالعان.
«ءبىلىم بەرۋ جۇيەسىنىڭ بارلىق دەڭگەيى زاماناۋي وزگەرىستەر مەن ەكونوميكا سۇرانىستارىنا جاۋاپ بەرۋى ءتيىس. بۇل رەتتە ءمۇعالىم ماماندىعىنىڭ بەدەلىن ارتتىرۋ قاجەت. دەنساۋلىق ساقتاۋ سالاسىندا جاڭا تەحنولوگيالاردى قولدانۋ اۋرۋدىڭ الدىن الۋ مەن ەمدەۋدى ايتارلىقتاي جاقسارتىپ، مەديسينالىق قىزمەت كورسەتۋ ساپاسىن كوتەرۋى ءتيىس»، - دەدى ن.نازاربايەۆ ءوز مالىمدەمەسىندە.
مەملەكەت باسشىسى 2016-2017 جىلدارى قازاقستانداعى الەۋمەتتىك تولەمدەردىڭ ءۇش رەت كوتەرىلگەنىن ەسكە سالدى. سونىڭ ىشىندە بازالىق زەينەتاقى - 29 %، ىنتىماقتىق زەينەتاقى - 32%، دەنساۋلىق ساقتاۋ سالاسىنداعى ەڭبەكاقى - 28%، ءبىلىم بەرۋ سالاسىندا - 29% جانە مەملەكەتتىك قىزمەتشىلەردىڭ جالاقىسى - 30 پايىزعا كوبەيگەن.
«بۇل ءۇردىس ءالى دە جالعاسادى، - دەپ اتاپ ءوتتى ن.نازاربايەۆ. - بيىل الەۋمەتتىك سالاعا بيۋدجەتتەن بولىنگەن قاراجات 12 پايىزعا ارتىپ، 4 ترلن تەڭگەدەن استى. بازالىق زەينەتاقى ەڭبەك ءوتىلىن ەسەپكە الا وتىرىپ، ورتا ەسەپپەن 1،8 ەسەگە ۇلعايادى. وقۋ باعدارلامالارىنىڭ جاڭارتىلعان مازمۇنى اياسىندا وقىتۋعا كوشكەن مۇعالىمدەردىڭ لاۋازىمدىق جالاقىسى بىلىكتىلىكتەرىنە قاراي 30%-دان 50%-عا دەيىن ارتادى».
«اتالعان مىندەتتەردى ورىنداۋ ءۇشىن بۇكىل قوعامنىڭ بىرلىگى مەن ىنتىماعى كەرەك. ول ءۇشىن ۇكىمەت پەن اكىمدەر كەڭىنەن ءتۇسىندىرۋ جۇمىستارىن جۇرگىزۋى قاجەت. وتانىمىزدىڭ كوركەيۋى اركىمنىڭ جاڭا «سيفرلىق ءداۋىر» تالاپتارىنا ساي بولۋىنا بايلانىستى. وسىنى ءاربىر قازاقستاندىق تەرەڭ ءتۇسىنۋى كەرەك. قازاقستاننىڭ جارقىن بولاشاعى جولىندا بارلىق ماقساتتارعا قول جەتكىزەتىنىمىزگە كامىل سەنەمىن»، - دەپ ءوز ءسوزىن تۇيىندەدى ن.نازاربايەۆ.
ەسكە سالا كەتەيىك، نۇرسۇلتان نازاربايەۆ قازاقستان حالقىنا ارنالعان جىل سايىنعى جولداۋىنا بايلانىستى رەسپۋبليكالىق تەلەارنالار ەفيرىنەن مالىمدەمە بەردى جانە جۇزەگە اسىرىلۋى ءتيىس 10 نەگىزگى مىندەتتى اتاپ كورسەتكەن ەدى.
قازاقپارات
You Might Also Like
-
يسلانديانىڭ ۆەستمان ارالدارىنداعى تريدرانگار شامشىراعى الەمدەگى وڭاشا تۇرعان ەڭ ۇرەيلى شامشىراقتاردىڭ ءبىرى بولىپ تابىلادى.
